ओबदियाह
जहोवा, एदोमीमन के डंड देतोर
1
ओबदियाह चो दरसन।जहोवा ले आमी*, एई खबर सुनलुसे,
एदोम देस् चो बारे ने सबुले सकत महापरभु जहोवा असन बलेसे:
“मय जहोवा, गोटोक दूत के जात-जात चो लोगमन के असन बलतो काजे पठालेसे:
‘उठा! आमी एदोम देस् चो बिरुद जुद करुक जाउं’।
2 मय तुमीमन के जात-जात चो लोगमन ले नानी करेंदे,
आउर सपाय लोग तुमके खुबे घिनियादे।
3 ए एदोमीमन, तुमी बड़े डोंगरीमन उपरे भाड़ा भीतरे रउआहास
तुमी तो डेंग ठानमन ने रउआहास,
आउर मने-मने बलुआहास,
‘आमके कोन भुंये घसराउक सकेदे’?
मानतर तुमचो गुमान तुमके धोका दिली।
4 तुमी सारंया असन कितलेई उपरे उड़ते रले बले,
तुमी तारामन चो मंजारे आपलो गूड़ा बनाले बले,
मय हुताले तुमके भुंये घसरायंदे।”
जहोवा असन बलेसे।
5 “ए एदोम, काय, तुमचो घरे राती बेरा
चोरमन, चोरुक ईला जाले,
हुनमन आपलो मन भावतो तीजमन के ची नी चोरता?
काय, अंगुर टुटाउमन तुमचो लगे ईला जाले,
हुनमन पुइतनाय अंगुरमन के टुटाता?
मानतर हाय, तुमके कसन मेटाउन दिला!
6 बयरीमन, एसाव थरलर*† चो पुइतनाय धन-माल के झीका-उड़मा करला
आउर हुनमन चो जमाय लुकालो तीजमन के चरचरा करला!
7 तुमचो संगे साहरा करतो किरिया करलो सपाय राजामन तुमचो बिरुद होउन,
तुमके आपलो देस् ले खेददे,
तुमचो मीतमन, तुमके धोका देदे,
आउर जोनमन तुमचो संगे रोटी खादला, हुनमन तुमचो काजे फांदा मंडादे
आउर एदांय बलदे, ‘हुनके काई समज नी आय’।”
8 जहोवा असन बलेसे,
“हुदलीदांय मय, एदोम थानो बुद बितामन के नास करायंदे
आउर एसाव डोंगरीमन ने रतो एदोमीमन चो समज के मेटायंदे।
9 ए तेमान* चो लोगमन, तुमचो बीरमन डराहा होदे,
तेबे तुमचो बयरीमन, बड़े डोंगरीमन ने रतो सपाय एदोमीमन के नास करदे।”
एदोमीमन चो ओधरम बुतामन
10 ए एदोमीमन, आपलो भाई जाकूब चो थरलर संगे उबढंगरी बुता करलो किरता
तुमी खुबे लाज पड़ासे,
आउर तुमचो लोग अमदेया काजे नास होदे।
11 जोन दिने परगायामन एउन,
हुनमन चो धन-माल के झीकुन नीला
आउर परदेसियामन, हुनमन चो डेवना ने ओलुन
जरूसलेम काजे चिटी पकाला,
हुन दिने, तुमी बले हुनीमन संगे गोटोक रलास।
12 मानतर तुमी, आपलो भाई गराहां ने पड़लोके दखुन,
हुन दिने हरिक ने रतोर नी बने।
जहूदा चो लोग सत्यानास होलो दिने
तुमके हरिक-उदीम मनातोर नी बने।
हुनमन दुख-डंड ने रलो दिने
हुनमन चो हांसी-खेली करतोर नी बने।
13 मोचो रयत बिपती ने पड़लो दिने,
तुमी हुनमन चो डेवना ने नी ओलतोर रये
जहूदा उपरे बिपती ईलो दिने,
हुनमन सत्यानास होतोके दखुन “नंगत होली, नंगत होली,” नी बलतोर रये,
हुनमन बिपती ने पड़लो दिने
हुनमन चो धन-माल के झीका-उड़मा नी करतोर रये।
14 हुनमन जीव बचाउन परातो बेरा,
जोड़ानमन ने घत ने रउन हुनमन के मोरते मारतोर नी रये
नोहले हुनमन दुख-डंड ने रलो दिने,
बाचलो लोग के बयरीमन चो हाथे नी सोपतोर रये।
महापरभु, जात-जात चो लोगमन के नियाव करेदे
15 “सपाय जात-जात चो लोगमन काजे जहोवा चो नियाव चो दिन लगे अमरलीसे
जसन तुमी करलासाहास, तुमी बले उसने भुगतासे,
तुमचो अडरा बेबार बोहड़ुन, तुमचेई मुंडे पड़ेदे।
16 जसन मय पवितर डोंगरी ने, मोचो रीस चो डंड तुमके भुगताले,
उसने ची सपाय जात-जात चो लोगमन अमदेया मोचो रीस चो डंड भुगते रदे,
हुनमन सुयकुन-सुयकुन डंड भुगदते रदे
आउर असन सत्यानास होउन जादे, हुनमन चो काई चीना-बाना बले नी रयदे।
इसराएलिमन चो जीत
17 मानतर सियोन डोंगरी ने रतो लोग बाचदे
आउर सियोन डोंगरी, जहोवा काजे पवितर ठान होयदे
आउर जाकूब चो थर-लर, आपलो निंज-बाटा चो हकदार होदे।
18 हुन दिने, जाकूब* चो थर-लर आईग असन
आउर जूसुफ* चो थरलर भड़-भड़तो आईग* असन
आउर एसाव चो थरलर सुकलो रोंडा असन होदे।
हुनमन आईग धरादे आउर एसाव चो थरलर लाकड़ी उलटेदे
आउर एसाव चो थरलर ले कोनी नी बाचदे।”
जहोवा असन बलेसे।
19 बेर-उदिया उजा बाट चो लोग, एसाव डोंगरीमन चो हकदार होदे
आउर डोंगरी घाट ने रतो लोग, जहूदा चो बेर-बुड़ती बाट चो पलिस्तीमन चो परघनमन, आउर बेर-उदिया डेबरी बाट चो एपरेम आउर सामरिया चो हकदार होदे
आउर बिनयामीन चो थर-लर
गिलाद चो हकदार होदे।
20 कयद ले बोहड़ुन, कनान देस् ने रलो इसराएलिमन,
सारपत सहर लगले आपलो हक ने करदे;
आउर जरूसलेम ले कयद होउन सपाराद ने रतो लोग,
बेर-उदिया उजा बाट चो सहरमन चो हकदार होदे।
21 महापरभु बचालो लोग, जरूसलेम ने सियोन डोंगरी उपरे चेगदे,
आउर हुनमन, एसाव डोंगरीमन उपरे राज करदे
आउर हुनचो राजा, जहोवा होयदे।