बिया भोज चो कटाव
22
जीसु फेर हुनमन के कटावमन ले सांगुक मुरियालो,
2 सरग राज हुन राजा चो असन आय, जोन आपलो बेटा चो बिया करलो।
3 आउर हुन आपलो कमेयामन के, नेवतलो-लोगमन लगे खबर पठालो, बिया-घरे खाउकलाय इआ; मानतर हुनमन एउक मन नी करला।
4 फेर हुन नेवतलो लोगमन लगे आपलो दुसर कमेयामन के असन बलुन पठालो, “दखा, मय रांदा तियार करलेसे, मोचो पोसलो पसुमन के मारलोर आसे, सपाय बानी तियार आसे; तुमी बिया भोज खाउकलाय इआ।”
5 मानतर राजा चो गोट के धियान नी देउन जाते गेला: कोनी आपलो बेड़ा बाटे, कोनी आपलो बेपार करतो बाटे।
6 आउर दुसर लोग हुनचो कमेयामन के अडरा बेबार करला आउर मोरते मारला।
7 तेबे राजा रीस होलो, आउर आपलो पलटन के पठाउन हुन मनुक-मारामन के मोरते मारुन, हुनमन चो सहर के डसाउन दिलो।
8 फेर हुन आपलो कमेयामन के बललो, बिया भोज तो तियार आसे मानतर नेवतलो-लोग भोज ने एतो लाईक नी निकरला।
9 एईकाजे जोड़ान बाटे जाहा आउर जितरो लोग तुमके मिरदे, सपाय के बिया भोज ने हागदेउन आना।
10 कमेयामन जोड़ान बाटे गेला आउर नंगत-अडरा, जितरो मिरला, सपाय के जुहा करुन बिया भोज ने आनला; आउर बिया-घर सगामन ले भोरुन गेली।
11 “जिदलदांय राजा सगामन के दखतो काजे भीतरे ईलो, तेबे हुन बिया फटई नी पींदलो गोटोक मनुक के दखलो।
12 राजा हुनके पूछलो, ‘ए मीत; तुय एता बिया फटई नी पींदुन काय काजे ईलीस?’ हुन काईची बलुक नी सकलो।
13 तेबे राजा आपलो कमेयामन के बललो, ‘एके हाथ-पांय बांधुन बाहरी अंधार ने पकाउन दिया, हुताय हुन गागा-बोगा आउर दात कडरते रयदे।’
14 एईकाजे मय बलेंसे, नेवतलो-लोग खुबे आसोत, मानतर छुनलो लोग खिंडिक असन आसोत।”
राजा कयसर के पट्टी देतोर आय कि नाई
15 तेबे फरीसीमन जाउन आपलाहान ने सोर होला, जीसु के काय गोटमन ने फसावां।
16 एईकाजे हुनमन आपलो चेलामन के हेरोदेयामन संगे जीसु लगे असन बलुकलाय पठाला, “ए गुरुजी, आमी जानुंसे तुय सत-धरमी आस, आउर तुय महापरभु चो बाट के सत ले सिखाउआस, आउर तुय कोचई फिकिर नी करीस, कसनबलले तुय माने-जानुन नी गोटेयायीस।
17 एईकाजे तुय काय बिचारसीस आमके सांग, रोमी राजा कयसर के पट्टी देतोर नंगत आय कि नाई?”
18 जीसु हुनमन चो अडरा बिचार के जानुन बललो, “ए कपटीमन, काय काजे तुमी मोचो मन बुझेसाहास?
19 गोटोक पट्टी देतो सिक्का मोके दखाहा।” तेबे हुनमन जीसु लगे गोटोक सिक्का आनला।
20 जीसु हुनमन के पूछलो, “ए छापा आउर नाव कोचो आय?”
