जीसु, बायले के नी छांडतो बारे ने सांगेसे
10
जीसु हुताले उठुन जहूदिया राज बाटले जरदन नंदी चो हुन पाट गेलो। आउर भीड़ फेर हुनचो लगे कुड़ा होला, आउर जीसु हुनमन के महापरभु चो गोट सिखाउक मुरियालो।
2 तेबे फरीसीमन हुनचो लगे एउन मन बुझतो काजे पूछला: “काय, ए नंगत आय, मनुक आपलो बायले के छांडुन देओ?”
3 जीसु हुनमन के बललो: “मोसा तुमके काय हुकुम दिलोसे?”
4 फरीसीमन बलला: “मोसा तो छांडा-छांडी होतो कागत लिखुन बायले के छांडतो काजे बललोसे।”
5 जीसु हुनमन के बललो: “तुमचो मन चो कटुर किरता ने हुन तुमचो काजे असन हुकुम लिखलोसे।
6 मानतर संवसार चो मूर ले ‘महापरभु मनुक आउर बायले के बनालोसे’।†
7 एईकाजे मनुक आपलो आया-बुआ ले अलगे होउन आपलो बायले संगे रयदे, आउर हुन दुनो गोटकी देहें होदे।†
8 एईकाजे हुनमन एदांय दुयठन देहें नाई, गोटकी देहें आत।
9 एईकाजे जेके महापरभु जोड़लोसे, हुनके मनुक अलगे नी करो।”
10 फेर चेलामन एचो बारे ने, घरे जीसु के पूछला।
11 जीसु हुनमन के बललो: “जोन कोनी आपलो बायले के छांडुन दुसर बायले के बिया होयदे, हुन आगे चो बायले चो बिरुद पाप करेसे।
12 आउर बायले आपलो मनुक के छांडुन दुसर संगे बिया होयदे, तो हुन बेबिचार करेसे।”
जीसु नानी पिलामन के बर देयसे
13 फेर लोगमन पिला-झीलामन के जीसु लगे आनुक मुरियाला कि हुन पिलामन उपरे हाथ थापुन बर देओ, मानतर चेलामन हुनमन के चिड़चिड़ाय होला।
14 जीसु एके दखुन रीस होउन चेलामन के बललो: “पिलामन के मोचो लगे एउक दियास, हुनमन के नी अटकाहा; कसनबलले महापरभु, चो राज असनीमन चो आय।
15 मय तुमके सते बलेंसे, जोन कोनी पिलामन असन महापरभु चो राज के नी मानलोने, हुन सरग राज ने केबई ओलुक नी सके।”
16 जीसु पिलामन के कोरा ने धरलो, आउर हुनमन चो उपरे हाथ थापुन बर दिलो।
गोटोक सवकार मनुक
17 जिदलदांय जीसु हुताले निकरुन, बाटे बाट जाते रये, तेबे गोटोक मनुक हुनचो लगे पराते ईलो, आउर हुनचो पुरे मांडिखुटा देउन हुनके पूछलो: “ए नंगत गुरु! जुग-जुग चो जीव पावतो काजे मय काय करेंदे?”
18 जीसु हुनके पूछलो: “तुय मोके नंगत गुरु काय काजे बलसीस? कोनी नंगत नोआय, महापरभु एकलाय ची नंगत आय।
19 तुय महापरभु चो हुकुममन के जानसीस: ‘माने-मारा नी होओ, बेबिचार नी कर, नी चोर, फंद गवई नी देस, धोका नी देस आउर आपलो माय-बाप चो इजित-मान कर’।”†
20 हुन जीसु के उत्तर दिलो, ए गुरु, ए सपाय हुकुममन के तो मय पिला-बेरा ले मानते एयंसे।
21 जीसु हुनके दखलोके मया लागली, आउर हुनके बललो, तुचोने गोटकी गोट चो उना आसे: जा, जोन काई तुचो लगे आसे हुनके बिकुन गरीब-धुरीबमन के देस, आउर तुके सरगपुर ने धन मिरेदे, आउर तुय मोचो पाटे आव।
22 ए गोट के सुनुन, हुनचो थोतना उतरुन गेली आउर हुन मुरुसनाय होउन जाते गेलो, कसनबलले हुन खुबे सवकार रये।
23 जीसु भोंवरक दखुन आपलो चेलामन के बललो, सवकारमन के महापरभु चो राज चो हक ने एतोर कितरो खट-खट आय।
24 चेलामन हुनचो गोट के सुनुन भक्याला। एईकाजे जीसु फेर हुनमन के बललो, ए बेटामन, जोन धन उपरे, भोरसा संगायसोत, हुनमन काजे महापरभु चो राज ने ओलतोर कितरो खट-खट आय!
25 सवकारमन, महापरभु चो राज ने ओलतोर ऊंट, सूजी काना ले निकरतो ले बले जुगे खट-खट आय।
बारुसरा ने हिंडतो ऊंट (10:25)
26 तेबे चेलामन खुबे भक्याउन आपनेमन गोटेयाउक मुरियाला, तो फेर कोचो मुक्ति होउक सके?
