महापरभु, इसराएलिमन चो नियाव करतोर
9
मय, जहोवा के बेदी लगे उबलोर दखले। हुन बललो,“मंदिर चो बेदी लग चो खमामन चो टीप ने ठेचा कि हुनमन चो पाया हलो
आउर हुनमन लोगमन चो मुंडे घसरो।
हुनचोले बाचलो लोग के मय खांडा ले मोरायंदे।
हुनमन ले कोनी पराउक नी सकदे
आउर कोनी बाचुक बले नी सकदे।
2 हुनमन भुंय के गड़िया खोड़ुन पतालपुरे गेले
मय हाथ लमाउन हुताले हुनमन के निकरायंदे।
नोहले हुनमन बादरी ने चेगले
मय हुनमन के हुताले खाले उतरायंदे
3 हुनमन करमेल डोंगरी उपरे लुकुन रले बले
मय हुनमन के हुताले डगराउन निकरायंदे
हुनमन मोचोले पुरे ले जाउन समदूर चो गड़िया ठाने लुकुन रले
मय साप के हुकुम देउन हुनमन के चबायंदे।
4 हुनमन के बयरीमन बांधुन नीले बले,
मय हुकुम देउन हुनमन के खांडा ले मोरायंदे
मय हुनमन के भलई करतो काजे नाई
मानतर नोकसान करतो काजे ची दखते रयंदे।”
5 सेनामन चो महापरभु जहोवा छिंवलोने,
मंजपुर थर-थरेदे
आउर हुता रतो सपाय लोग करलानी होदे
आउर हुनमन सपाय, मिसर देस् चो नील नंदी चो पुर-पानी असन
लेहरा ने उदल-झटक होयदे।
6 महापरभु जहोवा, उपरपुर ने आपलो काजे माहाल बनायसे
हुनचो पाया मंजपुर उपरे टेकलीसे
हुन, समदूर चो पानी के हागदेउन
मंजपुर ने बरसा करायसे
हुनचेई नाव जहोवा आय।
7 जहोवा असन बलेसे, “ए इसराएलिमन,
काय, तुमी मोचो काजे कूसीमन असन नोआहास?
काय मय, इसराएलिमन के, मिसर देस् ले,
आउर पलिस्तीमन के, कपतोर ले आउर अरामीमन के, कीर ले निकराउन नी आनले?
8 दखा, महापरभु जहोवा, ए पाप करतो इसराएल राज के दखेसे आउर बलेसे
मय मंजपुर ले हुनमन के सत्यानास करेंदे
मानतर जाकूब कुटुम चो आदो लोग के बचायंदे।”
जहोवा असन बलेसे।
9 “मोचो हुकुम ले, जात-जात चो लोगमन मंजी
इसराएली कुटुममन के असन चोलेंदे
जसन कोनी चोलन ने अरन के चोलुआत
जेचोले, काई कचरा नी बाचेदे।
10 मानतर जोन पापी रयतमन असन बलसोत, ‘आमी अडरा बुता ले लापी रउंसे’।
हुनमन सपाय के खांडा ले मोरते मारेंदे।”
इसराएल के फेर ले बनातोर
11 जहोवा बलेसे, “हुन दिने मय, दाउद चो भोसड़लो घर के
फेर ले बनायंदे
आउर हुनचो भोसड़लो भितीमन के जतनायंदे
हुनचो घर के आगे चो असन
फेर ले बनायंदे।
12 तेबे दाउद चो थरलर, बाचलो एदोमीमन के आउर जात-जात चो लोगमन के, आपलो देस् ले खेदुन
मोचो नाव धरतो लोगमन चो हक ने करदे।”
जहोवा सांगलो गोटमन के, पुरा करेदे ची।
13 जहोवा असन बलेसे,
“दखा, हुन दिन एयसे, धान काटते-काटते, नांगर फांदतो समया होयदे।
आउर लोगमन अंगुर-रस पेरते-पेरते, अंगुर-बुटा रोपतो समया होयदे
सपाय डोंगरीमन अंगुर-पदरमन ले भोरेदे
आउर डोंगरीमन ले नवा अंगुर-रस थिपेदे।
14 मय आपलो इसराएली रयतमन के कयद ले बोहड़ाउन आनेंदे
आउर हुनमन जत-खत होलो सहरमन के जतनाउन हुता रदे,
आउर अंगुर-पदरमन बनाउन अंगुर रस खादे
आउर पदरमन बनाउन फर खादे।
15 मय आपलो लोग के हुनमनचेई भुंये बसापत करायंदे
फेर केबई हुनमन के, हुन थान ले कोनी गुचाउक नी सकदे
जेके मय हुनमन के दिलेसे।”
जहोवा असन बलेसे।