दानिएल
चो किताप
आगे एके पढ़ा
दानिएल चो किताप के असन समया ने लिखला, जिदलदांय देव-धामी के मानतो राजामन, जहूदीमन के खुबे डरा-धमका आउर डाटा-टेवा करते रओत। ए किताप के दानिएल नाव चो जहूदी, ई.पु 530 चो बेरा ने लिखुन रये बलुआत। दानिएल चो किताप चो 1:1-2:4 आउर 8:1-12:13 अध्यायमन चो भाग इबरानी ने लिखलोर आसे आउर 2:4b ले धरुन 7:28 चो भाग के अरामी भासा ने लिखलोर आसे। पवितर सास्तर चो पंडितमन अध्या 11 ने लिखलो जुद चो बारे ने, बेर उदिया उजा बाट चो राज- मिसर देस् आउर बेर उदिया डेबरी बाट चो राज- सीरिया देस् आय बलुआत।
बेबिलोन चो राजा, दानिएल आउर हुनचो संगवारीमन के जहूदा राज ले कयद करुन आपलो देस् ने आनुन रये। पाछे, महापरभु बाटले दानिएल के खुबे बुद-गियान मिरलोके राज-माहाल ने बड़े-पन मिरली। दानिएल चो अरथ आय: महापरभु मोचो नियावकारु। हुन अमदेया महापरभु चो पतेयातो लाईक रये। एईकाजे हुनके बीजापुलिया-बागमन चो करपन ने पकाला। तेबले बले हुन बिसवास ले पाटे नी गुचलो। कोनी-कोनी दानिएल के अगमजानी मानुआत। महापरभु हुनके दखालो दरसनमन हिसाब ले हुन, दुसर-दुसर राजामन उपरे एतो बिपतीमन आउर एतो नवा बड़े राज चो बारे ने सांगते रये।
दानिएल चो किताप ने दुय ठन असन खबर चो बारे ने सांगेसे, जोन जुड़ुन भाति बले अलगलीसे। हुनमन ले गोटोक खबर ने नियाव आउर बिजातीमन के सरासरी हार हरातो बारे ने आसे, जोनमन चो मुखिया, नबूकदनेसर, बेलससर, दारा आउर छयरस रला। दुसर खबर ने महापरभु चो डाटा-टेवा होलो लोग जोनमन खास पवितर आउर इबरानी रला हुनमन काजे आसा आउर मुक्ति चो बारे ने आसे।
ए किताप चो दुय भाग आसे: पईल भाग अध्या 1-6, दानिएल आउर हुनचो संगवारीमन चो बारे ने आउर दुसर भाग अध्या 7-12, दानिएल दखलो सपना-दरसनमन चो बारे ने आसे।