पलटन चो बड़े मुखिया चो बिसवास
7
जीसु, लोगमन के आपलो सपाय गोटमन के सांगुन भाति कफरनहूम सहर ने ईलो।
2 हुन सहर ने रोमी राज चो पलटन चो बड़े मुखिया चो गोटोक कमेया खुबे बेमार रलो आउर एबे-तेबे मोरतो असन होउ रये। पलटन चो बड़े मुखिया ए कमेया के खुबे मया करते रये।
3 हुन जीसु चो गोट के सुनुन जहूदीमन चो धरम-सियानमन के हुनचो लगे गुहारुक पठालो कि एउन मोचो कमेया के उजराउन देओ।
4 धरम-सियानमन जीसु चो लगे एउन खुबे गुहारला आउर बलला: “हुन कमेया के उजराउन देस, कसनबलले पलटन चो बड़े मुखिया एचो लाईक आसे।
5 हुन आमचो लोगमन के मया करेसे आउर हुनी आमचो काजे मंडली-घर बनाउन दिलोसे।”
6 जीसु हुनमन संगे गेलो। जिदलदांय जीसु, पलटन चो बड़े मुखिया चो घर लगे अमरलो, तेबे हुन मुखिया आपलो संगवारीमन के जीसु लगे असन बलतो काजे पठालो, “ए परभु, मोचो घरे एतो तकलीस नी कर, कसनबलले मय एचो लाईक नोआंय कि तुय, मोचो घर भीतरे आव।
7 एईकाजे मय, आपने के तुचो लगे एतो लाईक नी समजले, तुय हुकुम देस आउर मोचो कमेया उजरेदे।
8 मय बले दुसर चो हक ने आंसे, आउर मोचो हक ने पाईकमन आसोत। मय गोटोक पाईक के ‘जा’ बलले हुन जायसे, दुसर के ‘आव’ बलले हुन एयसे। मोचो कोनी कमेया के ‘एके कर’ बलले हुन करेसे।”
9 एके सुनुन जीसु भक्याउन गेलो। हुन उलटुन हुनचो संगे-संगे एतो लोग-कुड़ा के बललो: मय तुमके बलेंसे: इसराएल चो लोगमन ने बले मय असन बड़े बिसवास के नी दखले।
10 पलटन चो बड़े मुखिया बाटले गेलो लोगमन घरे बोहड़ला आउर हुन कमेया के उजरलोर दखला।
जीसु, रांडी बायले चो मोरलो बेटा के जियायसे
11 दुसर दिने जीसु नाईन नाव चो गोटोक सहर ने गेलो, आउर हुनचो चेलामन आउर खुबे भारी भीड़ हुनचो संगे जाते रओत।
12 जिदलदांय हुन सहर चो कपाट लगे अमरलो, तेबे लोगमन गोटोक मोड़ी के खोरे नेतो के दखलो। हुन आपलो आया चो गोटकी ची बेटा रये, आउर हुन रांडी रली; आउर सहर चो खुबे लोगमन हुनचो संगे रओत।
13 परभु जीसु हुनके दखुन जीव दुखलो आउर हुन रांडी के बललो: नी गाग।
14 तेबे जीसु, लगे जाउन हुन टरडी के छिंवलो; आउर बोअतो बीतामन ठेबला, तेबे जीसु बललो: ए जुवान, मय तुके बलेंसे, उठ!
15 तेबे मोरलो जुवान उठुन बसलो आउर गोटेयाउक मुरियालो आउर जीसु, हुनके हुनचो आया के सोपुन दिलो।
16 जमाय लोगमन भक्याउन डरुन गेला आउर हुनमन महापरभु चो जय-जय करुन बलला कि आमचो मंजिगता गोटोक बड़े अगमजानी उठलोसे; आउर महापरभु आपलो लोगमन उपरे दया दखालोसे।
17 आउर जीसु चो ए गोट जमाय जहूदिया आउर आली पाली चो गुलाय परघन ने जगुर-पगुर होउन गेली।
लूका 7:11-17; 18-23
जीसु आउर जूहन्ना बपतिस्मा देतो बीता
18 बपतिस्मा देतो बीता जूहन्ना चो चेलामन हुनके ए गोटमन सांगला।
19 तेबे जूहन्ना आपलो दुयझन चेलामन के ए पूछतो काजे परभु लगे पठालो, “काय, हुन एतो बीता तुय आस कि आमी दुसर चो बाट दखुं आंव?”
