जोना चो रीस आउर महापरभु चो दया
4
1-3 नीनवे के डंड नी देतो गोट जोना के मुरे नी भावली, आउर जोना खुबे रीस होलो। हुन, जहोवा ले असन पारथना करलो, “ए जहोवा, जिदलदांय मय आपलो राज ने रले, तेबे काय, मय एई गोट के नी बलते रले? एई किरता मय तुचो हुकुम के सुनुन भाति तरसीस बाटे पराले; कसनबलले मय जानते रले कि तुय दया करु आउर जीव दुखु महापरभु आस, धीर ने रीस होउआस, सत मया करु आउर डंड देउक मन नी करुआस।एईकाजे ए जहोवा, एदांय मोचो जीव के धर; कसनबलले मोचो काजे जीव रतोर ले मोरतोर नंगत आय।” 4 जहोवा, जोना के पूछलो: “काय, तुचो रीस होतोर नंगत आय?” 5 तेबे जोना, हुन सहर ले निकरुन भाति बेर उदिया बाटे गोटोक लाड़ी बनाउन हुनचो छांय ने बसलो; आउर ए दखुक मन करलो कि एदांय हुन सहर चो काय गती होयदे।
6 तेबे जहोवा महापरभु गोटोक लाहा बुटा उपजाउन असन बड़ालो कि जोना चो मुंड उपरे छांय होओ, जेचोले हुनचो दुख छांडो। जोना हुन लाहा बुटा काजे खुबे हरिक होलो। 7 बियाने बेर उदतो बेरा, महापरभु गोटोक कीड़ा के पठालो, जोन लाहा बुटा के कतरली आउर हुन सुकली। 8 जिदलदांय बेर उदली, तेबे महापरभु बेर उदिया बाट ले घाम-लेहरा के बोहालो, आउर मुंडे घाम पावतोके जोना मुछियालो असन होलो; आउर मोरुक मन करलो। हुन बललो, “मोचो जीव रतो ले, मोरतोर ची नंगत आय।” 9 महापरभु, जोना के बललो, “तुय लाहा बुटा किरता रीस होतोर काय, नंगत आय?” हुन बललो, “हव, मोचो रीस होतोर नंगत आय, रीस काजे मोरतोर बले नंगत आय।” 10 तेबे जहोवा बललो, “जोन लाहा बुटा काजे तुय काई बले मसागत नी करलीस, आउर हुनके नी रोपलीस, हुन गोटकी राते अखरली, आउर गोटकी राते मोरली; तुय हुनचो किरता फिकिर करसीस। 11 फेर ए बड़े सहर नीनवे, जोन थाने एक लाख बीस हजार ले जुगे लोगमन आसोत, जोन आपलो उजा हाथ आउर डेबरी हाथ के नी जानतो भकवामन आत, आउर खुबे पोसलो जनावरमन बले आसोत, काय, मय एमन चो फिकिर नी करें?”