कोकई धोका नी दियास
17
जीसु आपलो चेलामन के बललो: “पाप चो परखतोर होउ ची आय, मानतर जोन मनुक किरता परखतोर होयसे, हुनचो उपरे सराप!
2 कोनी बले ए नानीमन ले गोटोक के पाप करायसे जाले, हुनचो काजे ए नंगत आय कि हुनचो टोडरा ने जता-पकना ओराउन समूंद ने पकाउन देओत।
3 एईकाजे चेत करुन राहा; तुचो भाई तुचो उलटा काई पाप करेसे जाले हुनके दागा देउन समजाव, आउर हुन पसतायसे जाले हुनके खेमा करुन देस।
4 दिनभर ने सात हार हुन, तुचो बिरुद पाप करेसे आउर सातो हार हुन, तुचो पुरे एउन, ‘मय पसतायंसे’ बलेसे जाले, तुय हुनके खेमा करुन देस।”
लूका 17:1-4
5 तेबे पठालो-लोगमन (चेलामन) परभु के बलला: “आमचो बिसवास चो बाड़ती कर।”
6 परभु बललो: “तुमचो लगे नानी सरसुन बीचा इतरो बिसवास आसे जाले, ए तुतुपाक चो रूक के बला कि तुय चेर संगे उखनी होउन समूंद ने रोपी हो, तेबे हुन तुमचो हुकुम के मानेदे।
7 तुमीमन ने असन कोन आसे, जेचो कमेया नांगर फांदेसे नोहले मेंडा चरायसे, आउर हुन बेड़ा बाटले ईलो बेरा हुनके बलदे कि तूरते एउन खाउक बस?
8 आउर असन नी बले कि मोचो भात-पेज तियार कर, आउर जिदलदांय ले मय नी खायें, हुदलदांय ले करांड के बांधुन मोचो सेवा-बुता कर, पाछे तुय बले खासे?
9 काय, मालिक हुन कमेया चो धन-धन करेदे, जोन हुनीची बुता के करलो जेचो हुकुम हुनके मिरुन रये?
10 असने बरन ले तुमी बले, जेबे हुन जमाय बुता के सारलो पाछे जेके करतो चो हुकुम तुमके देउन रये, तेबे बला, ‘आमी कमेया आंव, आमके जोन बुता करतोर रये हुनकेची करलुसे’।”
दसझन कोढ़ बेमार बीतामन के छुक-छुका करतोर
11 एचो पाछे जीसु जरूसलेम जाउक निकरलो आउर हुनके सामरिया आउर गलील परघन चो मंजिगता ले जातोर रये।
12 तेबे जीसु के कोनी गांव चो भीतरे ओलतो बेरा दसझन कोढ़ बेमार मनुकमन भेटला।
13 हुनमन फयले उबा होउन जोर ले चिचियाउन बलला: ए जीसु मालिक, आमके जीव दुख!
14 जीसु हुनमन के दखुन बललो: “जाहा, आउर खुद के पुजारीमन के दखाहा।” तेबे हुनमन जाते रओत आउर बाटे-बाटे बेमार ले छुक-छुका होला।
15 हुनमन ले गोटोक मनुक जिदलदांय जानलो कि हुन बेमार ले छुक-छुका होलो, तेबे हुन बड़े राग ले महापरभु चो जय-जय करते बोहड़लो,
16 हुन जीसु के जलजला पांय पड़ुन जुहार करलो, हुन सामरेया रये।
17 एके दखुन जीसु बललो: “काय, जमाय छुक-छुका नी होला? फेर हुन नवझन मनुकमन कहां आसोत?
18 काय, ए परदेसी के छांडुन महापरभु के धन-धन करतो काजे आउर कोनी नी निकरला?”
19 तेबे जीसु हुनके बललो: “उठुन जा, तुचो बिसवास तुके छुकनाय करलीसे।”
महापरभु चो एतो राज
20 गोटोक हार फरीसीमन जीसु के पूछला: महापरभु चो राज केबे एउआय? तेबे जीसु हुनमन के बललो: “महापरभु चो राज चीना संगे दखतो असन नी एये।
21 कोनी बलुक नी सकदे, ‘दखा, महापरभु चो राज एथा आसे!’ नोहले ‘हुता आसे!’ कसनबलले दखा, महापरभु चो राज तुमचो मंजिगता आसे।”
22 जीसु आपलो चेलामन के बललो: “हुन बेरा एयसे, जेबे तुमी मनुक चो बेटा चो राजपाट चो गोटोक दिन के दखुकलाय मन करासे, मानतर तुमके दखुक नी मिरे।
23 लोगमन तुमके बलदे: दखा, हुन एथा आसे! नोहले हुता आसे! मानतर तुमी जाते नी जाहासे आउर हुनमन चो पाटे नी होआसे।
24 जसन बादरी चो गोटोक कोना ले पानी जागुन छिक-छाक होयसे आउर दुसर कोना ने बरेसे, उसनेची मनुक चो बेटा बले आपलो एतो दिने होयदे।
25 मानतर जरुर आय कि हुन आगे डंड पायदे, आउर ए जुग चो लोगमन हुनके काई नी समजदे।
26 जसन नूह चो दिने होउन रली, उसने मनुक चो बेटा चो दिने बले होयदे।
27 नूह डोंगा ने चेगलो आगे, लोगमन खाते-पीवते, बिया-दान करते रला, तेबे बड़े पूर एउन हुनमन सपाय के बुड़ाउन मोराली।
28 आउर असने लूत चो दिने बले सदोम चो लोगमन खाते-पीवते, दिया-ठोआ करते, रोपते आउर घर बनाते रला,
29 मानतर जोन दिने लूत सदोम सहर ले निकरलो हुनी दिने आईग आउर गंधक बादरी ले घसरली आउर जमाय के डसाउन दिली।
30 मय मनुक चो बेटा, दखा देतो दिने बले असने ची होयदे।
31 हुन दिने कोनी छानी उपरे आसे आउर हुनचो जाकमन खाले घरे आसे जाले, हुनके नेतो काजे खाले नी उतरो; उसने बेड़ा ने रलो बीता घरे नी बोहड़ो।
32 लूत चो बायले के सूरता करा!*
33 जोन मनुक आपलो जीव के बचाउक मन करेसे, हुन हुनके हजायदे, आउर जोन आपलो जीव के हजायदे हुन आपलो जीव के बचायदे।
34 जीसु बललो: मय तुमके बलेंसे हुनी राती दुयझन गोटकी खटेया ने रदे, गोटोक के नेयदे आउर दुसर के छांडेदे।
35 दुयझन बायलेमन गोटकी जता ने रुचते रदे, गोटोक के नेयदे आउर दुसर के छांडेदे।”
36 (दुयझन बेड़ा ने होदे, हुताले गोटोक के नेयदे आउर दुसर के छांडेदे।)
37 असन सुनुन चेलामन जीसु के पूछला: “ए परभु, ए जमाय कहां होयदे? जीसु हुनमन के बललो: जोन थाने मोड़ी आसे, हुता गिदाहामन जुहा होदे।”