चेलामन के पारथना करुक सिखातोर
11
फेर जीसु कोनी थाने पारथना करते रलो। आउर जिदलदांय हुन पारथना सारलो, तेबे हुनचो चेलामन ले गोटोक हुनके बललो: “ए परभु, जसन जूहन्ना हुनचो चेलामन के पारथना करुक सिखालो उसने आमके बले सिखाव।”
2 जीसु चेलामन के बललो: “जिदलदांय तुमी पारथना करासे, तेबे बला:
‘ए बुआ, तुचो नाव पवितर मानुक होओ,
तुचो राज एओ।
3 आमचो रोजे दिन चो खादी-पीदी आमके देस,
4 आउर आमचो पापमन के खेमा कर;
कसनबलले आमी बले आमचो जमाय कसूर बीतामन के खेमा करुंसे,
आउर आमके परखतो ले बचाव’।”
लूका 11:1-4
पारथना चो बारे ने जीसु चो सिखिया
5 तेबे जीसु चेलामन के बललो: “तुमचो मंजिगता ने कोन असन आसे, जेचो गोटकी संगवारी आसे, आउर हुन सोवा पड़लो राती ने हुनचो लगे जाउन हुनके बलेसे, ‘ए संगवारी, मोके तीनठन रोटी देस।
6 कसनबलले मोचो गोटोक संगवारी सगा ईलोसे, आउर हुनके खुआतो काजे मोचो लगे काईची नीआय’।
7 आउर हुन भीतर ले बलेसे, ‘मोके असकट नी कर; एबे कपाट ढाकलोर आसे आउर मोचो पिलामन मोचो संगे ओचना ने सोवलासोत, एईकाजे मय उठुन तुके देउक नी सके’?
8 मय तुमके बलेंसे, हुनचो संगवारी होउन बले उठुन नी देये; मानतर हुन लाज नी होउन मांगते रलोने हुनके जितरो होतोर आय, उठुन देयदे।
9 मय तुमके बलेंसे: मांगा, तुमके मिरेदे; डगराहा, तुमी पाहासे; ठटाहा, तुमचो काजे उगड़ाउन देयदे।
10 कसनबलले जोन मांगेसे, पाउआय; आउर जोन डगरायसे, भेटेसे; आउर जोन ठटायसे, हुनचो काजे उगाड़दे।
11 तुमीमन ले कोन असन बुआ होयदे, जिदलदांय हुनचो बेटा हुनके रोटी मांगलोने हुनके पकना देयदे; नोहले मछरी मांगलोने मछरी चो पलटा हुनके साप देयदे?
12 नोहले गार मांगलोने हुनके बिचु-काकड़ा देयदे?
13 तुमी अडरा होउन बले आपलो पिलामन के नंगत तीजमन देउक जानास, तेबे तुमचो सरग चो बुआ हुनके मांगतो लोगमन के पवितर आत्मा कसन नी देयदे।”
जीसु आउर देव-भूतमन चो मुखिया बेलजाबुल
14 जीसु गोटोक मनुक ले देव-भूत के निकरालो, जोन हुनके कोंदा करुन रये। जिदलदांय देव-भूत निकरुन गेली, तेबे हुन कोंदा मनुक गोटेयाउक मुरियालो आउर एके दखुन कुड़ायक लोगमन भक्याउन गेला।
15 मानतर कोनी-कोनी बलला: “हुन देव-भूतमन चो मुखिया बेलजाबुल बाटले भूतमन के निकरायसे।”
16 मानतर दुसर लोगमन जीसु के परखतो काजे सरग ले गोटोक चीना मांगला।
17 मानतर जीसु हुनमन चो बिचार के जानलो आउर हुनमन के बललो: “जोन राज ने लोगमन आपने-आपने लड़लोने हुन राज नसुन जायदे, आउर जोन कुटुम ने झगड़ा आसे हुन टुटुन जायदे,
18 तुमी बलेसाहास कि मय बेलजाबुल बाटले देव-भूतमन के निकरायंसे, मानतर बेलजाबुल (सयतान) आपलेई संगे लड़लोने, हुनचो राज कसन ने बनुन रयदे?
