जरूसलेम ने जय संगे जीसु चो ओलतोर
11
जिदलदांय जीसु आउर चेलामन जरूसलेम सहर चो बेतफगे आउर बेतनिया गांव लगे चो जयतून डोंगरी ने अमरला, तेबे जीसु आपलो चेलामन ले दुयझन के असन बलुन पठालो,
2 “तुमी पुरे चो गांव ने जाहा, आउर हुता अमरते खन गोटोक गदई चो पिला, जेचो उपरे केबई कोनी नी चेगलासे, बांदलोर मिरेदे, हुनके ढीलुन आना।
3 आउर तुमके कोनी पूछले, ‘असन काय काजे करसास?’ तेबे तुमी बला, ‘आमचो गुरु के एचो काम आसे, आउर गदई पिला के हुन झटके फिराउन देयदे’।”
4 आउर हुनमन जाउन गदई पिला के दुआर पुरे बाट रेटे बांदलोर भेटला, आउर हुनके ढीलते रओत।
5 हुन लगे रलो लोगमन ले कोनी-कोनी पूछला: “असन काय काजे करसास? गदई पिला के काय काजे ढीलेसाहास?”
6 हुनमन बलला, आमचो गुरु जीसु के एचो काम आसे, तेबे हुनमन चेलामन के जाउक दिला।
7 आउर हुनमन गदई पिला के जीसु लगे आनुन हुनचो उपरे आपलो फटईमन ओचाला, आउर जीसु हुनचो उपरे बसलो, आउर जरूसलेम बाटे जाउक मुरियालो।
8 तेबे भीड़ ले खुबे लोगमन आपलाहान फटई के सड़क ने ओचाला आउर दुसर लोगमन बेड़ा ले डारामन के टुटाउन सड़क ने ओचाला।
9 आउर जोनमन जीसु चो पुरे-पाटे जाते रओत, किरकिरुन-किरकिरुन बलते रओत,
“होसाना!
हुनचो जय-जय होओ जोन महापरभु चो नाव ने एयसे!†
10 आमचो बुआ दाउद चो
एतो राज, धन-धन आय!
सरग ने बले होसाना!”
11 जीसु, जरूसलेम अमरुन मंदिर ने ईलो, आउर चारो बाटे सपाय तीज के दखुन चेलामन संगे बेतनिया गेलो, कसनबलले सांज होउ रली।
जीसु अंजीर रूक के सराप देयसे
12 दुसर दिने, जिदलदांय हुनमन बेतनिया ले निकरला, तेबे जीसु के भूक लागली।
13 आउर हुन लापी ले गोटोक लस-लसा अंजीर रूक के दखुन हुता काई फर मिरेदे बलुन लगे गेलो; मानतर पाना के छांडुन आउर काई फर नी मिरालो। कसनबलले अंजीर फर फरतो बेरा नी होउ रये।
14 तेबे जीसु रूक के बललो: “आजी ले कोनी तुचो फर के केबई नी खादे!” आउर हुनचो चेलामन सुनते रओत।
जीसु, जरूसलेम चो मंदिर ने जायसे
15 आउर हुनमन फेर जरूसलेम ने ईला, आउर जीसु जहूदीमन चो मंदिर दुआरे गेलो आउर हुता जोनमन बिकतोर-घेनतोर करते रओत, हुनमन के हुन लग ले खेदलो; आउर पयसा-कोहड़ी पलटतो बेपारीमन चो टेबुलमन के आउर परेंया बिकतो बीतामन चो माचीमन के उलटाउन दिलो।
16 आउर जीसु, कोकई काई तीज के मंदिर दुआर बाटले नेउक नी दिलो।
17 जीसु सिखिया देउन हुनमन के बललो: “काय, ए महापरभु चो किताप ने नी लिखलीसे, मोचो घर के सपाय जातमन काजे पारथना चो घर बलदे? मानतर तुमी एके खंगारमन चो ठान बनालासाहास।”†
18 एके सुनुन पुजारीमन चो मुखियामन आउर धरम-पंडितमन जीसु के मोरते मारतो काजे उआट करते रओत; कसनबलले एमन जीसु के डरते रओत, एईकाजे कि सपाय लोग हुनचो सिखिया ले भक्याते रओत।
19 जिदलदांय सांज होली, तेबे जीसु आउर चेलामन सहर ले निकरुन गेला।
अंजीर रूक चो पाठ
20 फेर बड़े बियाने हुनमन जातो बेरा अंजीर चो रूक के बूंद ले सुकलो के दखला।
21 पतरस के हुन गोट सूरता ईली, आउर हुन जीसु के बललो: “ए गुरु, दख, ए अंजीर चो रूक जेके तुय सराप देउ रयीस सुकुन गेलीसे।”
22 जीसु हुनमन के उत्तर दिलो, “महापरभु चो उपरे बिसवास करा।
23 कसनबलले मय तुमके सते बलेंसे, जोन-कोनी ए डोंगरी के बलेदे, ‘तुय उखनी होउन समदूर ने जाउन घसर,’ आउर आपलो मन ने दुक-पुछ नी करे, मानतर बिसवास करेसे कि जोन बलेसे हुन होउन जायदे, तेबे हुनचो काजे उसनेची होयदे।
24 एईकाजे मय तुमके बलेंसे, तुमी काई बले पारथना करुन मांगा आउर बिसवास करा कि तुमके मिरली, तेबे तुमचो काजे होउन जायदे।
25 जिदलदांय तुमी उबा होउन पारथना करासे, तुमचो मन ने कोचई काजे काई बईर आसे जाले, हुनके खेमा करा। तेबे तुमचो सरग चो बुआ बले तुमचो पाप के खेमा करेदे।”
26 (आउर तुमी खेमा नी करलोने, तुमचो बुआ जोन सरग ने आसे तुमचो पाप के बले खेमा नी करेदे।)
जीसु चो हक चो बारे ने
27 हुनमन फेर बोहड़ुन जरूसलेम ने ईला। जिदलदांय जीसु मंदिर चो दुआरे बुलते रये, तेबे पुजारीमन चो मुखियामन, धरम-पंडितमन आउर धरम-सियानमन हुनचो लगे एउन पूछला:
28 “तुय ए बुतामन कोचो हक ले करसीस? आउर ए काम करतो हक, तुके कोन दिलो?”
29 जीसु हुनमन के बललो: “मय बले तुमके गोटोक गोट पूछेंसे, मोके सांगा, तेबे मय बले तुमके सांगेंदे कि ए बुतामन के कोचो हक ले करेंसे।
30 जोन बपतिस्मा जूहन्ना दिलो, काय, महापरभु बाटले रये कि मनुकमन बाटले? मोके सांगा।”
31 तेबे हुनमन आपनमन ने बीचारूक मुरियाला, “आमी महापरभु चो बाटले बललोने, हुन आमके बलेदे; ‘तुमी जूहन्ना चो गोट के कसन बिसवास नी करलास?’