धरम पंडितमन आउर फरीसीमन ले बाचुन राहा
23
तेबे जीसु भीड़ आउर आपलो चेलामन के बललो,
2 धरम-पंडितमन आउर फरीसीमन, मोसा दिलो नियम-कानुनमन के सिखातो हक पावलासे;
3 एईकाजे हुनमन जोन बले तुमके बलदे हुनके करा आउर माना, मानतर तुमी हुनमन असन बुता नी करा; कसनबलले हुनमन बलुआत आउर करु नोआत।
4 हुनमन नियम-कानुन चो भारी बोजा बांधुन मनुकमन चो खांदे लतुन देउआत*, जेके उठातोर मसकिल आय, मानतर खुदे आपलो अंडकी ले बले हुनके सरकाउक मन नी करोत।
5 हुनमन सपाय बुता के लोगमन के दखातो काजे करसोत: हुनमन आपलो ताबीजमन के ओसार बनाउआत आउर फटई धड़ीमन के लमाउआत।
6 भोज ने पुरे-पुरे ठान, आउर मंडली-घर ने पुरे-पुरे आसन,
7 हाटमन ने जुहार, आउर मनुकमन ले गुरुजी बलाय होतोर, हुनमन के भाउआय।
8 मानतर तुमी गुरुजी बलाय नी होआ, कसनबलले तुमी सबु भाई-भाई आहास आउर तुमचो गोटकी ची गुरुजी आसे।
9 तुमी मंजपुर ने कोकई आपलो बुआ नी बला, कसनबलले तुमचो गोटकी ची बुआ आय, जोन सरग ने आसे।
10 तुमी मालिक बले बलाय नी होआ, कसनबलले तुमचो गोटकी ची मालिक आसे, बललोने किरिस्त।
11 जोन तुमचो मंजी ने बड़े आय, हुन तुमचो कमेया बनो।
12 जोन कोनी आपने के बड़े बनायसे, हुनके महापरभु नानी बनायदे: आउर जोन कोनी आपने के नानी बनायसे, हुनके महापरभु बड़े बनायदे।
धरम पंडितमन आउर फरीसीमन
13 ए कपटी धरम-पंडितमन आउर फरीसीमन, तुमचो उपरे हाय! तुमी, लोगमन सरग राज ने जातो कपाट के ढाकसाहास, तुमी खुदे नी ओलास आउर ओलतो लोग के बले ओलुक नी देयसाहास।
14 (ए कपटी धरम पंडितमन आउर फरीसीमन तुमचो उपरे हाय! तुमी रांडी बायलेमन चो घर के खायसाहास, आउर दखातो काजे खुबेदांय ले पारथना करुआहास, एईकाजे तुमके जुगे डंड मिरेदे।)
15 ए कपटी धरम-पंडितमन आउर फरीसीमन, तुमचो उपरे हाय! तुमी गोटोक झन के आपलो धरम ने आनतो काजे समूंद के नाकुआहास आउर मंजपुर के छान मारुआहास आउर जिदलदांय हुन तुमचो धरम ने एउआय तेबे तुमी हुनके आपलो ले आगर नरक-कुंड ने डंड पावतो लाईक बनाउआहास।
16 तुमी बाट दखाउ कानामन असन आहास, तुमचो उपरे हाय, तुमी बलुआहास कि कोनी मंदिर चो किरिया खादले काई नी होए, मानतर मंदिर चो सोन चो किरिया खादले किरिया लागुआय।
17 ए एरा आउर कानामन, कोन बड़े आय; सोन नोहले हुन मंदिर, जेचोले हुन सोन पवितर होयसे?
18 फेर तुमी बलुआहास कि कोनी बेदी चो किरिया खादले काई नी होए, मानतर जोन भेंट हुन बेदी ने आसे, कोनी हुनचो किरिया खादले लागेदे।
19 ए कानामन, कोन बड़े आय; भेंट, नोहले बेदी जेचोले भेंट पवितर होयसे?