19 मय देव-भूतमन के बेलजाबुल बाटले निकरायंसे जाले, तुमचो लोगमन कोचो बाटले भूतमन के निकरायसोत? एईकाजे हुनमन ची तुमचो नियाव करदे।
20 मानतर मय महापरभु चो सकत ले देव-भूतमन के निकरायंसे, तेबे जाना कि महापरभु चो राज तुमचो लगे अमरलीसे।
21 कोनी बलबीता मनुक हाथ-हतियार संगे आपलो घर चो राखा करलोने, हुनचो घर चो जमाय तीजमन बाचुन रयदे।
22 मानतर जेबे हुनचो ले जुगे बलबीता एउन हुनके हरायदे, तेबे हुन, हुनचो भोरसा करतो कडरी-कुड़ारमन के झीकेदे आउर घर चो धन-माल के झीकुन बाटेदे।
23 जोन मोचो संगे नोआत, हुनमन मोचो बयरी आत; आउर जोन मोचो संगे लोगमन के नी रूंडायसे, हुन बिखरायसे।
असुद आत्मा चो बोहड़तोर
24 जिदलदांय देव-भूत मनुक ले निकरुन जायसे, तेबे बिसातो काजे सुकलो ठानमन के डगराते बुलेसे, आउर नी पावलोने बलेसे, ‘मय आपलो हुनी घरे जोन थान ले निकरुन रये, बोहड़ेंदे’।
25 आउर एउन हुनके सरा-बाड़ा करलोर आउर काय मंजा चो सजालोर पायसे।
26 तेबे हुन जाउन आपलो ले सातठन जुगे देव-भूतमन के आपलो संगे आनेसे, आउर हुनमन हुता ओलुन रयसोत आउर हुन मनुक चो, एबे चो गती आगे ले जुगे अडरा होउन जायसे।”
27 जिदलदांय हुन ए गोटमन बलते ची रये तेबे भीड़ थान ले कोनी बायले बड़े राग ले बलली: “भाइगमानी आय हुन पेट जोन थाने तुय जनमतो काजे रलीस आउर हुन गोरस ढेटी जेके तुय चुहकलीस।”
28 जीसु बललो: “हव, मानतर भाइगमानी आत हुनमन जोन महापरभु चो बचन सुनसोत आउर मानसोत।”
लूका 11:27-28
अगमजानी चो चीना
29 जिदलदांय बड़े भीड़ जुहुन जाते रये, तेबे हुन सांगुक मुरियालो: “ए जुग चो लोगमन अडरा आत, हुनमन चीना डगरायसोत; मानतर जोना चो चीना के छांडुन कोनी आउर चीना हुनमन के देतोर नी होयदे।
30 जसन जोना, नीनवा सहर चो लोगमन काजे चीना होलो, उसनेची मय मनुक चो बेटा बले, ए जुग चो लोगमन काजे चीना होयंदे।
31 बेर उदतो उजा हाथ बाटले ईलो रानी, नियाव चो दिने ए जुग चो लोगमन संगे जीव उठुन हुनमन के बदी करेदे, कसनबलले हुन राजा सुलेमान चो गियान सुनतो काजे मंजपुर चो रेटे ले ईली, आउर दखा, एथा सुलेमान ले बले बड़े आसे।
32 नीनवा चो लोगमन नियाव चो दिने ए जुग चो लोगमन संगे उबा होउन, हुनमन के बदी करदे; कसनबलले हुनमन जोना चो गोट के सुनुन मन बोहड़ाला, आउर दखा, एथा जोना ले बले बड़े आसे।
देहें चो दीया आंईक आय
33 दीया बारुन कोनी मनुक, करपन ने नोहले पयली खाले नी संगायसे, मानतर भीती चो लामन ने ओरायसे कि भीतरे ओलतो बीता उजर पाओ।
34 तुचो देहें चो दीया आंईक आय, एईकाजे तुचो आंईक सुद होलोने तुचो जमाय देहें बले उजर होयदे; मानतर अडरा होलोने तुचो देहें बले अंधार होयदे।
35 एईकाजे चेत करुन रा कि तुचो उजर अंधार नी होउन जाओ।
36 तुचो जमाय देहें उजर आसे जाले हुनचो कोनी अंग अंधार ने नीआय, तेबे सपाय असन उजर होयदे, जसन हुनी बेरा होयसे जिदलदांय दीया आपलो बरतो ले तुके उजर देयसे।”
पंडितमन आउर फरीसीमन के दागा देतोर
37 जिदलदांय जीसु गोटेयाते ची रलो हुदलीदांय कोनी फरीसी हुनके आपलो घरे खातो काजे नेवता दिलो, आउर हुन भीतरे जाउन खाउक बसलो।
38 फरीसी दखुन भक्यालो कि जीसु खातो ले आगे नी नहालो।
39 परभु हुनके बललो: “ए फरीसीमन, तुमी बटकीमन आउर थारीमन असन आहास, जेके उपरे-उपरे ले मांजसास, मानतर तुमचो भीतरे लालच आउर दुसट भोरलीसे।
40 ए बुद नोहलो लोगमन, देहें चो अंग बनालो बीता, काय हुन भीतर चो अंग के नी बनालोसे?
