भजन गीतमन
पईल भाग
(भजन 1–41)
धरमकारी आउर अडरा मनुक
ए गोटोक सिखानी-गीत आय। ए भजन गीतमन चो जान-चीन करातो गीत आय।
1
धन-धन आय हुन मनुकजोन अडरा लोग चो बुद ने नी चले,
पापीमन चो बाट नी धरे*,
आउर हांसी-खेली करुमन चो मंडली ने बसा-उठा नी होये;
2 मानतर हुन, जहोवा* चो नियम-कानुन ले हरिक रउआय,
आउर रात-मंजन हुनचो नियम-कानुन के धियान करते रयसे।
3 हुन, बाहार खंडे
रोपलो रूक असन आय,
जोन आपलो समया ने फरुआय
आउर हुनचो पानामन केबई नी कोंवचुआय।
हुन मनुक काई बुता करले बले धरा देउआय।
4 मानतर अडरा लोगमन उसन नोआत,
हुनमन तो लेहरा उड़ातो पोल असन आत।
5 एईकाजे अडरा लोगमन नियाव ने थामुक नी सकदे,
आउर पापीमन, धरमकारीमन चो मंडली ने उबुक नी सकदे।
6 कसनबलले जहोवा धरमकारीमन के रखेया करेसे,
मानतर अडरा लोगमन तो नास होदे।