सपनियाह
1
जहूदा देस् ने आमोन चो बेटा राजा जोसियाह, राज करतो समया ने, सपनियाह लगे जहोवा चो बचन अमरली। सपनियाह, कूसी चो बेटा, गदल्याह चो नाती, अमरियाह चो पुती आउर हिजकियाह चो परपुती रये।महापरभु, जहूदा लोग चो नियाव करतोर
2 जहोवा असन बलेसे,
“मय मंजपुर चो सपाय के सत्यानास करेंदे।”
3 जहोवा बलेसे, “मय, सपाय मनुकमन के आउर जनावरमन के नास करेंदे,
मय बादरी ने उड़तो चड़ईमन
आउर समदूर चो मछरीमन के नास करेंदे
आउर दुसटमन के हकनाउन घसरायंदे,
मय नर-मंजा के मंजपुर ले मेटायंदे।
4 मय, जहूदा परघन आउर जरूसलेम सहर ने रतो
सपाय लोगमन चो बिरुद होउन डंड देयंदे,
हुता चो बाल देव चो बाचलो सपाय लोग के,
पुजारीमन संगे नास करुन हुनमन चो नाव के मेटायंदे।
5 आपलो घर छानी* उपरे चेगुन
बादरी चो बेर, जोन आउर तारामन चो डंडासरन करतो लोग,
जहोवा चो नाव ले किरिया खाउन
मोलेक देव चो डंडासरन करतो लोग,
6 जहोवा चो पाट धरुक छांडलो लोग
आउर जहोवा के नी डगरातो लोग,
ए सपाय के मय, सत्यानास करेंदे।”
7 तुमी सपाय, महापरभु जहोवा चो पुरे ओगाय राहा।
कसनबलले जहोवा नियाव करतो दिन लगे अमरलीसे
हुन जतरा* तियार करलोसे
आउर सगामन के सुद करलोसे।
8 हुन बलेसे, “मय जहोवा, जतरा चेगातो दिने
मुखियामन के, राजा चो बेटामन के
आउर परदेसियामन चो फटई* पींदतो सपाय लोग के डंड देयंदे।
9 हुन दिने, जोनमन देव-धामी चो सेवा करतो काजे मोचो मंदिर डेवना के नाहकुन जादे,
आउर लड़ई-झगड़ा आउर ठगा-फारसी ले मिरलो धन-माल के
आपलो मालिक चो घरे* भोरदे,
हुन सपाय के मय डंड देयंदे।”
10 जहोवा असन बलेसे,
“हुन दिने, जरूसलेम चो मछरी-कपाट लगे लोगमन किरकिरतोर
सहर चो नवा पारामन ने गागा-रोंआ होतोर
आउर डोंगरीमन ने घरमन भोसड़तोर सुना देयदे।
11 ए हाट-हड़रीमन ने रतो लोगमन, तुमी करलाहा।
कसनबलले सपाय बेपारीमन आउर
सोन-रूप चो बेपार करुमन मोरुन गेला।
12 हुन दिने मय, दीया बारुन जरूसलेम ने हुनमन के डगरायंदे
हुनमन, अंगुर-रस चो गाद† बसलो असन,
आपलो धन-दुगानी ने मत-बुल होउन
आपलाहान मन ने बलुआत, ‘जहोवा आमचो भला नोहले
अडरा नी करेदे’।
मय, हुन सपाय लोग के डंड देयंदे।
13 हुनमन चो धन-माल के खंगारमन झीकुन नेदे
आउर हुनमन चो घर-कुड़ियामन उजड़ुन जायदे,
हुनमन आपलो बनालो घरे
रउक नी सकदे,
आउर आपलो रोपलो अंगुर-पदरमन ले,
अंगुर-रस खाउक नी सकदे।”
नियाव चो दिन
14 जहोवा नियाव करतो दिन लगे अमरलीसे।
हुन दिन झपके एयसे।
हुन खुबे दुख-तकलीस चो दिन आय,
बीरमन कलपुन-कलपुन गागतो राग सुना देयसे।
15 हुन दिन, जहोवा चो जंजाल रीस चो दिन होयदे।
बिपती आउर दुख-तकलीस चो दिन,
उजड़तो आउर सत्यानास चो दिन
अंधार आउर पिरिचनाय अंधार चो दिन,
बादरी आउर करेया बादरी ढाकलो दिन होयदे।
16 हुन तोड़ी फूकतो आउर जुद होतो कोलार चो दिन होयदे।
हुन दिने बयरीमन, सहरमन चो बरसक भाड़ामन के
आउर डेंग-डेंग गुमटमन के भोसड़ादे।
17 जहोवा बलेसे, “मय सपाय लोगमन के बड़े भारी बिपती ने पाड़ेंदे।
हुनमन कानामन असन टामंडते हिंडदे,
कसनबलले हुनमन जहोवा चो बिरुद पाप करलासे।
हुनमन चो लोउ, पानी असन बोहेदे
आउर हुनमन चो मोड़ी भाटा ने पड़ुन कुयदे।
18 जहोवा चो रीस चो दिने
हुनमन सोन-रूप देउन बले
आपलो जीव बचाउक नी सकदे
कसनबलले हुनचो जंजाल रीस ले
जमाय मंजपुर लाकड़ी उलटेदे।
हुन, मंजपुर ने रतो सपाय लोगमन के
उधापड़े नास करेदे।”