जीसु चो भाइगमानी बचन
5
जीसु भीड़ के दखुन डोंगरी ने चेगुन बसलो, तेबे चेलामन हुनचो लगे ईला।
2 जीसु हुनमन के सिखाउक मुरियालो आउर बललो:
3 “धन-धन आत, जोन आपलो मन के नानी करेसोत,
सरग राज उसने लोग चो आय।
4 धन-धन आत, जोन कलपेसोत,
कसनबलले हुनमन अस्तिर पावदे।
5 धन-धन आत, जोन सोज आत,
कसनबलले हुनमन मंजपुर चो हकदार होदे।
6 धन-धन आत, जोन सत-धरम काजे भूके पीयासे आसोत,
कसनबलले हुनमन चो मन भोरेदे।
7 धन-धन आत, जोन जीव दुखसोत,
कसनबलले हुनमन के बले जीव दुखदे।
8 धन-धन आत, जेचो मन सुद आसे,
कसनबलले हुनमन महापरभु के दखदे।
9 धन-धन आत, मिला-मिसा करु बीतामन,
कसनबलले महापरभु हुनमन के आपलो बेटा-बेटी बलेदे।
10 धन-धन आत, जोन सत-धरम चो किरता डाटा-टेवा सहसोत,
कसनबलले सरग राज हुनीमन चो आय।
11 मोचो किरता लोगमन तुमके बदी देउन, आउर फंद गोट बलुन तुमचो बिरुद ने सपाय बरन चो अडरा गोटमन बलुन डाटा-टेवा करलोने, तुमी धन-धन आहास।
12 तुमी हरिक-उदीम होआ, कसनबलले तुमचो काजे सरग ने बड़े इनाम आसे। असने ची तुमचो ले आगे ईलो अगमजानीमन के बले लोगमन डाटा-टेवा करते रला।”
लोन आउर दीया (उजर) चो कटाव
13 “तुमी मंजपुर चो लोन आहास; मानतर लोन चो सुवाद नसलोने, फेर हुनके काय ले खर बनाहासे? हुन पाछे काई काम चो नोआय, हुनके खोरे पकातो आउर लोगमन ले खुंदुन-मांडुन के छांडुन आउर काई काम नी देये।
14 तुमी संवसार चो उजर आहास। जोन सहर डोंगरी उपरे आसे, हुन लुकुक नी सके।
15 आउर लोग दीया बारुन पयली खाले नी मंडाओत, मानतर लामन ने ओरायसोत, तेबे घर चो सबु लोग के उजर पायसे।
16 एचई असन तुमचो उजर लोगमन पुरे चमको, कसनबलले लोगमन तुमचो नंगत बुता के दखुन तुमचो बुआ, जोन सरग ने आसे, हुनके सहराओत।”
धरम सिखिया चो पुरा होतोर
17 “ए नी समजा कि मय नियम-कानुनमन के नोहले अगमजानीमन चो सिखियामन के मेटाउकलाय ईलेसे, मेटाउकलाय नाई, मानतर पुरा करुकलाय ईलेसे।
18 कसनबलले मय तुमके सते बलेंसे, जिदलदांय ले बादरी आउर मंजपुर गुचुन नी जायदे, हुदलदांय ले नियम-कानुनमन ले गोटोक मातरा नोहले गोटोक टिकली बले पुरा नी होलोर नी मेटेदे।
19 एईकाजे जोन कोनी ए नानी ले नानी हुकुममन ले कोनी गोटोक के नी मानेसे, आउर लोगमन के बले उसनेची सिखायसे, हुनके सरग राज ने सपाय ले नानी बलदे; मानतर जोन कोनी सपाय हुकुममन के मानेसे आउर लोगमन के असने ची सिखायसे, हुनके सरग राज ने बड़े बलदे।
20 मय तुमके बलेंसे, धरम-पंडितमन आउर फरीसीमन ले आगर धरम-करम तुमी नी करलास जाले, केबई सरग राज ने जाउक नी सकासे।”
रीस आउर जीव धरतो चो गोट
21 “तुमी सुनलासाहास कि आगे जुग चो लोगमन ले बलुन रओत, ‘मोरते नी मारतोर आय’, आउर ‘जोन कोनी असन करेसे हुन कचरी ने डंड पावतो लाईक होयदे।’
22 मानतर मय तुमके बलेंसे, जोन मनुक आपलो भाई के रीस होयसे, हुन कचरी ने डंड पावतो लाईक होयदे, जोन मनुक आपलो भाई के काई काम चो नोआस बलेदे, हुन बड़े धरम मंडली ने डंड पावतो लाईक होयदे; आउर जोन आपलो भाई के ‘ए एरा’ बलेदे, हुन नरक-कुंड चो आईग ने डंड पावतो लाईक होयदे।
मिला-मिसा चो सिखिया
23 बेदी ने आपलो भेंट चेगातो बेरा, तुचो भाई चो मन ने तुचो काजे काई ईरका आसे बलुन तुके सूरता ईली जाले,
24 आपलो भेंट के बेदी पुरे मंडाउन देस, आउर आगे जाउन आपलो भाई संगे मिला-मिसा हो, पाछे एउन भेंट के चेगाव।
