लमूएल राजा चो सला
31
मस्सा देस् चो लमूएल राजा चो बचन, हुनचो आया हुनके सिखालो नीतिबचन:2 ए मोचो बेटा, मय नंगत होलो बेटा!
ए मोचो बोदना चो बेटा, धियान ले सुन!
3 आपलो सकत, बायलेमन के देउन नी नसाव,
जोनमन राजामन के नसाउआत।
4 ए लमूएल, अंगुर-मंद राजामन काजे नोआय,
काई बरन चो मंद-सूर खातोर राजामन के नी फोबे,
आउर मंद खातोर राजपालमन के नी फोबे;
5 नोहले हुनमन नियम-कानुन के भूलकुन जादे,
आउर बिपती ने पड़लो लोग संगे ओनियाव करदे।
6 मोरतो लोग के मंद-सूर खुआव,
मुरमुरा होलो लोग के अंगुर-रस खुआव;
7 जेके खाउन हुनमन आपलो गरीबी के भुलकोत,
आउर आपलो दुख तकलीस के सूरता नी करोत।
8 आपलो हक मांगुक नी सकतो लोग काजे,
आउर पोरटा-पोसरमन चो नियाव काजे गोटेयाव।
9 हुनमन काजे गोटेयाव, सत-नियाव कर,
सपाय गरीब-धुरीब आउर नानागती होलो लोगमन चो सत नियाव कर।
मान पावलो बायले
10 धारनिक बायले कोके मिरुक सके?
हुनचो मोल, मनी-मुकतामन ले बले आगर माहांग आय।
11 हुनचो मनुक, हुनचो उपरे भोरसा करेसे,
आउर हुनके नफा ची होयसे।
12 हुन आपलो जीवता जीव भर,
आपलो मनुक संगे अडरा नाई, मानतर नंगत बेबार करुआय।
13 हुन ऊन आउर सूत डगरायसे,
आउर हरिक ले आपलो हाथ ले फटई बनायसे।
14 बेपारीमन चो जाहाज असन,
हुन, लापी ले खादी-पीदी आनेसे।
15 हुन अंधार-अंधार ने उठेसे,
आउर आपलो घर-लोग काजे खादी-पीदी बनायसे
आउर आपलो कमेयीनमन के हुकुम देयसे।
16 हुन बेड़ा-खाड़ा के नंगत ले जाचुन घेनेसे,
आउर आपलो कमई ले अंगुर-पदर रोपेसे।
17 हुन आपलो करांड के चमकट करेसे,
आउर आपलो बांहामन के बरसक बनायसे।
18 हुन जानेसे, आपलो बेपार ने नफा होयसे।
हुनचो दिया रात भर नी लिबे।
19 हुन सूत गातेसे,
हुनचो हाथ, चरखा के थामुन रयसे।
20 हुन, गरीब के दान देयसे,
आउर काई नी रलो लोग चो साहरा करेसे।
21 हुन, सीतकार बेरा आपलो घर-लोग काजे फिकिर नी करे,
कसनबलले हुनचो घर-लोग ऊन चो लाल फटई पींदुआत।
22 हुन खुदे चदरमन बनायसे;
हुनचो फटईमन मकमल आउर बांगा रंग चो आय।
23 हुनचो मनुक मंडली ने सियानमन संगे बसलोने,
हुनचो मान होयसे।
24 हुन मकमल फटई बनाउन बिकुआय;
करांड-पटा बनाउन बेपारीमन के बिकुआय।
25 सकत आउर मान हुनचो फटई आय,
हुन एतो दिनमन के दखुन हांसुआय।
26 हुन बुद चो गोट गोटेयायसे,
हुन दया चो गोटमन सिखायसे।
27 हुन आपलो कुटुम लोग चो चलनी-बुलनी के धियान ले दखते रयसे,
आउर मसागत करलोर नोहलो भात नी खाये।
28 हुनचो बेटामन हुनके, “धन-धन” बलसोत;
हुनचो मनुक, हुनचो बड़ाई करुन बलेसे:
29 “खुबे बायलेमन नंगत नंगत बुतामन तो करलासे,
मानतर तुय हुन सपाय ले नंगत आस।”
30 सोबा-सुंदर तो फंद आउर फोकाहा आय,
मानतर जोन बायले जहोवा के डरुन चलेसे, हुनचो बड़ाई होयदे।
31 हुनचो मसागत चो फर हुनके देस,
मंडली ने, हुनचो बुतामन किरता हुनचो बड़ाई होओ।