दान देतो चो सिखिया
6
“दखा, चेत करुन राहा! तुमी लोगमन के दखातो काजे धरम बुता नी करा, नोहले तुमके सरग चो बुआ ले काई इनाम नी मिरेदे।
2 एईकाजे केबई बले दान करसे, तेबे लोगमन ले मान पावतो काजे नी कर, जसन कि कपटीमन, मंडली-घरमन ने आउर खोरे-डांडे करुआत, मय तुमके सते बलेंसे, हुनमन आपलो इनाम के पावला।
3 मानतर जिदलदांय तुय दान करसे, तुचो डेबरी हाथ नी जानो कि तुचो उजा हाथ काय करेसे बलते।
4 तुचो दान लुकाब ने रओ, तेबे तुचो सरग चो बुआ जोन लुकाब ने आसे, हुन लुकाब ने दखुन तुके इनाम देयदे।”
जीसु पारथना करुक सिखायसे
5 जिदलदांय तुय पारथना करसे, कपटीमन चो असन पारथना नी कर, कसनबलले लोगमन के दखातो काजे मंडली-घरमन ने आउर खोरे-डांडे पारथना करतोर हुनमन के नंगत लागुआय। मय तुमके सते बलेंसे, हुनमन आपलो इनाम के पावला।
6 मानतर जेबे तुय पारथना करसे, आपलो खोली ने जाउन कपाट ढाकुन पारथना कर। तेबे तुचो बुआ जोन सरग ने आसे, लुकाब ने दखुन इनाम देयदे।
7 पारथना करतो बेरा बिजातीमन असन टुबुर-टुबुर नी करा, हुनमन समजसोत कि जुगे गोट गोटेयालोने ची हुनमन चो पारथना सुनेदे।
8 तुमी हुनमन चो असन नी होआ, कसनबलले तुमचो बुआ, तुमचो मांगतोले आगे जाने, तुके काय चिपा आसे।
9 “तुमी पारथना असन बरन ले करा:
‘ए आमचो बुआ, तुय जोन सरग ने आसीस;
तुचो नाव पवितर मानुक होओ।
10 तुचो राज एओ।
जसन तुचो मन-इछा सरग ने पुरा होयसे, असने मंजपुर ने बले पुरा होओ।
11 दिनभर चो खादी-पीदी आजी आमके देस।
12 जसन बरन ले आमी आपलो कसूरदारमन के खेमा करलु,
उसने तुय बले आमचो सपाय कसूर के खेमा कर।
13 आमके जचई ने पड़ुक नी देस,
मानतर सयतान ले बचाव; कसनबलले राज, सकत आउर मयमा अमदेया तुचेई आय।’ आमीन।”
14 तुमी मनुकमन चो कसूर के खेमा करलोने, सरग चो बुआ बले तुमके खेमा करेदे।
15 मानतर तुमी मनुकमन चो कसूर के खेमा नी करलोने, सरग चो बुआ बले तुमचो कसूर के खेमा नी करेदे।
उपास रतोर
16 “केबई बले तुमी उपास करलोने, कपटीमन चो असन मुरुसनाय होउन नी राहा, कसनबलले हुनमन लोगमन के दखातो काजे मुरुसनाय होउन रयसोत, मय तुमके सते बलेंसे, हुनमन आपलो इनाम के पावलासे।
17 मानतर जिदलदांय तुय उपास करसे, तुचो मुंडे तेल घस आउर थमना धो,
18 जेचोले लोगमन के जान नी पड़ो कि तुय उपास करसीस, मानतर तुचो सरग चो बुआ जोन लुकाब ने आसे, लुकाब ने तुचो उपास के दखुन इनाम देयदे।”
19 “मंजपुर ने आपलो काजे धन रूंडा नी करा, जोन थाने कीड़ा खादे आउर कुमटुन नसुन जायदे, आउर चोरमन बले कुड़-काना करुन चोरेसोत।
20 मानतर आपलो काजे धन सरग ने रूंडा करा, जोन थाने कीड़ा नी खाये आउर नी कुमटे, आउर चोरमन कुड़-काना नी करोत आउर चोरोत बले नाई।
21 कसनबलले जोन थाने तुचो धन आसे, हुता तुचो मन बले रयदे।
22 देहें चो उजर आंईक आय: एईकाजे तुचो आंईक छुकनाय आसे जाले, तुचो जमाय देहें बले उजर होयदे।
23 मानतर तुचो आंईक अडरा होलोने, तुचो जमाय देहें बले अंधार होयदे; एईकाजे जोन उजर तुचोने आसे हुन अंधार होली जाले, हुन कितरो पिरिचनाय अंधार होयदे!
24 कोनी मनुक दुयझन मालिक चो सेवा करुक नी सके। कसनबलले हुन गोटोक के बईर आउर दुसर के मया करेदे बललोने, हुन गोटोक ले मिसुन रयदे आउर दुसर के तील इतलो बले नी पतेयाये। तुमी महापरभु आउर धन, दुनो चो सेवा करुक नी सकास।”
काली काजे फिकिर नी करा
25 मय तुमके बलेंसे, आपलो जीव काजे काय खाउंदे, आउर आपलो देहें काजे काय पीदुंदे बलुन फिकिर नी करा, काय जीव भात ले आउर देहें फटई ले बड़े नोआय?
26 बादरी उपरे उड़तो चड़ईमन के दखा! हुनमन पेरोत नाई, आउर काटोत नाई, आउर जुहाओत बले नाई; तेबले बले तुमचो सरग चो बुआ हुनमन के खुआयसे। काय तुमचो मान चड़ईमन ले आगर नोआय?
27 तुमीमन ले कोन असन मनुक आहास, जोन फिकिर करुन आपलो उमर के खिंडिक असन बले बड़ाउक सकास?
28 तुमी काय काजे फटई चो फिकिर करसाहास? रान चो फूलमन के दखुन-दखा कसन बाड़सोत; हुनमन मसागत करोत नाई, आउर गातोत बले नाई।
29 तेबले बले मय तुमके सांगेंसे, राजा सुलेमान बले आपलो सबु राजपाट बेरा केबई ए फूलमन असन सोभा ने नी रये।
30 ए खिंडिक पतेयातो लोगमन, भाटा चो रोंडा के जोन आजी आसे आउर काली के भाटी ने डसातोर होयदे, हुनके महापरभु सुंदर पिंदायसे जाले, तुमके कसन नी पींदायदे?
31 एईकाजे तुमी फिकिर नी करा काय खाउंदे, आउर काय पीदुंदे बलते।
32 कसनबलले बिजातीमन ए सपाय जाकमन के डगराते रउआत, मानतर तुमचो सरग चो बुआ जानेसे कि तुमके ए सपाय जाकमन होतोर आय।
33 एईकाजे आगे महापरभु चो राज आउर धरम के डगराहा, तेबे ए सबु जाकमन बले तुमके मिरेदे।
34 काली काजे फिकिर नी करा, काली चो दिन आपलो काजे खुदे फिकिर करेदे। आजी काजे, आजी चो दुख खुबे आय।