जोना चो पारथना
2
तेबे जोना बड़े मछरी चो पेट ले आपलो महापरभु जहोवा के पारथना करुन बललो, 2 “मय बिपती ने पड़लो बेरा जहोवा के गुहारले, आउर हुन मोचो सुनलो; तलपुर चो खुबे गड़िया ले मय हागदिले, आउर तुय मोचो सुनलीस। 3 तुय मोके समदूर चो खुबे गड़िया पानी ने पोकालीस; आउर मय पानी गोंडरामन चो मंजिगता पड़ु रले, आउर तुचो महाजंजाल हलकामन मोचो उपर ले बोहली। 4 तेबे मय बलले, ‘मोके तुचो पुरे ले निकरालोर आसे; तेबले बले मय तुचो पवितर मंदिर बाटे दखुआंय? 5 मोचो भोंवरक इतरो पानी रये कि मोचो जीव जातो असन लागते रये; गड़िया पानी मोचो भोंवरक रये, आउर मोचो मुंडे चिला-लाटा गुंडियाय होउ रये। 6 मय डोंगरीमन चो पेंदी लगे अमरु रयें; मय अमदेया काजे मोड़ा भाटा ने ढाकी होउ रले; तेबले बले ए मोचो महापरभु जहोवा, तुय मोचो जीव के खोदरा ले झीकुन निकरालीस। 7 जिदलदांय मय मुछियातो असन होले, तेबे मय जहोवा ले पारथना करले; आउर मोचो पारथना तुचो लगे बललोने, तुचो पवितर मंदिर ने अमरली। 8 जोन लोगमन, फोकाहा मूरतमन के डंडासरन करसोत, हुनमन आपलो दयाकरु महापरभु के छांडुन देयसोत। 9 मानतर मय धन-धन गीत गावते तुचो पुरे जतरा करेंदे; आउर मोचो बोहलो बोदना के चेगायंदे। छंडावा जहोवा बाटले ची मिरेसे!” 10 तेबे जहोवा हुन बड़े मछरी के हुकुम दिलो, आउर हुन जोना के समदूर खंडे उगालली।