20 हुनमन परभु लगे एउन बलला, “बपतिस्मा देतो बीता जूहन्ना आमके ए गोट पूछतो काजे तुचो लगे पठालोसे: ‘काय हुन एतो बीता तुय ची आस कि नाई, नोहले आमी दुसर चो बाट दखुं आंव’?”
21 हुदलीदांय जीसु खुबे लोगमन के बेमार ले आउर दुखामन ले उजरालो, आउर भूतमन ले छंडालो आउर खुबे कानामन के दखतो सकत दिलो,
22 आउर जीसु, जूहन्ना चो चेलामन के बललो: जोन बले तुमी दखलासाहास आउर सुनलासाहास, जाउन जूहन्ना के सांगुन दियास। कानामन दखसोत, खोड़ेयामन हिंडसोत, कोढ़ बेमारमन छुक-छुका होयसोत, भयरामन सुनसोत, मोरलो लोगमन फेर जीव पड़सोत; आउर गरीब-धुरीबमन के नंगत खबर सांगेसे।
23 भाइगमानी आय हुन, जोन मोचो किरता धोका नी खाये।
24 जिदलदांय जूहन्ना चो बाटले ईलो लोगमन गेला, तेबे जीसु, जूहन्ना चो बारे ने लोगमन के बलुक मुरियालो: तुमी रान ने काय दखुक जाउ रलास? काय, लेहरा ले हलतो रोंडा-बुटा के?
25 तेबे फेर तुमी काय दखुकलाय जाउ रलास? काय, मोल बिती फटई पींदलोर मनुक के? नाई। दखा, जोन मलमल फटई पींदेसोत, आउर खुबे हरिक-उदीम ने रयसोत, हुनमन राजा-माहाल ने रयसोत।
26 तेबे फेर काय दखुक जाउ रलास? काय, कोनी अगमजानी के? हव, मय तुमके सांगेंसे: अगमजानी ले बले बड़े के दखुक जाउ रलास।
27 ए हुनी आय जेचो बारे ने लिखलोर आसे:
दख, मय आपलो दूत के तुचो पुरे-पुरे पठायंसे,
जोन तुचो पुरे बाट तियार करेदे। †
28 मय तुमके सांगेंसे कि बायलेमन ले जनमलोर बीतामन चो मंजिगता, जूहन्ना ले बड़े कोनी नीआत, मानतर जोन महापरभु चो राज ने नानी ले नानी आय, हुन जूहन्ना ले बले बड़े आय।
29 तेबे जमाय सोज लोगमन आउर पट्टी उसील करतो बीतामन बले जीसु चो गोट के सुनुन जूहन्ना ले बपतिस्मा धरुन ए गोट के मानला कि महापरभु सत आय।
30 मानतर फरीसीमन आउर धरम-पंडितमन जूहन्ना ले बपतिस्मा नी धरुन महापरभु चो मन करतो गोट के आपलाहान काजे छांडुन दिला।
31 तेबे मय ए जुग चो लोग के काय संगे कटारेंदे कि हुनमन कोचो असन आत?
32 हुनमन हुन लेकामन चो असन आत, जोन हाट ने बसुन गोटोक दुसर के किरकिरुन बलेसोत:
आमी तुमचो काजे बांवसी फूकलु,
मानतर तुमी नी नाचलास;
आमी खिसियालु,
मानतर तुमी नी गागलास!