25 तुय आपलो मुदई संगे कचरी जातो बेरा बाटे ची मिला-मिसा हो, नोहले मुदई तुके नियावकारी के सोपुन देयदे, आउर नियावकारी तुके पाईकमन के सोपुन देयदे, आउर पाईकमन तुके जयल घरे ढाकदे।
26 मय तुके सते बलेंसे पाई-पाई भोरलो नोहलो तुय हुताले निकरुक नी सकसे।”
दुसर के आंईक लगातो चो गोट
27 “तुमी सपाय ए गोट सुनलासाहास, ‘तुमी बेबिचार नी करा’ बलते।
28 मानतर मय तुमके बलेंसे, कोनी मनुक कोनी बायले के अडरा नंजर ले दखेसे जाले, हुन आपलो मने हुनचो संगे दोस बुता करलो।
29 तुचो उजा आंईक तुके पाप करायसे जाले, हुनके निसकाउन पकाउन देस, असन करलोने तुचो गोटकी ची आंईक नसट होयसे आउर सपाय देहें नरक-कुंड जातो ले बाचेदे, तुचो काजे एई नंगत आय।
30 आउर तुचो उजा हाथ तुके पाप करायसे जाले, हुनके गोंदुन पकाउन देस, असन करलोने तुचो गोटकी ची हाथ नसट होयसे आउर सपाय देहें नरक-कुंड जातो ले बाचेदे आउर तुचो काजे एई नंगत आय।”
बायले-मनुक चो छांडा-छांडी होतो गोट
31 ए बले सांगलोर रये कि जोन कोनी आपलो बायले के छांडुक मन करेसे जाले, छांडा-छांडी होतो चिटी देओ।
32 “मानतर मय तुमके बलेंसे, जोन कोनी आपलो बायले के बेबिचार के छांडुन आउर कोनी दुसर बुता काजे छांडेसे जाले, हुन आपलो बायले के बेबिचार करायसे, आउर हुन छांडलो बायले के कोनी बिया होयसे जाले हुन बले बेबिचार करेसे।”
किरिया खातो चो गोट
33 “फेर तुमी आगे-जुग चो लोगमन ले सुनलासाहास, ‘फंद किरिया नी खाहा, मानतर महापरभु काजे खादलो किरिया के पुरा करा’ बलते।
34 मानतर मय तुमके सांगेंसे, सरग चो केबई किरिया नी खाहा; कसनबलले हुन महापरभु चो आसनगादी आय।
35 माटी* चो किरिया नी खाहा, कसनबलले हुन महापरभु चो पांय मंडातो पीड़ा आय, आउर जरूसलेम चो बले किरिया नी खाहा, कसनबलले हुन महाराजा चो सहर आय।
36 आपलो मुंड चो बले किरिया नी खाहा, कसनबलले तुय गोटोक चूंदी के बले करेया नोहले पंडरा करुक नी सकीस।
37 तुमचो गोट ‘हव’ चो ‘हव’ आउर ‘नाई’ चो ‘नाई’ होओ, कसनबलले जोन गोट एचोले आगर होयसे हुन सयतान बाटले होयसे।”
पलटा धरतो चो गोट
38 “तुमी सुनलासाहास आंईक चो पलटा आंईक आउर दात चो पलटा दात।
39 मानतर मय तुमके बलेंसे अडरा मनुक संगे तुमी नी जुजा, कोनी तुमके उजा गाल ने थापड़ मारलोने, तुचो डेबरी गाल के बले दखाव।
40 कोनी मनुक तुचो कुड़ता के ‘मोचो आय’ बलुन रपट करेसे जाले, तुचो कोट के बले नेउक देस।
41 आउर कोनी तुके, बोजा धरुन गोटोक मील संगे ‘जो’ बलुन हट करलोने, तुय हुनचो संगे दुय मील जा।
42 जोन कोनी तुके घन-घन मांगेसे, हुनके देउन देस आउर जोन कोनी तुचो ले उदार-बड़ी मांगेसे हुनके नीआय नी बल।”
बयरीमन के मया करतो चो गोट
43 “तुमी सुनलासाहास कि ‘आपलो घर लग चो लोगमन के मया करा, आउर आपलो बयरीमन के बईर करा।’
44 मानतर मय तुमके ए बलेंसे, आपलो बयरीमन के मया करा आउर तुमके डाटा-टेवा करतो लोगमन काजे पारथना करा,
45 जेचोले तुमी आपलो सरग बुआ चो पिला-झीलामन होआसे। कसनबलले महापरभु नंगत आउर अडरा दुनो लोगमन काजे बेर उदायसे, असने ची धरमकारी आउर ओधरमी दुनो काजे बरसा करेसे।
46 तुमी मया करतो लोगमन संगे ची मया करसाहास जाले, तुमके काय पुन मिरेदे? काय, पट्टी धरतो लोग बले असने ची नी करसोत?
47 तुमी आपलो भाईमन के ची जुहार करलोने, काय बड़े काम करसाहास? काय, बिजातीमन बले असन नी करसोत?
48 जसन तुमचो सरग चो बुआ समपुरन आय, उसने तुमके बले समपुरन बनतोर आय।”