छांडा-छांडी चो बारे ने जीसु चो सिखिया
19
जीसु ए सबु गोट के बललो पाछे, गलील परघन ले गेलो; आउर हुन जरदन नंदी चो हुन पाट जहूदिया परघन ने ईलो।
2 तेबे हुनचो लगे गोटोक खुबे भीड़ होली, आउर जीसु हुता हुनमन के बेमारमन ले उजरालो।
3 तेबे फरीसीमन एउन हुनके परखतो काजे पूछला, “काय आपलो बायले के काई चे काजे बले छांडतोर नंगत आय?”
4 जीसु हुनमन के बललो, “काय, तुमी धरमसास्तर नी पढ़लास? हुता लिखलोर आसे, संवसार के बनाउ, हुनमन के मूर ले मनुक आउर बायले बनालो आउर बललो:
5 ‘मनुक आपलो आया-बुआ के छांडुन आपलो बायले संगे रयदे आउर एमन दुनो गोटकी देहें असन होदे’।†
6 बललोने: हुनमन एदांय गोटकी देहें आत, दुयझन नोआत। एईकाजे जेके महापरभु जोड़लोसे, मनुकमन नी अलगाहा।”
7 हुनमन जीसु के बलला, “मोसा फेर काय काजे असन हुकुम दिलो कि छांडा-छांडी होतो कागत देउन आपलो बायले के छांडा?”
8 जीसु हुनमन के बललो, “तुमी महापरभु चो हुकुम के नी मानुन आपलो मन चो कटुर करलो किरता मोसा तुमके आपलो बायले के छांडतो काजे बललो, मानतर मूर ले असन नी रली।
9 मय तुमके बलेंसे, बेबिचार के छांडुन आउर काई किरता कोनी मनुक आपलो बायले के छांडुन दुसर बायले के बिया होयसे जाले, हुन बेबिचार करेसे; आउर जोन मनुक हुन छांडलो बायले के बिया होयसे, हुन बले बेबिचार करेसे।”
10 चेलामन जीसु के बलला, “असन आय जाले, मनुक चो बायले संगे बिया नी होतोर ची नंगत आय।”
11 जीसु हुनमन के बललो, “सबु मनुक ए बचन के मानुक नी सकोत, मानतर हुनीमन ची मानुक सकोत जेके महापरभु ले एकलाय रतो चो बर मिरलीसे।
12 कसनबलले कोनी-कोनी, माय चो पेट ले ची ठेरवा जनमलासोत; आउर कोके-कोके, मनुकमन ठेरवा बनालासोत; आउर कोनी खुद के सरग राज चो सेवा किरता ठेरवा बनालासोत। जोन बले ए बचन के मानुक सके, हुन मानो।”
जीसु आउर पिलामन
13 तेबे आया-बुआमन, पिलामन के बर देउन पारथना करतो काजे जीसु लगे आनला, मानतर चेलामन हुनमन के दागा दिला।
14 एके दखुन जीसु बललो, “पिलामन के मोचो लगे एउक दियास, हुनमन के ‘नाई’ नी बला, कसनबलले सरग राज असने ची मन-लोग चो आय।”
15 जीसु पिलामन के बर देउन हुताले गेलो।
गोटोक सवकार मनुक
16 गोटोक मनुक जीसु लगे ईलो आउर हुनके बललो, “ए गुरुजी, मय काय नंगत बुता करेंदे, जेचोले मोके जुग-जुग चो जीव मिरेदे?”
17 जीसु हुनके बललो, “तुय मोके नंगत चो बारे ने काय काजे पूछसीस? महापरभु गोटकी ची नंगत आय, एईकाजे तुय जुग-जुग चो जीव ने ओलुक मन करसीस जाले, महापरभु चो हुकुममन के मान।”
18 हुन जीसु के पूछलो, “काय हुकुममन के?” तेबे जीसु बललो, “मोरते नी मारतोर, बेबिचार नी करतोर, नी चोरतोर, फंद गवई नी देतोर,
19 आपलो आया-बुआ चो मान करतोर, आउर सपाय लोगमन के आपलो असन मया करतोर।”
20 हुन जुवान मनुक जीसु के बललो, “ए जमाय के तो मय मानते एयंसे; एदांय मोचो ने काय उना आसे?”
21 तेबे जीसु बललो, “तुय महापरभु चो मन-इछा असन करुक मन करसीस जाले जा, आउर आपलो सपाय धन-माल के बिकुन गरीबमन के बाटुन देस, आउर सरग ने तुके खुबे धन मिरेदे; फेर मोचो पाट-पाट आव।”
22 मानतर हुन जुवान मनुक, ए गोट के सुनुन मुरमुरा होउन जाते गेलो, कसनबलले हुन खुबे सवकार रये।
23 तेबे जीसु आपलो चेलामन के बललो, “मय तुमके सते बलेंसे, सवकार चो सरग राज ने ओलतोर मसकिल आय।
24 मय तुमके बलेंसे, सवकार चो सरग राज ने ओलतोर ले, सूजी काना ले ऊंट छिंगड़तोर खुबे सरसरा होयदे।”
25 चेलामन ए गोट के सुनुन खुबे अचरित होला आउर जीसु के पूछला, “असन ने फेर कोचो मुक्ति होउक सके?”
26 जीसु हुनमन बाटे दखुन बललो, “मनुक ले तो ए होउक नी सके, मानतर महापरभु ले सपाय होउक सके।”
27 एके सुनुन पतरस, जीसु के बललो, “दख, आमी तो जमाय के छांडुन तुचो पाट-पाट होलुसे: असन ने आमके काय मिरेदे?”
28 जीसु आपलो चेलामन के बललो, मय तुमके सते बलेंसे, नवा जुग बेरा मय मनुक चो बेटा, आपलो मयमा चो आसनगादी ने बसेंदे, तेबे तुमीमन जोन मोचो पाटे होलासाहास, बाराठन आसनगादीमन ने बसुन इसराएल चो बारा बंस उपरे राज करासे।
29 आउर जोन कोनी आपलो घर दुआर, भाई-बईनमन, आया-बुआ, पिला-झीलामन, आउर बेड़ा-खाड़ा के मोचो नाव काजे छांडलोसे, हुनके सव गुना मिरेदे, आउर हुन जुग-जुग जीव चो हकदार होयदे।
30 मानतर खुबे लोगमन जोन पुरे आसोत, पाटे होदे; आउर जोन पाटे आसोत, हुनमन पुरे होदे।