33 कसनबलले जूहन्ना बपतिस्मा देतो बीता केबई रोटी नी खादलो, आउर केबई अंगुर-मंद नी खादलो, आउर तुमी बलासाहास कि हुनचोने देव-भूत आसे।
34 मय मनुक चो बेटा, खाते-पीवते ईलेसे; आउर तुमी बलासाहास कि दखा, ढोर आउर मंदाहा मनुक; पट्टी उसील करतो बीतामन चो आउर पापीमन चो संगवारी।
35 मानतर महापरभु चो गियान आपलो जमाय पिलामन ले सिद होयसे।
पापी बायले के खेमा करतोर
36 फेर कोनी फरीसी, जीसु के गुहारलो, मोचो संगे खाउकलाय आव: एईकाजे हुन, हुन फरीसी चो घरे जाउन खाउक बसलो।
37 आउर दखा, हुन सहर चो गोटोक अडरा बायले एके जानली कि जीसु, फरीसी चो घरे खाउकलाय बसलोसे, तेबे महांग बिती संगमरमर पकना चो कोंडी ने खुबे महांग बिती बासतेल आनली,
38 आउर जीसु चो पाटकुती पांय लगे उबा होउन गागुन-गागुन हुनचो पांयमन के आंसू ले भीजाउन आपलो चूंदी ले पोछुक मुरियाली, आउर हुनचो पांयमन के घन-घन चूमुन भाति बासतेल घसली।
39 एके दखुन हुन फरीसी जोन जीसु के हागदेउन रये, आपलो मने बिचारुक मुरियालो, ए अगमजानी होलोने जानतो कि ए बायले जोन हुनके छिंयेसे, हुन कोन आय आउर कसन बरन चो बायले आय। कसनबलले हुन अडरा बायले आय।
40 एके सुनुन जीसु हुनके बललो: “ए समोन, मोके तुचो ले काई बलतोर आसे।” हुन बललो: “ए गुरुजी, बल।”
41 जीसु बललो: “कोनी सवकार चो दुयझन लागा बीता रओत। गोटोक चो लागा पांच सव आउर दुसर चो, पचास चांदी चो सिक्का (दीनार) रये।
42 मानतर हुन दुनो चो लगे लागा बोहड़ातो काजे काई सकत नी रली; तेबे हुन सवकार हुनमन के खेमा करलो। तेबे हुनमन ले कोन हुनके जुगे मया करुआय?”
43 समोन बललो: “मोचो अंताज ने हुन, जेचो जुगे लागा के सवकार खेमा करलो।” जीसु हुनके बललो: “तुय नंगत अंताजलीस”।
44 आउर जीसु किंदरुन, हुन बायले के दखुन समोन के बललो: “काय तुय ए बायले के दखसीस? मय तुचो घरे ईले, मानतर तुय मोके पांय धोअतो काजे पानी नी दिलीस, मानतर हुन मोचो पांयमन के आंसू ले भीजाली, आउर आपलो चूंदी ले पोछली।
45 तुय मोके नी पोटारलीस, मानतर जिदलदांय ले मय ईलेसे हुदलदांय ले हुन मोचो पांयमन के चूमुक नी छांडली।
46 तुय मोचो मुंडे तेल नी घसलीस; मानतर हुन मोचो पांयमन ने बासतेल घसलीसे।
47 कसनबलले मय तुके सांगेंसे: एचो पाप जोन खुबे रली, खेमा होली, एईकाजे ए खुबे मया करली। मानतर जेचो खिंडिक खेमा होलीसे, हुन खिंडिक मया करेसे।”
48 आउर जीसु हुन बायले के बललो: “तुचो पाप खेमा होलीसे।”
49 तेबे जोनमन जीसु लगे खाउक बसुन रओत, हुनमन आपलाहान मन ने बिचारुक मुरियाला कि ए कोन आय जोन पापमन के बले खेमा करेसे?
50 मानतर जीसु हुन बायले के बललो: “तुचो बिसवास तुके बचालीसे, अस्तिर ने जा।”
लूका 7:36-50