जोएल
1
जहोवा, पतूएल चो बेटा जोएल के दरसन ने दखालो बचन ए आय:थापामन उबज के सत्यानास करतोर
2 ए सपाय सियानमन सुना,
ए देस् ने रतो सपाय लोगमन, कान डेरुन सुना!
काय, तुमचो समया ने
नोहले तुमचो पुरखामन चो समया ने केबई असन गोट होलीसे?
3 तुमी आपलो पिलामन के ए गोटमन चो बारे ने सांगा,
आउर तुमचो पिलामन, आपलो पिलामन के,
आउर फेर हुनमन चो पिलामन एतो पीड़ीमन के सांगोत।
4 सुना! कतरतो थापामन खाउन छांडलो बिती के
पाटकी बीती थापामन खादली,
आउर पाटकी बीती थापामन खाउन छांडलो बिती के
डगातो थापामन खादली
आउर डगातो थापामन खाउन छांडलो बिती के
रेंगतो थापामन* खादली।
5 ए मंदाहामन, चेता आउर गागा;
ए सपाय मंद-सूर खाउमन,
नवा मंद काजे गागा:
सपाय अंगुर-पदर नसलीसे, एदांय ले तुमके मंद खाउक नी मिरे।
6 दखा! थापा-गोहड़ी, सेना असन मोचो देस् उपरे चड़ाई करली,
हुनमन गनुक नी सकतो इतलो खुबे बल बिती बीरमन असन रला,
हुनमन चो दात बीजापुलिया-बाग चो असन
आउर किसा-दातमन, बीजापुलिया-बागिन चो असन आय।
7 हुनमन मोचो अंगुर-डीरामन चो खंदामन के झीक-उड़म करला,
आउर मोचो अंजीर रूकमन के नसाला,
हुनमन हुनचो सपाय छाली के छोलुन घसराला,
आउर छाली छोललो किरता खंदामन पंडरी होली।
8 जसन जुवान बायले पोता ओड़ुन
आपलो मोरलो मनुक काजे करलायसे, उसने तुमी बले करलाहा।
9 जहोवा चो मंदिर ने
अरन-जतरा नोहले पीदी-जतरा
चेगातो काजे कोनी नी एयसोत,
एईकाजे मंदिर ने सेवाकरु पुजारीमन गागसोत।
10 बेड़ा सुकली,
भुंय गागेसे,
अरन सत्यानास होली,
अंगुर-मंद बनातो काजे अंगुर नी आय,
तेल बले सरली।
11 ए खेतियारमन, लाज होआ,
ए अंगुर-पदर चो मालीमन खिसियाहा,
गउं आउर जोंदरी काजे करलाहा,
कसनबलले बेड़ा-खाड़ा चो अरन सत्यानास होलीसे।
12 अंगुर-डीरामन कुमचुन गेली
आउर अंजीर रूकमन ने लाक बसली,
अनार रूक, खजूर रूक आउर सेब रूक_
भाटा चो सपाय रूकमन सुकली,
सते, एदांय मनुकमन चो
हरिक बले गेली।
पसतावा आउर पारथना काजे हागदेतोर
13 ए पुजारीमन, पोता ओड़ुन छाती पेटुन-पेटुन गागा,
ए बेदी चो सेवा-बुता करुमन करलाहा,
ए महापरभु चो सेवा करुमन
पोता ओड़ुन गुलाय राती गागा।
तुमचो महापरभु चो मंदिर ने
अरन-जतरा नोहले पीदी-जतरा चेगातो काजे कोनी नी एओत।
14 पवितर उपास चो दिन मानतो काजे सुनाहा,
बड़े मंडली ने सपाय के हागदिया।
देस् चो सियानमन के
आउर जहूदा देस् ने रतो सपाय लोगमन के
महापरभु चो मंदिर ने रूंडाहा
आउर महापरभु चो पुरे खिसियाउन सत-मन ले गुहारा।
15 महापरभु चो नियाव चो दिन लगे आसे
हुन दिन बड़े बिपती चो दिन होयदे!
कसनबलले सबुले सकत महापरभु बाटले सत्यानास करतो दिन एयसे।
16 काय, आमी दखु-दखु
खातो जिनीसमन नी नसली?
सते, आमचो महापरभु चो मंदिर ले
हरिक-उदीम गेली।
17 बीच के ढेलामन चेपाली
तेबे हुन नी अखरली।
गदेया ने अरन मेलाय होली,
कसनबलले बेड़ा-खाड़ामन के थापामन सत्यानास करला।
18 काय काजे जनावरमन नरेयायसोत
आउर गाय-बयलामन जत-खत होला?
कसनबलले हुनमन काजे चारा नीआय,
सपाय गोठानमन चो छेरी-मेंडी गोहड़ी बले पाप चो डंड भुगतसोत।
19 ए जहोवा, मय तुके गुहारेंसे,
छीड़ा-ठान चो चारा-भाटामन ने
आईग डसली,
आईग ले भाटा चो सपाय रूकमन बले
लाकड़ी उलटली।
20 रान-जियादमन बले तुचो काजे कलपडाहा होयसोत,
कसनबलले पजरामन सुकली
आउर छीड़ा-ठान चो चारा-भाटामन के बले
आईग डसली।