41 तुमचो लगे जोन बले तीजमन आसे हुनके गरीब-धुरीबमन के दान करुन दियास; तेबे तुमी जमाय बरन ले पवितर होआसे।
42 मानतर ए फरीसीमन, तुमचो उपरे सराप! तुमी पोदीना, सुदाब आउर सपाय बरन चो साग-भाजी चो दस बाटा ले गोटोक बाटा (दसवां बाटा) के महापरभु के देयसास, मानतर नियाव के आउर महापरभु चो मया के छांडुन देयसास; दसवां बाटा पक्का देते रतास, मानतर नियाव के आउर महापरभु चो मया के बले नी छांडतास जाले होती।
43 ए फरीसीमन, तुमचो उपरे सराप! तुमी मंडली-घरे सियानमन चो ठान ने बसुक मन करसास आउर हाटमन ने लोगमन ले जुहार सुनुक मन करसास।
44 तुमचो उपरे सराप! कसनबलले तुमी हुन लुकलो मोठमन* असन आहास, जेचो उपर ले लोगमन हिंडसोत आउर असुद होयसोत, मानतर नी जानसोत।”
45 तेबे गोटोक धरम-पंडित हुनके बललो: “ए गुरुजी, असन गोटमन बलुन तुय आमके निंदरसीस।”
46 जीसु हुनके बललो: “ए धरम-पंडितमन, तुमचो उपरे बले सराप! तुमी लोगमन उपरे नी उठाउक सकतो बोजामन के तेंगड़ेसाहास, मानतर तुमी खुदे गोटोक अंडकी ले बले हुनके नी छिंयास।
47 तुमचो उपरे सराप! तुमी हुन अगमजानीमन चो मोठ के सुंदर बनायसाहास, जोनमन के तुमचो पुरखामन मोरते मारुन दिला।
48 बललोने, तुमी गवई आहास, आउर आपलो पुरखामन चो अडरा बुतामन ने राजी आसास, कसनबलले हुनमन अगमजानीमन के मोरते मारला आउर तुमी हुनमन चो मोठ बनायसाहास।
49 एईकाजे महापरभु आपलो गियान ने बललो, ‘मय हुनमन चो लगे अगमजानीमन आउर पठालो-लोगमन के पठायंदे, आउर हुनमन थान ले कोनी-कोनी के मोरते मारुन देदे आउर कोनी-कोनी के हरेयान करदे’।
50 कसनबलले संवसार चो मूर ले धरुन जितरो अगमजानीमन चो लोउ बोहलीसे, हुन जमाय चो हिसाब ए जुग चो लोगमन ले धरतोर होयदे।
51 हाबील के मोरते मारतो ले धरुन जकरिया के मोरते मारतले, जेके महापरभु चो मंदिर आउर बेदी चो मंजिगता ने मोरते मारला। मय तुमके सते सांगेंसे: ए जमाय चो हिसाब ए जुग चो लोगमन ले धरतोर होयदे।
52 तुमी धरम-पंडितमन उपरे सराप! तुमी गियान चो कुची के बेरपेला धरलासाहास, मानतर तुमी खुदे नी ओललास, आउर ओलतो बीतामन के ओलुक बले नी दिलास।”