जोना
चो किताप
आगे एके पढ़ा
जोना, अमितय चो बेटा रये, हुन जबूलून चो गथ-हेपेर सहर ले एउ रये। ए सहर एबे चो गलील परघन चो नासरत सहर लगे रली। जेचोले फरीसीमन चो ए गोट फंद होयसे कि गलील ले कोनी अगमजानी जनमुक नी सकोत। खुबे लोग असन बलुआत कि ए किताप के जोना ची लिखलोसे, कसनबलले ए किताप ने हुनचेई बारे ने लिखलोर आसे।
जोना चो किताप के बाईबल चो अगमगोट कितापमन संगे गनुआत, कसनबलले जोना चो जीवना आउर बुता, अगमगोट हिसाब ने जीसु चो मोरना, हुनके माटी देतोर, आउर हुनचो मोरलो थान ले जीव उठतो चो चीना आय। परभु जीसु बले तीन हार (मती 12:39-41; 16:4; लूका 11:29-32) जोना चो बारे ने गोटेयालोसे। जीसु बललो: “जोना जसन तीन रात-मंजन जल-जन्तुर चो पेटे रये, उसनेचे मय मनुक चो बेटा बले तीन रात-मंजन भुंय भीतरे रयंदे।” खुदे जीसु किरिस्त, जोना के पक्का अगमजानी आउर हुनचो लिखा के हक संगे महापरभु चो बचन मानुआय।
जोना चो किताप चो सिखियामन, एलिया आउर एलिसा अगमजानी चो सिखियामन असन आसे, जेचोले ए जानुक होयसे कि जोना बले हुनीमन चो कटार चो अगमजानी रलो। ए किताप ले जानुक होयसे कि महापरभु गुलाय संवसार ने राज करुआय।
ए किताप चो सबुले खास गोट ए आय कि महापरभु के ‘मया करु आउर दया करु’ चो रुप ने दखालासे, एता महापरभु आपलो रयत के ची नाई मानतर आपलो रयत चो बयरीमन के बले नास करतो पलटा खेमा करुन मुक्ति देउक मन करेसे। मानतर जोना, नीनावा चो लोगमन के महापरभु चो बचन सांगुक मन नी करते रये कसनबलले हुनमन इसराएलिमन चो बयरीमन रला।