जीसु चो सेवा-सुस्तारा करतो बायलेमन
8
एचो पाछे जीसु, सहरमन ने आउर गांवमन ने जाउन महापरभु चो राज चो नंगत खबर सुनाते बुलते रलो। हुनचो बाराझन चेलामन हुनचो संगे रला,
2 आउर खुबे बायलेमन बले, जोनमन के भूतमन ले आउर बेमारमन ले उजराउ रये, आउर हुनमन ए आत: मरियम जेके मगदलीनी बले बलसोत, जेचोले सात देव-भूतमन निकरुन रओत।
3 आउर हेरोद राजा चो भंडारी खुजा चो बायले जोअन्ना, सूसन्ना आउर खुबे आउर बायलेमन, जोनमन आपलो धन-माल ले जीसु आउर चेलामन चो सेवा-सुस्तारा करते रओत।
लूका 8:1-3
बुनतो बीता चो कटाव
4 जिदलदांय सहरमन ले खुबे लोगमन कुड़ा होला आउर लोगमन हुनचो लगे एते रओत, तेबे जीसु हुनमन के कटाव सांगलो।
5 गोटोक बुनतो बीता बुनुक निकरलो; बुनतो बेरा आदो बीच बाट रेटे घसरली आउर रमंदी होली, आउर बादरी ने उड़तो चड़ईमन एउन हुनके खादला।
बीच बुनतो बीता (8:5)
6 आउर आदो बीच गोटरला भुंय ने घसरली, आउर अखरली, मानतर पानी नी मिरलो किरता सुकली।
7 आदो बीच लाटा-बुटामन चो मंजिगता घसरली, आउर लाटा-बुटामन संगे-संगे बाड़ुन हुनके चेपाली।
8 आउर आदो नंगत खतउ भुंय ने घसरली, आउर लसलसा बाड़ुन सव गुना उबजास आनली। इतरो सांगुन भाति हुन किरकिरुन बललो: “जेके सुनतो काजे कान आसे हुन नंगत ले सुनो।”
कटाव चो अरथ
9 जीसु चो चेलामन हुनके पूछला: ए कटाव चो अरथ काय आय? हुन बललो:
10 “तुमके महापरभु चो राज चो भेद चो गियान दिलेसे, मानतर दुसर के मय कटाव बाटले सांगेसे। एईकाजे कि
हुनमन दखते-दखते बले
नी दखोत,
सुनते-सुनते बले
नी समजोत।†
11 कहका चो अरथ ए आय, बीचामन महापरभु चो बचन आय।
12 बाटे घसरलो बीचामन, हुनमन आत जोन सुनसोत, तेबे सयतान एउन हुनमन चो मन चो गोट के धरुन जायसे; कसनबलले बचन के पतेयाउन मुक्ति नी पाओत।
13 गोटरला भुंय ने घसरलो बीचामन हुनमन आत, जोन बचन के सुनुन हरिक ले मानसोत। मानतर काई चेर नी धरुक सकलो किरता डंडिक काजे पतेयाउआत, आउर परखतो बेरा अमरलोने छांडुन देयसोत।
14 लाटा-बुटा मंजिगते घसरलो बीचा, हुनमन आत जोन सुनसोत, मानतर ए जीवना चो फिकिर, धन आउर सुख जमाय बाटले एउन चेपायसे आउर हुनमन केबई फर नी धरोत।
15 नंगत भुंय ने घसरलो बीचा हुनमन आत, जोन बचन के सुनसोत आउर गोट के नंगत मानुन, मन ने धरुन रयसोत। हुनमन फरोतले धीरजा संगाउआत।
लूका 8:4-15
दीया चो कटाव
16 कोनी दीया बारुन पयली ले नी ढाकोत, नोहले खटेया खाले नी मंडाउआत, मानतर रूखी ने मंडाउआत। एईकाजे कि भीतरे एतो लोग के उजर मिरो।
17 काई बले लुकालोर नीआय जेके दखुक नी होयदे, आउर काई बले लुकुन नीआय, जेके जानुक नी होयदे आउर दखा नी देयदे।
18 एईकाजे तुमी धियान दिया कि तुमी मोचो गोट के कसन सुनसाहास? कसनबलले जेचो लगे आसे, हुनके आउर देउआय; आउर जेचो लगे नीआय, हुनचो ले हुनके बले नेयदे, जेके हुन आपलो खुद चो आय बलेसे।”
लूका 8:16-18; 19-21
जीसु चो आया आउर भाईमन
19 जीसु चो आया आउर हुनचो भाई हुनचो लगे ईला, मानतर लोग-कुड़ा किरता हुनके भेटुक नी सकला।
