लूका 20

जीसु चो हक चो बारे ने

गोटोक दिने, जिदलदांय जीसु मंदिर ने लोगमन के सिखिया देते रये आउर नंगत खबर सांगते रये, तेबे धरम-सियानमन संगे, पुजारीमन चो मुखियामन आउर धरम-पंडितमन एउन उबा होला;

2 आउर हुनमन जीसु के बलुक मुरियाला, “आमके सांग कि तुय ए बुतामन काय हक ले करसीस आउर कोन आय तुके ए हक दिलोसे?”

3 जीसु हुनमन के बललो: “मय बले तुमके गोटोक गोट पूछेंसे मोके सांगा;

4 जूहन्‍ना के बपतिस्‍मा देतो हक महापरभु ले मिरु रये कि मनुकमन ले?”

5 तेबे हुनमन सोर होउन बलुक मुरियाला, “आमी बलवां, ‘महापरभु बाटले आय जाले, हुन आमके बलेदे, फेर काय काजे तुमी जूहन्‍ना के नी पतेयालास?’

6 मानतर ‘आमी मनुकमन बाटले आय बललोने, जमाय लोगमन आमके पकना मारदे, कसनबलले हुनमन पक्‍का जानते रओत कि जूहन्‍ना अगमजानी आय’।”

7 एईकाजे हुनमन जीसु के बलला, आमी नी जानु, कोचो बाटले रये।

8 जीसु हुनमन के बललो, “असन आय जाले मय बले तुमके नी सांगे, मय ए बुता काय हक ले करेंसे।”

लूका 20:1-8

फंदी कमेयामन चो कटाव

(मत्‍ती 21:33-46; मरकुस 12:1-12)

9 तेबे जीसु लोगमन के कटाव बलुक मुरियालो: “गोटोक मनुक, अंगुर डीरामन के रोपुन, बनबाड़ी के आदेया देउन, खुबे दिन काजे परदेस गेलो।

10 जेबे अंगुर पाक टुटातो बेरा होली तेबे आदेया कमाउ बीतामन लगे अंगुर चो पाक ले आपलो बाटा काजे गोटोक कमेया के पठालो, मानतर आदेया बीतामन हुन कमेया के पेटुन चुचाय हाथे पठाउन दिला।

11 फेर हुन आपलो गोटोक आउर कमेया के पठालो, हुनके बले हुनमन खुबे पेटुन आउर इजित धरुन चुचाय हाथे पठाउन दिला।

12 फेर हुन आपलो तीसर कमेया के पठालो, आउर हुनमन हुनके बले उसने मारा-पेटा करुन खेदला।

13 तेबे हुन अंगुर-बाड़ी चो मालिक बिचार करलो, ‘मय एदांय कसन करेंदे? मय आपलो लाडरा बेटा के पठायंदे, होउक सके कि हुनमन हुनके मान करदे’।

14 जिदलदांय आदेया बीतामन हुनचो बेटा के दखला, तेबे सोर होउन बलला: ‘ए तो मालिक चो बेटा आय, इआ, आमी एके मोरते मारुं आउर आमी मालिक बनु’।

15 आउर हुनमन, हुनके बाड़ी चो बाहरे निसकाउन मोरते मारुन पकाला।

एदांय हुन अंगुर-बाड़ी चो मालिक आदेया बीतामन संगे काय करेदे?

16 हुन एयदे आउर हुन बनबाड़ी कमाउमन के मोरते मारेदे, आउर हुन अंगुर-बाड़ी के दुसर लोगमन के सोपुन देयदे।

एके सुनुन हुनमन बलला: असन केबई नी होओ।”

17 जीसु हुनमन बाटे दखुन बललो: “फेर असन काय काजे लिखलोर आसे:

‘जोन पकना के राज-मिस्‍तरीमन बाकनुन पकाला, हुनी पकना कोना चो मुंडी-पकना होली’।^†

18 जोन कोनी हुन पकना चो उपरे घसरेदे हुन गोंदा-गोंदा होउन जायदे, आउर जेचो उपरे ए पकना घसरेदे हुनके पिसान उलटाउन देयदे।”

19 हुदलीदांय धरम-पंडितमन आउर पुजारीमन चो मुखियामन हुनके धरुक मन करते रला, मानतर लोगमन के दखुन डरला। कसनबलले हुनमन समजला कि असन कहका जीसु हुनीमन के बलेसे।

लूका 20:9-19

कयसर के पट्‍टी देतोर

(मत्‍ती 22:15-22; मरकुस 12:13-17)

20 एईकाजे हुनमन मोहका टाकते रला आउर भेदियामन के जीसु चो पाट-पाट पठाला कि हुनमन, धरमकारी चो भेस धरुन हुनचो कोनी गोट के धरोत, आउर जीसु के राजपालमन आउर हकदारमन चो हाथे सोपुन देओत।

21 हुनमन जीसु के पूछला: “ए गुरु, आमी जानुसे कि तुय नंगत सांगसीस आउर सिखायसीस, आउर कोचई बाटे बले नी होयीस मानतर महापरभु चो बाट के सते सांगसीस।

22 आमी कयसर राजा के पट्‍टी देतोर नंगत आय कि नाई?”

