जीसु, बिसातो दिन चो बले परभु आय
6
जीसु आउर हुनचो चेलामन बिसातो दिने बेड़ा बाटले जाते रओत। तेबे जीसु चो चेलामन गउं सेंगरीमन के टुटाउन हाथे रमंदुन भाति खाते-खाते जाते रला।
2 तेबे आदो फरीसीमन पूछला: “तुमी असन बुता काय काजे करसाहास, जेके बिसातो दिने करतोर नी बने?”
3 जीसु हुनमन के बललो: “काय, तुमी एके नी पढ़लास: जिदलदांय दाउद आउर हुनचो संगवारीमन के भूक लागली, तेबे हुन काय करलो?
4 हुन कसन ने महापरभु चो घरे गेलो, आउर चेगालो रोटीमन के नेउन खादलो आउर आपलो संगवारीमन के बले दिलो, जेके पुजारीमन के छांडुन आउर कोनी दुसर खातोर नी बने?”
5 आउर जीसु फरीसीमन के बललो: “मय मनुक चो बेटा बिसातो दिन चो बले परभु आंय।”
जीसु कोला हाथ बीता के उजरातोर
6 आउर गोटोक बिसातो दिने जीसु जहूदीमन चो मंडली-घरे जाउन सिखाते रलो। आउर हुता गोटोक मनुक रये, जेचो उजा हाथ कोला रये।
7 आदो धरम-पंडितमन आउर फरीसीमन दखते रला कि जीसु हुन मनुक के बिसातो दिने उजरायदे कि नाई, कसनबलले हुनमन जीसु उपरे काई बले नीस डगराते रओत।
8 मानतर जीसु हुनमन चो बिचार के जानते रये; एईकाजे हुन, हुन कोला हाथ बीता के बललो: उबा हो, जमाय चो मंजिगता उबा हो, आउर हुन उबा होलो।
9 जीसु हुनमन के बललो: “मय तुमके पूछेंसे: बिसातो दिने, काय करतोर नंगत आय? भलई करतोर कि अडरा करतोर; लोग चो जीव के बचातोर नोहले नसातोर?”
10 आउर जीसु चारो-कुती बसलोर जमाय लोगमन के दखुन भाति हुन मनुक के बललो: “तुचो हाथ लमाव; हुन असने ची करलो, आउर हुनचो हाथ निको होली।”
11 मानतर धरम पंडितमन आउर फरीसीमन खुबे रीस होउन आपलाहान ने बलुक मुरियाला: आमी जीसु संगे कसन करवां?
जीसु बारा चेलामन के ‘पठालो-लोग’ नाव संगालो
12 हुन दिनमन ने जीसु डोंगरी ने पारथना करतो काजे गेलो, आउर हुन बियान पावतले महापरभु ले पारथना करते रलो।
13 जिदलदांय बियान पावली, तेबे हुन आपलो चेलामन के हागदेउन हुनमन थान ले बाराझन के बाछलो, आउर हुनमन के ‘पठालो-लोग’ बललो।
14 आउर हुनमन चो नाव ए आय:
समोन जेचो नाव जीसु, पतरस बले संगालो;
आउर हुनचो भाई अंदरियास,
जाकूब आउर जूहन्ना,
फिलिपुस,
बरतुलमय,
15 मत्ती,
थोमा,
हलफई चो बेटा जाकूब,
समोन जेके जलोतेस बले बलते रओत,
16 जाकूब चो बेटा जहूदा,
आउर जहूदा इसकरियोती (जोन जीसु के धोका देतो बीता होलो।)
लूका 5:27-28; 6:12-16
जीसु चो सिखियामन
17 जीसु आउर हुनचो बारा चेलामन जोनमन के जीसु पठालो-लोग चो नाव दिलो, डोंगरी ले उतरुन सम भुंय ने उबा होलो, आउर हुनचो चेलामन चो बड़े भीड़, आउर जमाय जहूदिया, जरूसलेम, सूर आउर सयदा समदूर चो रेटे रतो खुबे लोगमन,
18 जीसु चो गोट सुनतो काजे आउर आपलाहान बेमारमन ले उजरतो काजे हुनचो लगे एउन हुता रओत। आउर देव-भूतमन ले हरेयान होलो लोगमन बले उजरुन जाते रओत।
19 आउर जमाय जीसु के छिंवतो काजे होते रओत, कसनबलले हुनचो थान ले सकत निकरुन जमाय बेमार लोगमन के उजराउन देते रये।
बर आउर सराप
20 तेबे जीसु आपलो चेलामन के दखुन बललो:
“तुमी जोन सोज आहास धन-धन आहास,
कसनबलले महापरभु चो राज तुमचो आय।
21 तुमी जोन एबे भूके आसास, धन-धन आहास;
कसनबलले तुमी हरिक होआसे;
तुमी जोन एबे गागेसाहास, धन-धन आहास;
कसनबलले तुमी हांसासे।
22 तुमी धन-धन आहास, जिदलदांय मय मनुक चो बेटा किरता, लोग तुमके बईर करदे, आउर तुमके निसकाउन देदे, आउर तुमके निंदरदे, आउर अडरा बलुन तुमचो नाव के काटुन देदे।
23 हुदलदांय हरिक ने डगावा, कसनबलले दखा, तुमचो काजे सरगपुर ने खुबे पुन-फर आसे, हुनमन चो बाप-दादामन बले अगमजानीमन संगे असने ची करते रओत।”
24 मानतर एबे जोन सवकार आत, तुमचो उपरे सराप!