27 जीसु हुनमन बाटे दखुन बललो, मनुकमन ले आपलो मुक्ति नी होउक सके, मानतर महापरभु ले होउक सके। कसनबलले महापरभु ले सपाय होउक सके।
28 पतरस, जीसु के बलुक मुरियालो, दख, आमी तो सपाय के छांडुन तुचो पाट-पाट ईलुसे।
29 जीसु बललो, मय तुके सते सांगेंसे, जोन मोचो काजे आउर नंगत खबर सुनातो काजे आपलो घर, भाई-बईनमन, माय-बाप, पिला-झीला आउर धन-माल के छांडलासे:
30 हुनमन के सव गुना आगर घरमन, भाई-बईनमन, माय, पिला-झीलामन आउर बेड़ा-खाड़ामन एदांय, ए बेरा मिरेदे, मानतर दुख-तकलीस संगे मिरेदे। आउर एतो समया ने जुग-जुग चो जीव मिरेदे।
31 मानतर एबे जोन बड़े आत, हुनमन नानी होदे आउर एबे जोन नानी आत, हुनमन बड़े होदे।
जीसु तीसर हार आपलो मोरना चो बारे ने सांगेसे
32 जीसु आउर हुनचो संगे रतो लोग जरूसलेम बाटे जाते रओत, आउर जीसु हुनमन चो पुरे-पुरे जाते रये; हुनचो चेलामन भक्याला आउर जोनमन हुनचो पाटे-पाटे एते रओत डरला। जीसु फेर हुन बाराझन के हुन गोटमन के सांगुक मुरियालो, जोन आपलो उपरे एतो बिती रये।
33 “दखा, आमी जरूसलेम ने जाउंसे, आउर मय मनुक चो बेटा के पुजारीमन चो मुखियामन आउर धरम-पंडितमन चो हाथे धरादे, आउर हुनमन मोके मोरना चो डंड देउन बिजातीमन चो हाथे सोपुन देदे।
34 आउर हुनमन, मोके हांसुन पकादे, मोचो उपरे थूकदे, कोड़ा ने मारदे, मोके मोरते मारदे आउर तीन दिन चो पाछे मय जीउन उठेंदे।”
जाकूब आउर जूहन्ना चो मांग
35 तेबे जबदी चो बेटामन जाकूब आउर जूहन्ना, जीसु लगे एउन बलला, ए गुरु, आमी मन करुंसे कि आमी काई बले मांगुंदे, तुय हुनी आमचो काजे कर।
36 जीसु हुनमन के बललो, तुमके काय भायसे कि मय तुमचो काजे करें?
37 हुनमन जीसु के बलला, तुचो मयमा बेरा आमीमन ले एकलो के तुचो उजा हाथ बाटे, आउर दुसर के डेबरी हाथ बाटे बसुक देस।
38 जीसु हुनमन के बललो, तुमी नी जानास कि काय मांगसास? जोन दुख चो बटका के मय पीवतो काजे होलेसे काय, तुमी पीउक सकास? आउर जोन मोरना चो बपतिस्मा धरतो काजे होलेसे काय, तुमी धरुक सकास?
39 हुनमन जीसु के बलला, हव, आमचो ले होउक सके। जीसु हुनमन के बललो, जोन दुख चो बटका के मय पीयेंदे, हुनके तुमी बले पीउक सकास आउर जोन मोरना चो बपतिस्मा मय धरेंदे, हुनके तुमी बले धरुक सकास।
40 मानतर जोनमन काजे महापरभु तियार करलोसे, हुनमन के छांडुन आउर कोकई मोचो उजा हाथ बाटे आउर डेबरी हाथ बाटे बसातोर मोचो काम नोआय।
41 असन सुनुन दसो चेलामन जाकूब आउर जूहन्ना चो उपरे रीस होउक मुरियाला।
42 आउर जीसु चेलामन के लगे हागदेउन बललो, बिजातीमन उपरे राज करतो बीतामन, हुनमन उपरे खुबे हक संगाउआत, आउर मुखियामन हुनमन उपरे राज करुआत।
43 मानतर तुमचो मंजिगते असन नी होओ: जोन कोनी तुमीमन ले बड़े होउक मन करेसे, हुन तुमचो सेवा करतो बीता होओ।
44 आउर जोन कोनी तुमीमन ने मुखिया होउक खोजेसे, हुन सपाय चो कमेया बनो।
45 कसनबलले मय मनुक चो बेटा सेवा करातो काजे नाई, मानतर दुसर चो सेवा करतो काजे आउर खुबे लोगमन के पाप ले छंडातो काजे मोचो जीव देउक ईलेसे।
जीसु, बरतिमाई काना के दखतो सकत देयसे
46 जीसु आउर हुनचो चेलामन जरीहो गांव ने अमरला। जिदलदांय जीसु, हुनचो चेलामन आउर गोटोक बड़े भीड़ संगे जरीहो ले निकरला, तेबे तिमाई चो बेटा बरतिमाई काना मुटीमांगु बीता सड़क रेटे बसु रलो।
47 हुन काना, “जीसु नासरतेया” आय सुनुन, चिचियाउन-चिचियाउन बललो, ए दाउद बंस चो बेटा, जीसु! मोके जीव दुख।
48 आउर खुबे लोग हुनके दागा देउन बलला, “ओगाय रा”, मानतर हुन आउर अदिक चिचियाउक मुरियालो: “ए दाउद चो बेटा, मोके जीव दुख।”
49 तेबे जीसु ठेबुन बललो, हुनके हागदियास, आउर लोगमन काना के बलला, ढाढ़ुस कर, उठ, जीसु तुके हागदेयसे।
50 हुन आपलो फटई के पकाउन झटके उठलो आउर जीसु लगे ईलो।
51 जीसु हुनके बललो: तुय काय मन करसीस कि मय तुचो काजे करें। काना हुनके बललो, ए गुरु मोके दखुक होओ।
52 जीसु हुनके बललो, जा तुचो बिसवास तुके नंगत करली। आउर हुन तूरते दखुक मुरियालो आउर बाटे हुनचो पाट-पाट गेलो।