चलाक भंडारी
16
फेर हुन आपलो चेलामन के बले बललो: “कोनी सवकार मनुक चो धन-माल के संमालतो बीता गोटोक भंडारी रलो, आउर लोगमन सवकार चो पुरे हुन भंडारी के बदी देउक मुरियाला कि हुन जमाय धन-माल के फोकाहा सारेसे।
2 तेबे सवकार हुनके हागदेउन पूछुक मुरियालो, ‘मय तुचो बारे ने कसन गोटमन के सुनेसे? तुय मोके जमाय जाकमन चो हिसाब देस। कसनबलले आजी ले ए पाट तुय मोचो भंडारी नी रउक सकीस’।
3 तेबे हुन भंडारी बिचार करुक मुरियालो, ‘मय एदांय काय करेंदे? मोचो मालिक तो मोके बुता ले निकरायसे। माटी के तो मय खनुक नी सके, आउर भीक मांगतो ने मोके लाज लागेसे।
4 मोके भंडारीपन ले निकराउन दिलो पाछे लोगमन मोके हुनमन चो घरमन ने मान करतो काजे काय करतोर आय? मय समजले’।
5 हुन आपलो मालिक चो लागा खादलो लोगमन के गोटोक-गोटोक करुन हागदिलो आउर पूछुक मुरियालो आउर पईल के हुन पूछलो, ‘मोचो मालिक चो तुय कितरो लागा लागिस?’
6 हुन बललो, ‘दुय हजार पयली तेल’। तेबे भंडारी हुनके बललो, ‘आपलो कागत-पतर के धर आउर हुता तूरते हजार लिख’।
7 फेर हुन दुसर के पूछलो, ‘तुय कितरो लागा लागिस?’ हुन बललो, ‘सव खंडी गउं’, तेबे हुन बललो, ‘आपलो कागत-पतर के धर आउर तुय हुनके अस्सी लिखुन देस’।
8 आउर मालिक हुन ओधरमी मनुक के खुबे सहरालो कसनबलले हुन खुबे चलाक होउन बुता करुन रये। असने ची ए संवसार चो लोगमन आपलो जुग चो लोगमन संगे उजर चो लोगमन ले अदिक चलाक आसोत।”
9 जीसु आउर बललो, मय तुमके बलेंसे ओधरम चो धन, बललोने संवसार चो धन ले आपलाहान काजे संगवारीमन बनावा, कसनबलले हुन धन सरले, हुनमन जुग-जुग चो घरे तुमके जुहार-भेट करदे।
10 “जोन खिंडिक ने सतधरमी आसे, हुन आगर ने बले सतधरमी आय; आउर जोन खिंडिक ने ओधरमी आसे, हुन आगर ने बले ओधरमी आय।
11 तुमी ओधरम चो धन ने पतेयातो लाईक नीआहास जाले, कोन तुमके सत चो धन के सोपेदे?
12 तुमी दुसर चो धन ने सतधरमी नीआहास जाले तुमचो धन, तुमके कोन देयदे?