20 एईकाजे जोन बेदी चो किरिया खायसे, हुन बेदी आउर हुता संगालोर भेंट चो बले किरिया खायसे।
21 जोन मंदिर चो किरिया खायसे हुन, मंदिर चो आउर हुता रउ बीता चो बले किरिया खायसे।
22 जोन सरग चो किरिया खायसे, हुन महापरभु चो आसन चो आउर जोन आसनगादी ने बसलोसे हुनचो बले किरिया खायसे।
23 ए कपटी धरम-पंडितमन आउर फरीसीमन, तुमचो उपरे हाय, तुमी पोदीना, सोंप आउर जीरा चो दसवां बाटा देयसाहास, मानतर तुमीमन नियम-कानुन चो चोखा गोटमन बललोने, नियाव, जीव-दुखतोर आउर बिसवास के छांडुन दिलास; तुमी हुनमन के करते रतोर रली आउर एमन के बले नी छांडतोर रली।
24 ए बाट दखाउ कानामन, तुमी गुंडी के तो छानुआहास, मानतर ऊंट के गिरुआहास।
25 ए कपटी धरम-पंडितमन आउर फरीसीमन, तुमचो उपरे हाय, तुमी बटका आउर थारीमन असन आहास जेके तुमी उपरे-उपरे मांजुआहास, मानतर तुमचो मन भीतरे लालच आउर खुद के हरिक करतो अडरा बिचार भोरलीसे।
26 ए काना फरीसी, आगे बटका आउर थारी के भीतर ले मांज कि हुन बाहरी ले बले छुकनाय होओ।
27 ए कपटी धरम-पंडितमन आउर फरीसीमन तुमचो उपरे हाय, तुमी चूना पोतलो मोठमन असन आहास, जोन उपर ले सुंदर दखा देउआय, मानतर भीतरे मोरलोमन चो हाड़ा-गोड़ा आउर सपाय बरन चो केचड़ ले भोरलीसे।
28 असनी ची तुमी बले बाहरी ले मनुकमन के धरमकारी दखा देउआहास, मानतर तुमी भीतर ले कपटी आउर ओधरमी आहास।
धरम पंडितमन आउर फरीसीमन उपरे डंड चो अगमगोट
29 “ए कपटी धरम-पंडितमन आउर फरीसीमन! तुमचो उपरे हाय। तुमी अगमजानीमन चो मोठ के जतनाउआहास आउर धरमकारीमन चो मोठमन के सजारुआहास।
30 तुमी बलुआहास, ‘आमी आमचो पुरखामन बेरा रतु जाले अगमजानीमन के मोरते मारतो ने संग नी देतु’।
31 असन बरन ले तुमी आपलो ची उलटा ने गवई देउआहास कि तुमी अगमजानीमन के मोरते मारुमन चो पिला-झीलामन आहास।
32 बललोने: तुमी आपलो बुआ-दादीमन चो पाप चो हांडी के भोरा।
33 ए सापमन, ए करीत सापमन चो पिलामन, बललोने सयतान चो पिलामन, तुमी नरक-कुंड चो डंड ले कसन बाचुक सकास?
34 एईकाजे तुमी दखा, मय तुमचो लगे अगमजानीमन, अकल बीतामन आउर पंडितमन के पठायंसे; तुमी हुनमन ले कितरो के मोरते मारासे आउर कुरूस ने चेगाहासे, आउर कितरो के आपलो मंडली-घरमन ने कोड़ा झोकाहासे आउर गोटोक सहर ले दुसर सहर हुनमन के खेदासे।
35 मंजपुर ने धरमकारीमन चो जितरो लोउ बोहलीसे, धरमकारी हाबील चो लोउ ले धरुन बिरिकया चो बेटा जकरिया अमरतले, जेके तुमी मंदिर आउर बेदी चो मंजिगता मोरते मारु रलास, ए सपाय चो डंड तुमचो मुंडे पड़ेदे।
36 मय तुमके सते बलेंसे, ए जमाय गोटमन चो डंड ए बेरा चो लोगमन उपरे पड़ेदे ची।”
जरूसलेम काजे खिसियातोर
37 जीसु बललो, “ए जरूसलेम, ए जरूसलेम, तुय अगमजानीमन के मोरते मारुआस आउर जेके तुचो लगे पठाला हुनके तुय पकना ले मोरते मारसीस, मय कितरो हार मन करले कि कुकड़ी आपलो पिलामन के जसन पाटकी खाले रूंडा करुन लेपटायसे, उसनेची मय बले तुचो लेकामन के रूंडा करुन लेपटायंदे, मानतर तुमी मन नी करलास।
38 दखा, तुमचो घर* रन-बन होउन जायसे।
39 कसनबलले मय तुमके बलेंसे: एबले धरुन जिदलदांय ले तुमी नी बलासे कि धन-धन आय हुन, जोन परभु चो नाव ले एयसे, हुदलदांय ले फेर मोके तुमी केबई नी दखासे।”