थापामन चो दरसन दखतोर
7
महापरभु जहोवा मोके असन दरसन दखालो, दखा, राजा के अरन चो बाटा दिलो पाछे चो जेटाहा उबज चो खेड़मन ने सेंगरीमन धरुक मुरियालोदांय, हुनमन के नसातो काजे महापरभु गोटोक थापा गोहड़ी के पठालो। 2 जेबे थापामन हुता चो सपाय उबज के कतरुन नसाला, तेबे मय जहोवा महापरभु के बलले,“ए जहोवा महापरभु, मय गुहारेंसे, तुय आमके खेमा कर!
जाकूब*, खुबे निमल आय†,
हुन कसन ने ए डंड के भोगुक सकेदे!”
3 असन बलतोके जहोवा खिसियालो
आउर बललो, “एदांय असन नी होयदे।”
आईग चो दरसन दखतोर
4 जहोवा महापरभु, मोके असन दरसन दखालो: जहोवा, लोग के डंड देतो काजे आईग चो बरसा के हागदेयसे आउर हुन आईग, गड़िया समदूर के सुकाली आउर भुंय के लाकड़ी उलटाली। 5 तेबे मय बलले,
“ए जहोवा महापरभु, मय गुहारेंसे, तुय असन नी कर!
जाकूब चो थरलर खुबे नानी आय
हुन कसन ने ए डंड के भोगुक सकदे!”
6 असन बलतोके, जहोवा खिसियालो,
आउर बललो, “एदांय असन नी होयदे।”
गोली-डोरी चो दरसन दखतोर
7 जहोवा महापरभु, मोके असन दरसन दखालो। जहोवा, गोटोक भिती लगे उबा रये। हुनचो हाथे गोटोक गोली-डोरी रये। 8 महापरभु मोके पुछलो, ए आमोस, तुके काय दखा देयसे? तेबे मय बलले, गोली-डोरी। तेबे जहोवा बललो,
दख, मय गोटोक गोली-डोरी
आपलो इसराएली रयतमन मंजी लगायंसे
जेचोले हुनमन जानदे, हुनमन कितलो अडरा आसोत, मय हुनमन के डंड देयंदे ची।
9 इसहाक थरलर डंडासरन करतो डेंग ठानमन* सत्यानास होयदे,
आउर इसराएल चो पवितर ठानमन भोसड़ेदे,
आउर मय, जरोबाम चो कुटुम के खांडा ले मारेंदे।
अगमजानी आमोस आउर पुजारी अमस्याह
10 बेतेल चो पुजारी अमस्याह, इसराएल चो जरोबाम राजा लगे खबर पठालो, “आमोस, इसराएलिमन चो मंजी तुचो बिरुद उआट करेसे। हुनचो गोटमन सुनुन एता चो लोगमन खुबे बाय-बिकाल होयसोत। 11 कसनबलले आमोस बललो,
‘जरोबाम के खांडा ले मारदे,
आउर इसराएल के
आपलो देस् ले बांधुन नेदे’।”
12 तेबे अमस्याह पुजारी, आमोस के बललो, ए दरसन दखु बीता, एताले निकरुन जहूदा राज ने जा, हुताय कमाउन खा आउर हुताय अगमगोट सांग। 13 मानतर बेतेल ने फेर केबई अगमगोटमन नी सांग। कसनबलले, ए राजा डंडासरन करतो ठान आउर राज चो पवितर ठान आय।
14 तेबे आमोस, अमस्याह के बललो, “मय अगमजानी नोआंय आउर अगमजानी चो बेटा बले नोआंय। मय तो छेरी-मेंडी चरातो धोरई आउर डूमर रूकमन चो दखा-राखा करुआंय। 15 जहोवा मोके छेरी-मेंडी चरातो थान ले हागदेउन बललो, ‘जा, मोचो इसराएली रयतमन के अगमगोट सांग’।”
16 एईकाजे एदांय तुय जहोवा चो गोट के सुन।
“तुय बलसीस, ‘इसराएल चो बिरुद अगमगोट नी सांग
आउर इसहाक चो कुटुम चो बिरुद काई गोट नी सांग’।”
17 एईकाजे जहोवा असन बलेसे,
“तुचो बायले सहर ने गोटोक बेसवा होयदे
आउर तुचो बेटा-बेटीमन के खांडा ले मारदे,
आउर दुसर लोगमन तुचो भुंय बाटा के नापा-जोका करुन धरदे,
आउर तुय बिजातीमन चो देस् बललोने, असुद देस् ने मोरसे,
आउर इसराएलिमन के आपलो देस् ले बांदुन लापी देस् ने नेदे।”