रांडी बायले आउर नियावकारी
18
जीसु आपलो चेलामन के अमदेया पारथना करतो आउर भोरसा केबई नी छांडतो काजे गोटोक कटाव सांगलो:
2 “कोनी सहर ने गोटोक नियावकारी रये, हुन महापरभु के आउर कोनी मनुक के नी डरते रये।
3 हुनी सहर ने गोटोक रांडी बायले बले रते रये, हुन बायले घन-घन हुनचो लगे एउन-एउन बलते रये, ‘मोचो नियाव करुन देस, मोके नियाव लड़तो बीता ले बचाव’।
4 हुन खुबे दिन ले हुनचो गोट के नी मानलो, मानतर सरासरी ने बिचार करलो आउर बललो, ‘सत आय कि मय महापरभु के नी डरें, आउर मनुकमन के बले नी मानेंसे।
5 तेबले-बले ए रांडी बायले मोके असकट करुन दिलीसे, एचई किरता मय एचो नियाव करुन देयंदे, नोहले ए बायले मोचो लगे घन-घन एउन मोके थकाउन पकायदे’।”
6 परभु बललो: “सुना, ए ओधरमी नियाव करतो बीता काय बलेसे?
7 काय, महापरभु आपलो बाछलो लोगमन चो नियाव नी करेदे, जोन दिन-रात हुनके गुहारते रयसोत? काय, हुन एमन चो बारे ने बेर करेदे?
8 मय तुमके बलेंसे कि हुन तूरते हुनमन चो नियाव करुन देयदे। काय, मनुक चो बेटा जेबे एयदे, मंजपुर ने बिसवास करतो लोगमन के पायदे?”
फरीसी आउर पट्टी उसील करतो बीता चो कटाव
9 जोन मनुकमन आपने के धरमाती आउर दुसर के हिनस्ता करते रओत, हुनमन काजे जीसु असन कटाव बललो:
10 “दुयझन मनुक मंदिर ने पारथना करतो काजे गेला, गोटोक मनुक फरीसी आउर दुसर मनुक पट्टी उसील करतो बीता, जेके लोगमन हिनस्ता करते रला।
11 फरीसी उबा होउन आपलो मन ने असन पारथना करुक मुरियालो: ए महापरभु, मय तुके धन-धन करेंसे कि मय दुसर मनुकमन चो असन जटतो बीता, ओधरमी आउर केचड़ाहा नोआंय, आउर ए पट्टी उसील करतो बीता असन पापी बले नोआंय।
12 मय हपता ने दुय हार उपास रयंसे, आउर मोचो जमाय कमई चो दस बाटा ले गोटोक बाटा, तुके दान देयंसे।
13 मानतर पट्टी उसील करतो बीता फयले उबा होउन सरग बाटे आंईक के किंदराउक बले मन नी करलो, मानतर आपलो छाती पेटुन-पेटुन असन बललो: ‘ए महापरभु, मय पापी मनुक आंय, मोचो उपरे जीव दुख!’
14 जीसु बललो: मय तुमके बलेंसे, हुन फरीसी नाई, मानतर एई मनुक महापरभु चो पुरे धरमाती होउन आपलो घरे गेलो। कसनबलले जोन कोनी बले आपने के बड़े बनायसे, हुनके नानी करेदे, आउर जोन कोनी बले आपने के नानी करेसे, हुनके बड़े करेदे।”
लूका 18:9-14
नानी पिलामन के बर देयसे
15 फेर लोगमन आपलो नानी पिलामन के जीसु लगे आनुक मुरियाला कि जीसु हुनमन चो उपरे हाथ थापुन बर देओ, मानतर चेलामन एके दखुन हुनमन के चिड़चिड़ाय होला।
16 जीसु पिलामन के आपलो लगे हागदेउन बललो: “पिलामन के मोचो लगे एउक दियास, आउर हुनमन के नी ठेबाहा: कसनबलले महापरभु चो राज असने मन चो आय।
17 मय तुमके सते बलेंसे, जोन महापरभु चो राज के पिलामन असन नी पतेयालोने, हुन हुता केबई नी ओलुक सके।”
सवकार मनुक आउर जुग-जुग जीव
18 कोनी धरम मुखिया जीसु के पूछलो: “ए नंगत गुरु, जुग-जुग चो जीव पावतो काजे मोके काय करतोर आय?”
