टुकनी भोरते फरमन चो दरसन
8
महापरभु जहोवा मोके, टुकनी भोरते जेट बेरा चो फरमन के दखालो, 2 हुन पुछलो, “ए आमोस, तुके काय दखा देयसे?” मय बलले, “गोटोक टुकनी भर पाकलो फरमन।” तेबे जहोवा मोके बललो,“एदांय मोचो रयत इसराएल चो समया, सरली*;
एदांय मय हुनमन के नी छांडे, डंड देयंदे ची।
3 हुन दिने, मंदिर ने गावतो गीत, करलानी गीत होयदे,”
जहोवा असन बलेसे,
“खुबे लोगमन मोरदे, आउर खुसनाय मोड़ीमन के कुड़ा-कुड़ा
सपाय बाटे पकाउन देदे!”
इसराएल चो सत्यानास
4 “मोचो गोट सुना, तुमी देस् चो नानागती होलो लोगमन के डाटा-टेवा
आउर गरीब-दुखीमन के सत्यानास करुक मन करसाहास,
5 आउर बलसास, नवा-जोन तिहार केबे सरुआय बे,
कि आमके अरन बीकुक होती
आउर बिसातो दिन केबे सरेदे
आमी गउं बिकुक आनतु।
तुमी अरन बिकतोदांय सोली-पयली के नानी
आउर किलो-काटा के आगर-घाट करुन घेनतो लोग के ठगुआहास।
6 गरीब लोग के रुपया काजे
आउर नानागती लोग के गोटोक जोड़ी पनई काजे घेनुआहास
आउर भुंये घसरलो कचरा संग चो गउं के बले बिकुआहास।”
7 जहोवा, जोन जाकूब* चो गुमान आय, हुन किरिया खाउन बलेसे:
“मय हुनमन चो करलो बुता के केबई नी भूलके।
8 हुन बुता किरता सपाय भुंय थर-थरेदे
हुता रतो लोगमन करलानी होते रदे
हुनमन सपाय, मिसर देस् चो नील नंदी चो पुर-पानी असन
लेहरा ने उदल-झटक होयदे।”
9 महापरभु जहोवा असन बलेसे,
“हुन दिने मय, मुंडे-बेरा बेर बसायंदे
तेबे मंजपुर ने अंधार ढाकेदे।
10 मय तुमचो तिहार दिनमन के करलातो दिन बनायंदे
तुमचो गावतो गीतमन करलानी गीतमन होयदे
मय तुमचो करांडे पोता पींदायदे
तुमके टांगरा करायंदे
एकलाय बेटा काजे करलानी होतो दिन असन
हुन दिनमन चो सरासरी कटलाउक नी सकतो असन बनायंदे।”
11 जहोवा असन बलेसे, “दखा, हुन दिनमन एयसे,
जेबे मय देस् ने भूक पड़ायंदे,
लोगमन रोटी आउर पानी काजे नाई
मानतर जहोवा चो बचन सुनतो काजे भूक-पियास ने रदे।
12 लोगमन, जहोवा चो बचन सुनतो काजे
गोटोक समदूर ले दुसर समदूर
आउर बेर-उदिया डेबरी बाटले, बेर-उदिया बाटे डगराते बुलदे
मानतर हुनके नी मिरादे।”
13 “हुनी दिने, सुंदरी लेकीमन आउर बरसक जुवानमन
भूक-पियास काजे मुछियादे।
14 जोनमन सामरिया चो दोख किरता किरिया खाउन बलुआत
‘दान चो देव किरिया’
आउर ‘बेरसेबा चो धरम-बाट किरिया’,
हुनमन घसरदे आउर फेर केबई नी उठदे।”