ओबदियाह
आगे एके पढ़ा
ए किताप के ओबदियाह अगमजानी लिखलोसे। ओबदियाह नाव चो अरथ, जहोवा चो मयमा करु, आय। पवितर सास्तर चो कोनी दुसर किताप ने, ओबदियाह चो बारे ने, नी लिखलोर आसे। ओबदियाह, जुना नियम चो कितापमन ले सबुले नानी किताप आय।
ए किताप के ई.पु 586, जरूसलेम बिपती ने पड़लो पाछे, लिखुन रला। ओबदियाह लगे महापरभु चो बचन ईली, महापरभु एदोमीमन के सत्यानास करुक मन करेसे। जहूदा चो बयरी एदोम, बेर-उदिया उजा बाटे रये। जरूसलेम बिपती ने पड़लोके दखुन, एदोमीमन हरिक-उदीम मनाला आउर जहूदा सहर चो झीका-उड़मा करला। एदोमीमन, जहूदा चो बयरीमन संगे मिसुन हुनमन के साहरा करला। इसराएलिमन, मिसर देस् ले कनान देस् जातो बेरा (गनती 20:14-21), एदोमीमन हुनमन के आपलो संद ले जाउक नी दिला आउर हुनमन संगे अडरा बुता करते ची रला। एईकाजे महापरभु, एदोमीमन के बलेसे, हुनमन इसराएलिमन उपरे दया दखातोर रली।
ओबदियाह चो ए किताप ने महापरभु बलेसे, एदोमीमन, इसराएल संगे भलई करतो पलटा अडरा बुता करलो किरता महापरभु एदोम के डंड देयदे ची। एदोम चो नियाव आउर जहूदा के जतनातो गोटमन ए किताप ने लिखलोर आसे।