जोएल
आगे एके पढ़ा
ए किताप के पतूएल चो बेटा जोएल अगमजानी ई.पु 760-700 चो मंजी ने लिखलोसे। जोएल नाव चो अरथ, “जहोवा, महापरभु आय”। जोएल अगमजानी चो समया ने, हुता कोन राजा राज करते रलो, एचो बारे ने नी लिखलोर आसे। हुन, बेत-हारान गांव चो आय। हुन गांव, लोन समदूर चो हुन पाट, रूबेन बंस आउर गाद बंस चो संद ने रये।
जोएल अगमजानी ए किताप ने लिखलोसे, इसराएल देस् ने थापामन एउन हुता चो बेड़ा-खाड़ा आउर बाड़ी-खिड़ी चो सपाय उबज के खाउन सत्यानास करला। तेबे हुता खुबे भूक पड़ली आउर लोगमन लगे महापरभु के भेंट चेगातो काजे काई नी बाचली। एईकाजे जोएल हुता चो लोगमन के सांगेसे कि हुनमन दयाकरु महापरभु ले गुहारोत आउर सपाय लोग, मन बोहड़ाउन धारनिक बनोत। (मानतर कोनी-कोनी धरम-पंडितमन सांगसोत, ए जहोवा चो नियाव चो दिन बललोने, जहोवा संवसार चो सपाय लोगमन के नियाव करेदे आउर मंजपुर के अस्तिर करेदे। उबज के सत्यानास करतो थापामन, बयरी-सेनामन आत।)
ए किताप ने जोएल इसराएलिमन के उकसायसे, दुख दखातो काजे फटई चीरुन नाई, मानतर लोगमन आपलो पाप के मानुन सत-मन ले महापरभु पुरे बोहड़ुन ईआ। तेबे जहोवा फेर ले आपलो लोग के जीव दुखेदे आउर हुनमन के बसापत कराउन बर देयदे।