23 जीसु हुनमन चो चलाक के दखुन हुनमन के बललो:

24 “मोके गोटोक सिक्‍का दखाहा।

एथा कोचो नाव आउर छापा आसे?” हुनमन हुनके बलला: “कयसर राजा चो।”

पट्‍टी देतो सिक्‍का (20:24)

25 जीसु हुनमन के बललो: “जोन कयसर चो आय, हुनके कयसर के दियास, आउर जोन महापरभु चो आय, हुनके महापरभु के दियास।”

26 हुनमन लोगमन चो पुरे ए गोट ने हुनके धरुक नी सकला, मानतर हुनचो गोट के सुनुन अचरित होउन ओगाय होला।

लूका 20:20-26

मोरलो थान ले जीव होतोर आउर बिया चो गोट

(मत्‍ती 22:23-33; मरकुस 12:18-27)

27 फेर सदूकिमन जोन बलसोत कि मोरलो लोगमन चो जीव उठतोर नी होए, हुनमन ले आदो एउन जीसु के पूछला,

28 “ए गुरुजी, मोसा आगे आमचो काजे असन लिखुन दिलोसे कि कोचई भाई बिया होउन पिला नोहलो मोरुन गेलोने, हुन मनुक चो भाई, हुन बायले के बिया होउन आपलो भाई काजे पिला जनमाओ।

29 असन ने सात भाई रला, पईल बिया होउन पिला नी जनमालोर मोरुन गेलो।

30 फेर दुसर भाई

31 आउर तीसर भाई बले हुनके बिया होलो, आउर असने होउन सातो भाईमन पिला नोहलो मोरुन गेला।

32 सरासरी ने हुन बायले बले मोरुन गेली।

33 फेर जीव उठलो बेरा हुन कोचो बायले होयदे, कसनबलले हुन तो सातो चो बायले होउन रली?”

34 जीसु हुनमन के बललो: “ए जुग चो लोगमन बिया होयसोत,

35 मानतर जोन लोगमन हुन जुग चो लाईक होदे आउर मोरलो थान ले जीव उठदे, हुनमन बिया नी होदे आउर बिया-दान नी करदे।

36 हुनमन फेर केबई नी मोरदे, कसनबलले हुनमन सरगदूतमन असन अमर होदे आउर जीव उठलो किरता, हुनमन महापरभु चो पिला होदे।

37 मानतर मोसा बले मोरुन जीव उठतो चो बारे ने आपलो जरतो बुटा चो कहनी ने लिखलोसे, जसन हुन, परभु के, अबराहम चो महापरभु, इसहाक चो महापरभु आउर जाकूब चो महापरभु बलेसे।

38 महापरभु तो मोरलोमन चो नाई, मानतर जीवत लोगमन चो महापरभु आय; कसनबलले हुनचो पुरे तो जमाय जीवत आसोत।”

39 असन सुनुन आदो धरम-पंडितमन बलला: “ए गुरु, तुय नंगत बललीस।”

40 आउर फेर हुनमन जीसु के आउर काई पूछतो काजे खुबे डरला।

किरिस्‍त कोचो बेटा आय?

(मत्‍ती 22:41-46; मरकुस 12:35-37)

41 फेर जीसु हुनमन के पूछलो: “कसन ने किरिस्‍त के, पुरखा दाउद चो बेटा बलसोत?

42 दाउद भजन चो किताप ने आपने लिखलोसे:

‘परभु महापरभु मोचो परभु के बललो कि

43 मय तुचो बयरीमन के तुचो पांय खाले करतले

मोचो उजा हाथ बाटे बस’।^†

44 दाउद खुदे किरिस्‍त के परभु बलेसे, फेर हुनचो बेटा कसन ने होयदे?”^*

45 जिदलदांय जमाय लोगमन सुनते रओत, जीसु आपलो चेलामन के बललो:

46 “धरम-पंडितमन ले चेत करुन राहा, जोनमन के लाम-लाम कुड़ता पींदुन बुलते रतोर नंगत लागेसे, आउर जोनमन के हाटमन ने जुहार आउर मंडली-घर ने बड़े आउर सगा-घर ने मंजार चो ठान नंगत लागेसे।

47 हुनमन रांडी बायलेमन चो घरमन के नानागती करसोत आउर दखातो काजे खुबेदांय ले पारथना करते रयसोत; हुनमन खुबे डंड पावदे।”