कसनबलले तुमी आपलो अस्तिर के पावलासाहास।
25 एबे जोन हरिक आसास, तुमचो उपरे सराप,
कसनबलले तुमी भूके राहासे।
एबे जोन हांसेसाहास, तुमचो उपरे सराप,
कसनबलले तुमी खिसियाहासे आउर गागासे।
26 जिदलदांय जमाय लोग तुमके नंगत आत बलसोत, तेबे तुमचो उपरे सराप, कसनबलले हुनमन चो बाप-दादामन बले हुन फंदी अगमजानीमन के असने ची बलते रओत।
लूका 6:17-26
बयरीमन के मया करतोर
27 मानतर मय, मोचो सुनतो लोगमन के बलेंसे: आपलो बयरीमन के मया करा; जोन तुमके बईर करेसे हुनचो काजे नंगत करा
28 जोन तुमके सरापेदे हुनके बर दियास; जोन तुमचो इजित धरेसे, हुनचो काजे पारथना करा।
29 जोन तुचो गोटोक गाल ने थापड़ मारेसे, हुनके दुसर गाल के बले दखाउन देस; कोनी तुचो ओड़ना झीकेसे जाले, हुनके कुड़ता के बले नेउक देस।
30 जमाय के दिया, जोन तुमके मांगसोत; कोनी तुमचो तीज के झीकले, हुनके बोहड़ाउक नी बलासे।
31 तुमी दुसर काजे असन काम करा, जसन तुमी दुसर ले आपलो काजे डगरायसास।
32 तुमके मया करतो बीतामन के तुमी मया करसास जाले तुमचो काय बड़ाई? कसनबलले पापीमन बले आपने के मया करतोमन के मया करसोत।
33 तुमके भलई करतो बीतामन के तुमी भलई करसाहास जाले, तुमचो काय बड़ाई? पापीमन बले असने ची करेसोत।
34 तुमी, फिरायदे बलुन कोकई लागा दियासे जाले, तुमचो काय बड़ाई? पापी बले पापीमन के लागा देउआत कि उतरोई फेर मिरो।
35 आपलो बयरीमन के मया करा। आउर हुनमन चो भलई करा। फिरायदे बलुन कोकई लागा नी दियासे, तेबे तुमके नंगत पुन-फर मिरेदे आउर तुमी सपाय ले बड़े महापरभु चो बेटामन होआसे। कसनबलले महापरभु, आपने के नी मानतो आउर अडरा लोगमन के बले दया करुआय।
36 जसन तुमचो बुआ महापरभु दया करुआय, उसनेची तुमी बले दया करा।
लूका 6:27-36
दुसर के बदी नी देतोर
37 बदी नी दियास, तेबे तुमके बले बदी नी देदे। खेमा करा, तेबे तुमके बले खेमा करदे।
38 दियास, तेबे तुमके बले देदे। जोन कटार ने तुमी दियासे, हुनी कटार ने तुमके बले मिरेदे।
39 जीसु हुनमन के गोटोक आउर कटाव सांगलो: काय, कोनी काना मनुक दुसर काना के बाट दखाउक सकेसे? काय, दुनो खोदरा ने नी घसरदे?
40 चेला आपलो गुरुजी ले बड़े नोआय, मानतर जोन चेला पक्का सीखुआय, हुन आपलो गुरुजी चो कटार होयदे।
41 तुय आपलो भाई चो आंईक चो तिरीन के काय काजे दखसीस, आउर तुचो आंईकचेई किटकी के कसन ने धियान नी देयसीस?
42 तुय आपलो आंईक चो किटकी के खुदे नी दखसीस, तेबे आपलो भाई के कसन बलुक सकीस: ए भाई, ठेब, मय तुचो आंईक ले तिरीन के निकराउन देयंदे? ए कपटी, आगे आपलो आंईक ले किटकी के निकराव, तेबे आपलो भाई चो आंईक ने रलो तिरीन के नंगत दखुन निकराउक सकसे।
रूक आउर हुनचो फर
43 कोनी नंगत रूक ने अडरा फर नी धरे; आउर कोनी अडरा रूक ने नंगत फर नी धरे।
44 सपाय रूकमन के आपलो-आपलो फर ले चिताउक होयदे, कसनबलले लोग काटा-बुटामन ले अंजीर फर के, नोहले लाटा-बुटामन ले अंगुर फर नी टुटाओत।
45 भलई मनुक आपलो मन चो नंगत गदेया ले नंगत गोट निकराउआय; आउर अडरा मनुक आपलो मन चो अडरा गदेया ले अडरा गोट निकराउआय। कसनबलले जोन बले मन ने भोरलोर आसे, हुनी हुनचो टोंड ले निकरायसे।
कुड़िया बनातो दुयझन मनुक
46 तुमी मोचो गोट के नी मानास जाले, फेर काय काजे मोके ए परभु, ए परभु, बलासाहास?
47 जोन बले मोचो लगे एयसे आउर मोचो गोट के सुनुन भाति हुनके मानेसे, मय तुमके सांगेंसे कि हुन कोचो असन आय,
48 हुन, हुन मनुक चो असन आय जोन घर बनातो बेरा भुंय के गड़िया खोड़ुन बड़े-पकना उपरे पाया बनालो। जिदलदांय पूर ईली, तेबे पानी चो धार हुन घर ने ठटाय होली, मानतर हुनके हलाउक नी सकली, कसनबलले हुनके पक्का बरसक बनाउन रये।
49 मानतर जोन मनुक मोचो गोट के सुनुन हुनके नी मानुआय, हुन, हुन मनुक चो असन आय, जोन भुंय ने पाया नी खोड़ुन घर बनालो। जिदलदांय हुन घर ने पानी चो धार ठटाय होली, तेबे हुन तूरते भोसड़ुन ओदरली आउर नसट होली।