21 हुनमन बलला, “रोमी राजा कयसर चो।” तेबे जीसु हुनमन के बललो, “जोन कयसर चो आय, हुनके कयसर के दियास; आउर जोन महापरभु चो आय, हुनके महापरभु के दियास।”
22 एके सुनुन हुनमन भक्याउन गेला, आउर जीसु के छांडुन जाते गेला।
जीव उठतो चो बारे ने
23 सदूकिमन असन पतेयाउआत कि मोरलोमन चो फेर जीव उठतोर होउक चे नी सके। एईकाजे हुनमन हुनी दिने एउन जीसु के पूछला,
24 “ए गुरुजी, मोसा बलुन रये, कोनी मनुक पिला-झीला नी पाउन मोरुन गेलोने, हुनचो भाई हुन रांडी बायले के बिया करुन, आपलो भाई काजे पिला-झीला जनमाओ।
25 गोटोक घरे सात भाई रला; पईल भाई बिया होउन पिला-झीला नी पाउन मोरुन गेलो, आउर आपलो भाई काजे आपलो बायले के छांडुन गेलो।
26 एचई असन दुसर आउर तीसर भाईमन बले हुन बायले के बिया होला, आउर सातो भाई बले पिला-झीला नी पाउन मोरुन गेला।
27 एचो पाछे हुन बायले बले मोरुन गेली।
28 एदांय मोरलो थान ले जीव उठलोने, हुन सातो भाई ले कोचो बायले होयदे? कसनबलले हुन, सातो भाईमन चो बायले रली।”
29 जीसु सदूकिमन के बललो, “तुमी पवितर सास्तर आउर महापरभु चो सकत के नी जानास; एईकाजे तुमी नंगत ले नी समजलासाहास।
30 कसनबलले जीव उठलो पाछे, हुनमन बिया-दान नी होओत, मानतर सरगदूतमन असन रदे।
31 काय, तुमी मोरलोमन चो जीव उठतो बारे ने महापरभु चो बचन के नी समजलास, महापरभु तुमके बललो:
32 ‘मय, अबराहम चो महापरभु, इसहाक चो महापरभु आउर जाकूब चो महापरभु आंय?’ हुन जीवतमन चो महापरभु आय, मोरलोमन चो नाई।”
33 एके सुनुन लोगमन हुनचो बचन ले भक्याउन गेला।
सबुले बड़े हुकुम
34 जिदलदांय फरीसीमन सुनला कि सदूकिमन जीसु चो गोट के उलटाउक नी सकला, तेबे हुनमन रूंडा होला।
35 आउर हुनमन ले गोटोक धरम-पंडित जीसु के परखतो काजे पूछलो,
36 “ए गुरुजी, नियम-कानुन चो सबुले बड़े हुकुम काय आय?”
37 जीसु हुनके बललो, “तुय महापरभु आपलो परभु के तुचो सपाय मन, तुचो सपाय जीव आउर तुचो जमाय बुद-अकल ले मया कर।
38 बड़े आउर मुंडी हुकुम एई आय।
39 आउर एचई असन ए दुसर हुकुम बले आय, तुय सपाय लोगमन के आपलो असन मया कर।
40 एई दुय हुकुममन जमाय नियम-कानुन आउर अगमजानीमन चो पाया आय।”
किरिस्त कोचो बेटा आय?
41 जिदलदांय फरीसीमन रूंडा रओत, तेबे जीसु हुनमन के पूछलो,
42 “किरिस्त चो बारे ने तुमी काय बिचारसाहास? हुन कोचो बेटा आय?” हुनमन बलला, “दाउद चो।”
43 जीसु हुनमन के पूछलो, “फेर काय काजे दाउद पवितर आत्मा ने समपुरन होउन हुनके ‘परभु’ बलेसे?
44 कसनबलले धरमसास्तर ने असन लिखलोर आसे,
‘परभु, मोचो परभु के बललो,
जिदलदांय ले मय तुचो बयरीमन के तुचो पांय खाले करुन नी देयें
मोचो उजा हाथ बाटे बस।’ †