दानिएल
चो किताप
दानिएल आउर हुनचो संगवारीमन, नबूकदनेसर राजा चो माहाल ने
1
जहूदा चो राजा जहोयाकीम चो राजपाट चो तीसर बरक ने बेबीलोन चो नबूकदनेसर राजा आपलो सेना संगे जरूसलेम के लड़ई करतो काजे भोंवरक बेड़लो। 2 तेबे जहोवा, जहूदा चो राजा जहोयाकीम के, नबूकदनेसर राजा चो हक ने करुन दिलो। नबूकदनेसर राजा, महापरभु चो पवितर मंदिर चो आदो थारी-बटकामन के सिनार देस् ने आपलो देव-धामी चो गुड़ी ने नेउन भंडार ने संगालो।3 तेबे नबूकदनेसर राजा, माहाल-मुखिया असपनज के हुकुम दिलो कि इसराएलिमन चो राज-कुटुम आउर मान पावलो बीतामन + \fr 1:3 \ft ले कोनी-कोनी असन जुवानमन के आन, 4 जोनमन उंचा-पुरा आउर सुंदर, सबु बरन चो गियान, भरपुर समज-बुद आउर राज-माहाल ने सेवा-बुता करतो लाईक रओत; हुनमन के कसदेयामन चो सास्तर आउर भासा सिखाओत। 5 नबूकदनेसर राजा हुकुम दिलो, हुनमन के राजा थानो खादी-पिदी आउर अंगुर-मंद ले रोजे खुआहा। तीन बरक होओतले हुनमन के सिखाते राहा। बरक पुरलो पाछे, हुनमन के राजा पुरे आना। 6 हुनमन थाने दानिएल, हनन्या, मीसाएल आउर अजरिया नाव चो जहूदा बंस चो बाछलो जुवानमन बले रओत। 7 माहाल-मुखिया, दानिएल के बेलतससर, हनन्या के सदरक, मीसाएल के मेसक आउर अजरिया के अबेदनगो नाव संगालो।
8 मानतर दानिएल, राजा चो खादी-पीदी खाउन आपने के असुद* नी करें बलुन आपलो मने पक्का बिचारलो। एईकाजे हुन माहाल-मुखिया के, राजा चो खादी-पीदी नी खायें बलुन बिनालो। 9 महापरभु, माहाल-मुखिया के दानिएल उपरे जीव-दुखतो आउर दया करतो मन दिलो। 10 माहाल-मुखिया, दानिएल के बललो, “मय आपलो परभु राजा के डरुआंय; हुनी तुमके असन खादी-पीदी देतो हुकुम दिलोसे। तुचो संगवारीमन ले आगर तुचो थमना उतरलोर राजा दखलोने तुय मोचो जीव के गराहां ने पाड़से।” 11-12 माहाल-मुखिया असपनज, दानिएल, हनन्या, मीसाएल, आउर अजरिया चो दखा-रखा काजे बाछुन रलो भंडारी के दानिएल बललो, “मय तुके गुहारेंसे, तुय तुचो कमेयामन के दस दिनतले परखुन दख, आउर आमके खातो काजे साग-भात आउर पीवतो काजे पानी ची देस। 13 फेर दस दिन पाछे, आमचो थमना आउर राजा थानो खादी-पीदी खातो जुवानमन चो थमना के कटारुन दख आउर जसन तुके दखा देयदे उसनेची तुचो कमेयामन संगे कर।” 14 तेबे हुन भंडारी, दानिएल चो गोट के मानलो आउर दस दिन होओतले हुनमन के परखते रये। 15 दस दिन पाछे, दानिएल आउर हुनचो संगवारीमन चो थमना, राजा थानो खादी-पिदी खादलो जुवानमन ले आगर तीरतिरा रये। 16 तेबे हुन भंडारी, हुनमन के राजा थानो खादी-पीदी आउर अंगुर-मंद चो पलटा साग-भात आउर पानी देउक मुरियालो। 17 महापरभु, दानिएल आउर हुनचो संगवारीमन के नंगत बुद, सपाय बरन चो सास्तर चो गियान आउर समज दिलो। दानिएल सपाय बरन चो सपना आउर दरसन चो अरथ सांगतो गियान पावलो।
18 जुवानमन के राज-माहाल ने आनतो काजे नबूकदनेसर राजा कबूल धरालो समया पुरलोके, माहाल-मुखिया हुनमन के राजा पुरे नीलो। 19 तेबे राजा, जुवानमन ले गोटेयालो आउर हुन सपाय जुवानमन ले कोकेई बले दानिएल, हनन्या, मीसाएल आउर अजरिया असन बुद-गियान नी रली। एईकाजे दानिएल आउर हुनचो संगवारीमन राज-माहाल ने रउक मुरियाला। 20 राजा दखलो कि बुद-गियान आउर समज चो बारे ने जोन बले हुनमन के पूछते रये, राज भर चो सपाय जादु बितामन आउर पंजियारमन ले दस गुना आगर बुद-गियान हुनमन के रये।
21 आउर दानिएल, कुसरू राजा चो पईल बरक पुरोतले राज-माहाल ने रलो।