13 कोनी बले कमेया दुयझन मालिक चो सेवा-बुता नी करुक सके: कसनबलले गोटोक संगे तो हुन बईर करेदे आउर दुसर के हुन मया करेदे, नोहले गोटोक संगे तो हुन मिसुन रयदे आउर दुसर के मुरे मान नी करेदे। तुमी महापरभु आउर धन दुनो चो कमेया होउक नी सकास।”
14 फरीसीमन धन चो लालची रला, हुनमन जीसु चो गोट के सुनुन हुनके हांसी-मंजाक करला।
15 जीसु हुनमन के बललो: “तुमी मनुकमन चो पुरे खुद के धरमाती बनायसाहास, मानतर महापरभु तुमचो मन के जानेसे, कसनबलले जोन जाक, मनुकमन चो नंजर ने बड़े-मान चो आय, हुन महापरभु चो नंजर ने घिन-घिना आय।
16 जीसु बललो: मोसा दिलो नियम-कानुनमन आउर अगमजानीमन सांगलो गोट, जूहन्ना बपतिस्मा देतो बीता ले तुमके बाट दखाते रली, हुन बेरा ले महापरभु चो राज चो नंगत खबर सुनाते एयसे, जमाय लोगमन बेरपेला भीतरे ओलसोत।
17 बादरी आउर मंजपुर नसुन जायदे मानतर महापरभु चो कानुनमन ले गोटोक अखर बले फंद नी होउक सके।
18 जोन मनुक आपलो बायले के छांडुन दुसर के बिया होयसे, हुन मनुक बेबिचार करेसे, आउर जोन मनुक असन छांडलो बीती बायले के बिया होयसे, हुन बले बेबिचार करेसे।”
सवकार आउर गरीब लाजर
19 “गोटोक सवकार मनुक रये, हुन खुबे मोल बिती बांगा रंग चो मकमल फटईमन पींदते रये आउर खुबे हरिक-उदीम चो जीवना जीवते रये।
20 आउर गोटोक गरीब मनुक जेचो नाव लाजर रये, हुनचो देहें ने खुबे घावमन होउन रये, हुनके सवकार चो बाट-डेवना लगे अमराउन दिला,
21 आउर हुन असन मन करे कि सवकार चो टेबुल थान ले घसरलो झूटा ले आपलो पेट भरो, कुकुर बले एउन हुनचो घावमन के चाटुन जाओत।
22 गोटोक दिने, गरीब लाजर मोरुन गेलो। सरगदूतमन हुनके अबराहम चो कोरा ने अमराउन दिला। हुन सवकार बले मोरुन गेलो आउर माटी दिला,
23 आउर पतालपुर चो, नी सहुक सकतो डंड ने पड़ुन आपलो आंईक के उपरे करलो आउर खुबे लापी ले अबराहम चो कोरा ने लाजर के बसलोर दखलो।
24 हुन चिचियाउन बललो, ‘ए बुआ अबराहम, मोचो उपरे जीव दुखुन लाजर के पठाउन देस कि हुन आपलो अंडकी चो टीप के पानी भीजाउन मोचो जीब के सितर करो, कसनबलले मय ए ढग-ढकतो आईग ने खुबे कलपडाहा होयंसे’।
25 तेबे अबराहम हुनके बललो, ‘ए बेटा, सूरता करुन दख कि तुय आपलो जीवना बेरा नंगत-नंगत तीजमन के पावलीस आउर लाजर अडरा तीजमन के। मानतर एबे हुन एथा अस्तिर ने आसे, आउर तुय हुता कलपडाहा होयसीस।
26 मानतर ए गोटमन के छांडुन दिले बले, आमचो आउर तुचो मंजिगता ने खुबे बड़े खोदरा तियार करलोर आसे, एईकाजे कोनी बले ए थान ले हुन पाट जाउक मन करेसे हुन नी जाउक सके, आउर कोनी हुन पाट ले ए पाट आमचो लगे नी एउक सके’।
27 सवकार बललो, ‘ए बुआ, असन आय जाले मय तुके गुहारेंसे कि तुय हुनके मोचो बुआ चो घरे पठाउन देस,
28 मोचो पांचझन भाई आसोत, लाजर हुनमन के चेत करुन देओ; नोहले हुनमन बले ए थाने भुगतमान पावदे’।
29 अबराहम हुनके बललो, ‘हुनमन लगे मोसा आउर अगमजानीमन चो कितापमन तो आसे, हुनीमन के पढ़ोत’।
30 सवकार बललो, ‘नाई, बुआ अबराहम, मोरलो लोगमन थान ले कोनी जीव होउन हुनमन लगे गेलोने हुनमन मन बोहड़ादे’।
31 अबराहम हुनके बललो, ‘हुनमन मोसा आउर अगमजानीमन चो कितापमन चो गोट के सत नी करोत जाले, मोरलो थान ले कोनी जीव होलोने बले नी पतेयादे’।”