19 जीसु हुनके बललो: “तुय मोके काय काजे नंगत बलसीस? कोनी बले नंगत नीआत, मानतर महापरभु एकलाय ची नंगत आय।
20 तुय हुकुममन के जानसीस: बेबिचार नी करतोर आय, मोरते नी मारतोर आय, चोरतोर नोआय, फंद साकी नी देतोर आय, आपलो आया-बुआ के मान करतोर आय।”
21 हुन बललो: “मय तो ए जमाय के मोचो जुवान बेरा ले मानते एयंसे।”
22 असन सुनुन जीसु हुनके बललो: “तुचोने गोटकी ची गोट एबे बले उना आसे, आपलो जमाय जाकमन के बिकुन सपाय धन के गरीब लोगमन के बाटुन देस, आउर तुके सरग ने धन मिरेदे, आउर तुय मोचो पाट-पाट आव।”
23 असन सुनुन हुन खुबे मुरमुरा होलो, कसनबलले हुन खुबे सवकार रये।
24 जीसु हुनके दखुन बललो: “सवकारमन के महापरभु चो राज ने ओलतोर कितरो खट-खट आय!
25 महापरभु चो राज ने सवकारमन चो ओलतोर ले, सूजी काना ले ऊंट चो छिंगड़तोर खुबे सरसरा होयदे।”
26 सुनतो बीतामन बलला: “असन आय जाले फेर कोचो मुक्ति होउक सके?”
27 जीसु बललो: “जोन मनुकमन ले नी होउक सके, हुन महापरभु ले होउक सके।”
28 पतरस हुनके बललो: “दखा, आमी तो घर-बार के छांडुन तुमचो संगे होलुसे।”
29 जीसु हुनमन के बललो: “मय तुमके सते बलेंसे, कोनी बले महापरभु चो राज काजे घर, बायले, भाईमन, आया-बुआ, नोहले आपलो पिला-झीलामन के छांडलोसे,
30 ए बेरा ने हुनचो ले कितरोई आगर मिरलीसे, आउर एतो जुग ने सरग ने जुग-जुग चो जीव मिरेदे।”
जीसु आपलो मोरना चो बारे ने तीसर हार सांगेसे
31 फेर जीसु आपलो बारा चेलामन के संगे नेउन हुनमन के बललो: “दखा, आमी जरूसलेम ने जाउंसे, हुता जितरो गोटमन मनुक चो बेटा चो बारे ने अगमजानीमन लिखलासोत, हुन जमाय पुरा होयदे।
32 मनुक चो बेटा के बिजातीमन चो हाथे सोपदे, आउर हुनमन हुनके हांसुन पकादे, हुनके इजित धरुन पकादे, आउर हुनचो उपरे थूकदे,
33 हुनके कोड़ा मारदे, आउर मोरते मारदे, आउर हुन तीसर दिने जीउन उठेदे।
34 हुन बाराझन के जीसु चो गोटोक बले गोट समज ने नी ईली, जीसु चो गोटमन चो भेद हुनमन ले लुकुन रये, आउर सांगलो गोटमन के हुनमन समजुक नी सकला।”
लूका 18:31-34
जीसु, मुटी मांगतो काना के दखायसे
35 जेबे जीसु जरीहो सहर लगे अमरलो, तेबे गोटोक काना सड़क रेटे बसुन मुटी मांगते रये।
36 हुन भीड़ चो कोलार सुनुन पूछुक मुरियालो: “काय होयसे?”
37 हुनमन हुनके सांगला: “जीसु नासरतेया जायसे।”
38 आउर हुन चिचियाउन बललो: “ए जीसु, दाउद चो बेटा! मोके जीव दुख!”
39 जोन लोगमन पुरे-पुरे जाते रओत, हुनमन दागा देउन बलला: ओगाय रा, मानतर हुन आउर बले अदिक चिचियाउन बलुक मुरियालो: “ए दाउद चो बेटा!* मोके जीव दुख!”
40 तेबे जीसु ठेबलो आउर हुकुम दिलो, हुनके मोचो लगे आना, जेबे हुन जीसु लगे ईलो तेबे हुनके पूछलो:
41 “तुय काय मन करसीस कि मय तुचो काजे करुन देयंदे?” हुन जीसु के बललो: “ए परभु, असन कर कि मोके दखुकलाय होओ।”
42 जीसु हुनके बललो: “दखुक मुरियाव, तुचो बिसवास तुके उजराली।”
43 आउर हुन तूरते दखुक मुरियालो, हुन महापरभु के जुहार करते जीसु चो पाट-पाट गेलो, असन दखुन जमाय लोगमन महापरभु के जय-जय करला।
लूका 18:35-43