जोना
चो किताप
महापरभु के पाट करतोर
1
जहोवा* चो बचन अमितय चो बेटा जोना लगे अमरली,2 “उठ, आउर हुन बड़े सहर नीनवे ने जा; मोचो नंजर ने हुता चो लोगमन खुबे अडरा बुता करसोत, हुनमन के चेतानी देस।” 3 मानतर जोना, जहोवा के पाट करुन तरसीस सहर जातो बाटे परालो, आउर जाफा सहर ने अमरलो। हुता तरसीस सहरे जातो गोटोक पानी जाहाज भेटलो; आउर किराया देउन दुसर लोग संगे जाहाज ने चेगुन तरसीस बाटे गेलो।
4 तेबे जहोवा, समदूर ने गोटोक महाजंजाल लेहरा-धुका उठालो, आउर जाहाज टूटतो असन होते रली। 5 तेबे जाहाज चलातो बीतामन डरुन भाति आपलाहान-आपलाहान देव-धामीमन के गुहारुक मुरियाला; आउर जाहाज के उकास करतो काजे जाहाज ने रलो हाट-बोजामन के समदूर ने पकाउक मुरियाला। मानतर जोना जाहाज चो खाले चो खोली ने चेत-हेत नोहलो सोउन रये। 6 तेबे जाहाज मुखिया हुनचो लगे एउन पूछलो, “तुय कसन चेत-हेत नोहलो एथा सोयसीस? चेत, आउर आपलो देव-धामी के गुहार! कोन जाने हुन तुचो गुहार के सुनुन आमके बचायदे।”
7 तेबे हुनमन आपलाहान बिचार करला आउर बलला, “इआ, आमी चिटी पकाउन जानुं कि ए बिपती आमचो उपरे कोचो किरता ईलीसे।” हुनमन चिटी पकाला, आउर चिटी जोना चो नाव ने निकरली। 8 तेबे हुनमन हुनके बलला, “आमके सांग, कोचो किरता आमचो उपरे ए बिपती पड़लीसे? तुचो काय पेसा आय? तुय कहां ले ईलीसीस? तुय कोन राज चो आस?” 9 हुन, हुनमन के बललो, “मय इबरानी आंय; आउर सरग चो महापरभु जहोवा जोन मंजपुर आउर समदूर के बनालो, मय हुनके डंडासरन करेंसे।” 10 तेबे हुनमन खुबे डरुन गेला आउर बलला, “तुय कसन ने असन करलीस?” एदांय हुनमन जानला, ए मनुक जहोवा चो पुरे ले पराउन ईलोसे; कसनबलले हुन आपने हुनमन के सांगुन रये।
11 तेबे हुनमन हुनके पूछला, “ए समदूर चो लेहरा हलकामन थामतो काजे आमी तुचो संगे काय करुआंव?” हुदलदांय समदूर चो हलकामन खुबे उपरे उठते रली।
12 जोना हुनमन के बललो, “मोके उठाउन समदूर ने पकाउन दियास; तेबे समदूर चो लेहरा-धुका थामेदे; कसनबलले मय जानेंसे, ए महाजंजाल लेहरा-धुका तुमचो उपरे मोचोई किरता ईलीसे।”
13 तेबले बले चलातो बीतामन जाहाज के रेटे नेतो काजे खुबे बल करुन घाटुन दखला, मानतर अमराउक नी सकला, कसनबलले समदूर चो लेहरा-धुका आउर खुबे बाड़ते रली।
14 तेबे जाहाज चलातो बीतामन जहोवा ले गुहारला, “ए जहोवा, ए मनुक चो जीव चो पलटा ने आमचो जीव के नी धर, आउर आमके दोख नोहलो बीता के मोरते मारतो बदी नी देस; कसनबलले ए महापरभु, तुचेई बिचार असन ए सपाय बिपती पड़लीसे।” 15 तेबे हुनमन जोना के उठाउन समदूर ने पकाउन दिला; आउर समदूर चो महाजंजाल लेहरा-धुका थामली।
16 तेबे हुन मनुकमन जहोवा के खुबे डरला, आउर हुनके जतरा चेगाला आउर बोदना बोहला।
17 जोना के गिरतो काजे जहोवा गोटोक खुबे बड़े मछरी के तियार करु रये; आउर जोना हुन बड़े मछरी चो पेट भीतरे तीन मंजन आउर तीन रात रलो।