20 आउर कोनी जीसु के बललो, “तुचो आया आउर तुचो भाईमन, तुके भेटतो काजे बाहरे उबा आसोत।”
21 जीसु हुन लोगमन के बललो: “मोचो आया आउर भाईमन हुनमन आत जोन महापरभु चो गोट के सुनसोत आउर मानसोत।”
लेहरा-धुका के ठेबातोर
22 फेर गोटोक दिने, जीसु आउर हुनचो चेलामन डोंगा ने चेगला; आउर हुन, हुनमन के बललो: “इआ, समूंद चो हुन पाट जावां।” तेबे हुनमन डोंगा के ढीलुन दिला।
23 जिदलदांय हुनमन डोंगा घाटते रला जीसु सोवलो, तेबे समूंद ने लेहरा धुका ईली, आउर हलकामन के खुबे उदलाउन डोंगा पानी ले भोरुक मुरियाली आउर हुनमन संगे गराहां होतो असन होली।
24 तेबे चेलामन, लगे एउन जीसु के चेताला आउर बलला, “ए मालिक! ए मालिक! आमी बुड़ून मोरुंदेबे।” तेबे जीसु उठुन लेहरा धुका के आउर उदलतो हलकामन के दागा देउन बललो “ठेब”, तेबे लेहरा-धुका चिमनाय मांडली आउर अस्तिर होली।
25 आउर जीसु चेलामन के पूछलो: “तुमचो बिसवास कहां आसे?” मानतर हुनमन डरुन गेला आउर अचरित होउन गोटोक-दुसर के बलुक मुरियाला: “ए कोन आय? हुन, लेहरा धुका के आउर पानी के बले हुकुम देयसे, आउर हुनमन हुनके मानसोत?”
लूका 8:22-25
भूत धरलो मनुक के उजरातोर
26 फेर जीसु आउर चेलामन समूंद के नाहकुन गिरासेन देस ने अमरला, जोन गलील समूंद चो हुन पाट पुरे आसे।
27 जिदलदांय जीसु आउर हुनचो चेलामन समूंद कटा ने उतरला, तेबे हुन सहर चो गोटोक मनुक एउन जीसु के भेटलो, जेके देव-भूतमन समाउन रओत आउर खुबे दिन ले फटई नी पींदते रये आउर घरे नी रते रये, मानतर मोड़ा-भाटा ने रते रये।
28 हुन जीसु के दखुन किरकिरलो आउर हुनचो पुरे पांय पड़ुन जोर ले चिचियालो: “ए सपाय ले बड़े महापरभु चो बेटा जीसु! मोचो ले तुचो काय काम आय? मय तुके गुहारेंसे: मोके तकलीस नी कर।”
29 जीसु, देव-भूतमन के हुन मनुक ले निकरुन जातो हुकुम दिलो। (एचोले आगे, देव-भूतमन हुनके घन-घन झाकते रये, आउर हुनके सिकरामन ले हाथ-पांयमन के बांदुन राखा दिलोने बले हुन सिकरामन के टुटाते रलो, आउर देव-भूतमन हुनके रान ने बुलाते रला।)
30 जीसु हुनके पूछलो: “तुचो काय नाव आय?” हुन बललो: “पलटन”; कसनबलले हुनके खुबे देव-भूतमन समाउन रओत।
31 आउर भूतमन जीसु के घन-घन गुहारला, आमके हुन नरक-कुंड ने जातो हुकुम नी देस, जोन थाने आमचो डंड होयसे।
32 हुन थाने डोंगरी ने बरांहामन चो गोटोक बड़े गोहड़ी चरते रओत, एईकाजे भूतमन जीसु के घन-घन गुहारला: आमके हुनमन ने ओलुक देस, तेबे जीसु हुनमन के जाउक दिलो।
33 तेबे देव-भूतमन हुन मनुक ले निकरुन बरांहामन ने ओलला, आउर हुन गोहड़ी उतरानी ले पराउन समूंद ने घसरला, आउर बुड़ून मोरला।
34 जोन बले होउन रये एके दखुन धोरईमन पराला, आउर सहर ने आउर गांवमन ने जाउन ए गोट के सांगुन दिला।
35 आउर लोगमन एके, जोन होउन रली दखतो काजे निकरला, आउर जीसु चो लगे एउन, जोन मनुक ले देव-भूतमन निकरुन रला, हुनके जीसु चो पांयमन लगे फटई पींदुन नंगत बुद ने बसलोर के दखुन डरला।
36 एके दखलो लोगमन दुसर के सांगला कि कसन जीसु हुन मनुक के उजरालो जेके देव-भूतमन समाउन रला।
