जीसु चो रूप बदलतोर
9
जीसु हुनमन के बललो: “मय तुमके सते बलेंसे कि जोनमन एथा उबा आसोत, हुनमन ले कोनी-कोनी असन आसोत कि जिदलदांय ले महापरभु चो राज के सकत संगे ईलोर नी दखदे, हुदलदांय ले हुनमन नी मोरदे।”
2 छय दिन चो पाछे, पतरस, जाकूब आउर जूहन्ना के जीसु संगे नीलो आउर गोटोक डेंग डोंगरी ने गेलो हुता आउर कोनी नी रओत; आउर हुनमन चो पुरे जीसु चो रूप बदलली।
3 हुनचो फटई, असन बरूक मुरियाली आउर एकदांय इतरो पंडरा होली कि संवसार चो कोनी धोबी बले असन पंडरा नी करुक सके।
4 आउर हुनमन के मोसा संगे, एलिया दखा दिलो; हुनमन जीसु संगे गोटेयाते रओत।
5 तेबे पतरस जीसु के बललो: “ए गुरुजी, आमके एथा रतोर नंगत आय: आमी तीनठन छापर बनाउंदे, गोटोक तुचो काजे, गोटोक मोसा काजे, आउर गोटोक एलिया काजे।”
6 पतरस नी जानते रये कि काय बलतोर आय, कसनबलले हुनमन खुबे डरते रओत।
7 आउर बादरी हुनमन के ढाकली, आउर हुन बादरी थान ले असन राग निकरली: “ए मोचो लाडरा बेटा आय, हुनचो गोट के सुना।”
8 तेबे हुनमन तूरते भोंवरक दखला आउर जीसु के छांडुन आपलो संगे आउर कोकई नी दखला।
9 आउर डोंगरी ले उतरतो बेरा, जीसु हुन तीनो चेलामन के हुकुम दिलो कि जिदलदांय ले मनुक चो बेटा मोरलो थान ले जीव नी उठे, हुदलदांय ले जोन बले तुमी दखलासाहास कोकई नी सांगा।
10 एईकाजे हुनमन ए गोट के मानला, आउर आपनमन गोट-बात करला: “मोरलो थान ले जीउन उठतो चो काय अरथ आय?”
11 आउर हुनमन जीसु के पूछला: “धरम-पंडितमन, काय काजे बलसोत कि एलिया चो आगे एतोर पक्का आय?”
12 जीसु हुनमन के बललो: “एलिया सते आगे एउन सपाय के सुदरायदे, आउर काय तुमी जानास कि असन काय काजे सास्तर ने लिखलीसे, मनुक चो बेटा खुबे दुख उठायदे, आउर लोगमन हुनके हिनस्ता करदे?
13 मानतर मय, तुमके बलेंसे, एलिया ईलोसे, आउर जसन हुनमन के मन रये उसने एलिया के करला। हुनचो बारे ने धरमसास्तर ने लिखलोर आसे।”
जीसु गोटोक देव-भूत धरलो लेका के उजरायसे
14 जिदलदांय जीसु आउर तीनो चेलामन भीड़ लगे ईला, तेबे दखला कि चेलामन चो भोंवरक खुबे लोगमन कुड़ा होलासे आउर धरम-पंडितमन हुनमन संगे बला-बोली होते रओत।
15 जीसु के दखते खन सपाय लोगमन भक्याला आउर हुनचो बाटे पराउन हुनके जुहार करला।
16 जीसु हुनमन के पूछलो: “तुमी एमन संगे काय काजे बला-बली होयसास?”
17 भीड़ थान ले गोटोक मनुक जीसु के सांगलो: “ए गुरु, मय मोचो बेटा जेके देव-भूत मूका बनालीसे, तुचो चेलामन लगे आनु रयें।
18 जिदलदांय हुनके देव-भूत धरेसे हुताय कचाड़ेसे; आउर हुनचो टोंड ले लार बोहेसे, आउर दात कडरेसे, आउर हुन तानी होयसे। मय तुचो चेलामन के गुहारले कि हुनमन देव-भूत के निकराउन देओत, मानतर हुनमन निकराउक नी सकला।”
19 असन सुनुन जीसु, चेलामन के बललो: “ए बिसवास नी करतो लोगमन, मय केबले तुमचो संगे रयंदे? आउर केबले तुमके सहेंदे? लेका के मोचो लगे आन।”
20 हुनमन लेका के जीसु लगे आनला, आउर जिदलदांय देव-भूत जीसु के दखली, तेबे हुन तूरते लेका के मांज किंदराउन भुंये घसराली, आउर टोंड ले लार बोहाते अलट-बिलट करली।
21 आउर जीसु हुन लेका चो बुआ के पूछलो: “एके ए गती केबले आय?”
