भजन गीतमन
आगे एके पढ़ा
ए भजन गीतमन, पवितर सास्तर चो गीत आउर पारथना चो किताप आय। एके सात झन लिखलासे, सबु ले आगर दाउद चो गीत-पारथना आसे। एता इसराएलिमन एक हजार बरक करलो बाड़ती चो बारे ने बललोने, मोसा ले धरुन इसराएलिमन बेबिलोन ले बोहड़ुन एओत ले घटलोर कहनीमन आसे। एके पांच भाग ने बाटलोर आसे। (अध्या 1-41; 42-72; 73-89; 90-106; 107-150) एके इसराएलिमन गोटोक संगे रूंडाउन तार बिती बाजामन संगे महापरभु चो पारथना आउर आराधना ने बावरते रला। पाछे, ए गीत-किताप इसराएलिमन चो पवितर-सास्तर चो गोटोक भाग बनली। ए भजन-गीत किताप ने, महापरभु काजे जय-जय गीत, आराधना गीत, साहरा, रखेया, मुक्ति आउर खेमा काजे पारथना आसे। एता महापरभु चो बरमन काजे धन-धन चो गीत आउर बयरीमन के डंड देतो काजे पारथना बले आसे। एता महापरभु चो भलई, मयमा आउर सकत चो बारे ने लिखलोर आसे आउर महापरभु के, सकत सिलपट, रखेया चो भाड़ा आउर लुकतो ठान बललोर आसे।
एता एकलाय करलो पारथना आउर खुबे लोग संगे करलो पारथना बले आसे। कोनी-कोनी पारथना ने, एकलाय मनुक चो मन चो बिचार आउर आदो पारथना ने, महापरभु चो लोगमन के लागतो गोटमन आउर हुनमन चो बिचार चो बारे ने बले लिखलोर आसे।
भजन-गीत किताप चो बचन चो बारे ने परभु जीसु बले बललोसे। नवा नियम चो लिखियारमन बले एता चो बचन के लिखलासोत। पाछे, ए भजन-गीत किताप किरिस्ती मंडली काजे आराधना चो खुबे खास किताप बनली।