37 तेबे गिरासेन देस चो जमाय लोगमन एउन जीसु के गुहारला कि हुनमन चो राज के छांडुन जाओ, कसनबलले हुनमन खुबे डरुन रला। एईकाजे जीसु गलील परघन ने बोहड़तो काजे डोंगा ने चेगलो, तेबे
38 हुन मनुक जेचो थान ले देव-भूतमन निकरुन रला, जीसु संगे जातो काजे गुहारलो; मानतर जीसु हुनके बललो:
39 “जा, घरे बोहड़ुन जा आउर सपाय के सांगुन देस कि महापरभु तुचो काजे कितरो बड़े बुता करलोसे।” हुन मनुक गेलो आउर जमाय सहर ने सांगुन दिलो कि जीसु हुनचो काजे काय-काय बुता करलोसे।
लूका 8:26-39
जाईर चो मोरलो बेटी आउर गोटोक बेमार बायले
40 जेबे जीसु गलील परघन ने बोहड़ुन ईलो तेबे जमाय लोगमन जीसु के दखुन खुबे हरिक होला, कसनबलले हुनमन हुनचो बाट दखते रला।
41 तेबे मंडली-घर चो मुखिया एउन जीसु चो पांय पड़लो। हुनचो नाव जाईर रये, आउर हुन जीसु के आपलो घरे एतो काजे गुहारलो,
42 कसनबलले हुनचो बारा बरक चो गोटकी ची बेटी एबे-तेबे मोरतो असन होउन रली।
जसन जीसु जाते रलो, तेबे लोग-कुड़ा उपरा-पेला होते रओत।
43 हुन लोग-कुड़ा ने गोटोक बायले रली जेके बारा बरक ले लोउ बोहतो बेमार रये। हुन बईदमन लगे आपलो जमाय धन-माल के सारली, मानतर कोनी हुनके उजराउक नी सकला।
44 हुन जीसु चो पाटकुती ले एउन हुनचो फटई चो आंचरा के छिंवली आउर हुदलीदांय हुनचो लोउ बोहतोर छुकनाय छांडली।
45 तेबे जीसु पूछलो: कोन आय मोके छिंवलो? लोगमन मय नोआंय बलते रओत, तेबे पतरस, जीसु के बललो: “गुरुजी, लोगमन तुके चेपायसोत आउर उपरा-पेला होयसोत।”
46 मानतर जीसु बललो: “कोनी मोके छिंवलोसे, कसनबलले मय जानले कि सकत मोचो ले निकरलीसे।”
47 हुन बायले जानली कि हुन लुकुक नी सके, तेबे हुन थरथरते एउन जीसु चो पुरे मांडिखुटा दिली। हुन जमाय गोट के सांगली कि हुन काय काजे जीसु के छिंवली आउर कसन ने हुदलीदांय आपलो बेमार ले उजरुन गेली।
48 जीसु हुन बायले के बललो: “बेटी, तुचो बिसवास किरता एबे तुय उजरलीस, अस्तिर ने जा।”
49 जीसु गोटेयातोदांय ची जहूदी मंडली-घर चो मुखिया जाईर चो घर ले कोनी एउन बललो: “तुचो बेटी मोरली; गुरुजी के असकट नी कर।”
50 मानतर जिदलदांय जीसु ए गोट के सुनलो, तेबे जाईर के बललो: “मुरे नी डर, सोजे पतेयाते रा आउर तुचो बेटी उजरुन जायदे।”
51 जीसु जाईर चो घरे गेलो। आउर पतरस, जूहन्ना, जाकूब आउर हुन लेकी चो आया-बुआ के छांडुन आउर कोकई आपलो संगे घर भीतरे एउक नी दिलो।
52 जमाय लोग हुन लेकी काजे गागा-रुआं होते रओत। मानतर जीसु बललो: “नी गागा, लेकी नी मोरलीसे, हुन सोजे सोयसे।”
53 लोगमन जीसु के हांसला कसनबलले हुनमन जानला कि हुन लेकी मोरुन गेलीसे।
54 मानतर जीसु हुनचो हाथ के धरुन बड़े राग ने बललो: “ए लेकी, उठ!”
55 तेबे हुनचो जीव बोहड़ुन ईली। आउर हुन तूरते उठली। जीसु हुनमन के बललो, हुनके काई बले खाउक दियास।
56 हुनचो आया-बुआमन भक्याउन गेला, मानतर जीसु, हुनमन के हुकुम दिलो कि ए गोट के कोकई नी सांगा।
लूका 8:41-42,49-56