सपनियाह
आगे एक पढ़ा
ए किताप के सपनियाह अगमजानी ई.पू. 640-625 चो मंजी लिखलोसे। सपनियाह नाव चो अरथ, “जहोवा रखेया करु आय”। जहूदा राज ने, आमोन चो बेटा जोसियाह राजा, राज करतो समया ने, कूसी चो बेटा सपनियाह लगे जहोवा चो बचन अमरली।
ए किताप ने सपनियाह, जहूदा देस् चो इसराएलिमन के आउर राज-राज चो लोगमन के चेतानी देउन सांगेसे, “जहोवा चो नियाव चो दिन लगे अमरलीसे। हुन दिने, जहोवा, सपाय ओधरमीमन के डंड देयदे आउर बेबीलोन चो राजा नबूकदनेसर हुनमन के, कयद ने नेयदे। मानतर जहोवा आपलो बाछलो रयत के सूरता करेदे आउर हुनमन के अस्तिर चो बर देयदे।”
ए किताप चो खास गोट, जहोवा चो नियाव चो दिन चो बारे ने आय। जहोवा इसराएलिमन ले करलो बायदा किरता हुनमन के नी भूलके। हुन, इसराएलिमन चो बयरीमन ले पलटा धरेदे आउर आपलो रयत के जहूदा देस् ने बोहड़ाउन आनेदे। कसनबलले हुनमन जहोवा चो निज बाटा आत।
ए किताप के, तीन भाग ने बाटलोर आसे। पईल भाग: जरूसलेम चो नियाव चो बारे ने, अध्या 1:1–2:3; दुसर भाग: जरूसलेम आउर हुनचो भोंवरक चो देसमन के देतो डंड, अध्या 2:4–3:7; तीसर भाग: जरूसलेम आउर राज-राज चो लोगमन के मिरतो आसा, अध्या 3:8-20।