22 हुन, जीसु के सांगलो: “पिला बेरा ले, देव-भूत एके मोरातो काजे केबे आईग ने आउर केबे पानी ने खुबे हार लोंडायसे; मानतर तुय काई करुक सकीस जाले, आमचो उपरे जीव दुखुन आमचो साहरा कर।”
23 जीसु हुनके बललो: “तुय बलसीस, काय तुय करुक सकीस! जेचो लगे बिसवास आसे, हुनचो काजे महापरभु सपाय करुक सके।”
24 तेबे लेका चो बुआ गागुन तूरते बललो: “ए परभु, मय बिसवास करेंसे; मोचो साहरा कर कि मोके पक्का बिसवास करुक होओ।”
25 जिदलदांय जीसु दखलो कि लोगमन आउर भीड़ होते रओत, तेबे जीसु, देव-भूत के असन बलुन दागा दिलो, “तुय देव-भूत, लोगमन के मूका आउर भयरा बनाउआस, मय तुके हुकुम देयंसे, लेका थान ले निकरुन जा, आउर हुनके केबई नी धर।”
26 तेबे देव-भूत किरकिरुन आउर लेका के खुबे अलटुन निसकली, तेबे लेका मोरलो असन होलो; आउर खुबे लोगमन बलला, हुन मोरलो।
27 मानतर जीसु हुनचो हाथ धरुन उठालो, आउर हुन उबा होलो।
28 आउर जिदलदांय जीसु घरे ईलो, तेबे हुनचो चेलामन कोनी नी रलो बेरा पूछला: “आमी हुन देव-भूत के कसन निसकाउक नी सकलु?”
29 जीसु हुनमन के बललो: “असन देव-भूत के, पारथना के छांडुन आउर काई दुसर उपाय ले निकराउक नी होए।”
जीसु आपलो मोरना चो बारे ने फेर बलेसे
30 फेर हुनमन हुताले गेला, आउर गलील परघन बाटले जाते रओत, आउर जीसु मन करते रये कि हुनचो जातो बारे ने कोनी नी जानोत।
31 कसनबलले जीसु आपलो चेलामन के सिखाते रये आउर हुनमन के बलते रये, “मय मनुक चो बेटा के मनुकमन चो हाथे धरादे, आउर हुनमन मोके मारुन पकादे; आउर मय मोरलो चो तीन दिन पाछे जीव उठेंदे।”
32 मानतर ए गोट चेलामन चो समज ने नी ईली, आउर हुनमन जीसु के पूछतो काजे डरते रओत।
सबुले बड़े कोन आय
33 फेर हुनमन कफरनहूम ने ईला; आउर घरे एउन जीसु, हुनमन के पूछलो: “बाटे तुमी काय गोट-बात करते राहास?”
34 हुनमन ओगाय होउन रओत, कसनबलले बाटे हुनमन गोटोक-दुसर ले असन गोट-बात करते रओत, आमीमन ले कोन बड़े आय?
35 तेबे जीसु बसलो आउर आपलो बारा चेलामन के लगे हागदेउन बललो: “जोन सबुले बड़े होउक खोजेसे, हुन सबुले नानी आउर सपाय चो कमेया होओ।”
36 आउर जीसु गोटोक लेका के हुनमन चो मंजिगते उबा करलो; आउर हुनके कोरा ने धरुन हुनमन के बललो:
37 “जोन कोनी मोचो नाव ने असन पिला के मानसोत, हुन मोके मानसोत; आउर जोन कोनी मोके मानसोत, हुन मोके नाई, मानतर मोके पठालो महापरभु के मानसोत।”
जोन आमचो बिरुद नोआंय, हुन आमचो बाटे आय
38 तेबे जूहन्ना, जीसु के बललो: “ए गुरु, आमी गोटोक मनुक के तुचो नाव ने देव-भूतमन के निकरातो के दखलु, आउर आमी हुनके मना करलु, कसनबलले हुन आमचो संग चो नोआय।”
39 जीसु बललो: “हुनके मना नी करा, कसनबलले असन कोनी नीआत जोन मोचो नाव ने अचरित बुता करो, आउर तूरते मोके अडरा बलुक सको।
40 कसनबलले जोन आमचो बिरुद काम नी करे, हुन आमचो बाट चो आय।
41 मय तुके सते बलेंसे, कोनी बले तुमके किरिस्त चो आहास जानुन पीवतो काजे गोटोक कसला पानी देयसे, हुनके हुनचो फर मिरेदे ची।”
पाप के परखतोर
42 “मानतर मोचो उपरे बिसवास करतो ए नानीमन ले, कोकई बले कोनी पाप करायसे जाले, हुनचो काजे नंगत ए आय कि गोटोक बड़े जता-पकना हुनचो टोडरा ने ओराउन हुनके समदूर ने पकाउन देओत।
43 आउर तुचो हाथ, तुके पाप करायसे जाले, हुनके काटुन देस; आउर तुचो काजे ठोटा होउन जुग-जुग चो जीव ने ओलतोर, दुनो हाथ रउन बले नरक-कुंड चो आईग ने पकातोर ले नंगत आय, जोन आईग केबई नी बुते।
44-45 आउर तुचो पांय तुके पाप करायसे जाले, हुनके काटुन देस। तुचो काजे खोड़ेया होउन जुग-जुग चो जीव ने ओलतोर, दुनो पांय रउन बले नरक-कुंड चो आईग ने पकातोर ले नंगत आय, जोन आईग केबई नी बुते।
46-47 आउर तुचो आंईक तुके पाप करायसे जाले, हुनके निकराउन देस; आउर तुचो काजे काना होउन महापरभु चो राज ने ओलतोर, दुनो आंईक रते बले नरक-कुंड ने पकातोर ले नंगत आय,
48 जोन थाने कीड़ामन नी मोरोत आउर आईग नी बुते।†
49 जसन लोन ले खर करुआय, असने ची आईग ले खर करेदे।
50 लोन नंगत आय, मानतर लोन चो खर गेलोने, हुनचो खर के फेर कसन ने आनुक होउआय? तुमचो ने लोन चो गुन संगाहा, आउर तुमी गोटोक-दुसर ले मिलुन-मिसुन राहा।”