अंगुर बाड़ी ने बुता करतो लोगमन चो कटाव
20
सरग राज अंगुर-बाड़ी चो हुन जिमीयार असन आय, जोन आपलो अंगुर बाड़ी ने बुता करातो काजे बियान पाहार घर ले निकरलो।
2 हुन भूतियारमन के गोटोक दीनार रोजी देयंदे बललो, आउर आपलो बाड़ी ने पठालो।
3 फेर हुन पनयारी पाहार के घर ले निकरलो, आउर हाट पसरा ने, दुसर भूतियारमन के फोकाहा उबा रतो के दखलो,
4 आउर हुनमन के बललो, तुमी बले अंगुर बाड़ी ने जाहा, जोन बले बनेदे, मय तुमके देयंदे। एके सुनुन हुनमन गेला।
5 मुंडे बेरा आउर अड़उ पाहार हुन घर ले निकरलो आउर फेर उसनेची करलो।
6 बेर बसतो काजे गोटोक घंटा बाचलो बेरा हुन मालिक, घर ले फेर निकरलो, तेबे हुन भूतियारमन के हाट पसरा ने फोकाहा उबा रतो के दखलो, आउर हुनमन के बललो, तुमी एथा काय काजे गुलाय दिन फोकाहा उबा आसास? हुनमन बलला, कोनी बले आमके बुता नी तियारला।
7 हुन, हुनमन के बललो, तुमी बले अंगुर बाड़ी ने जाहा।
8 “सांज होतोके, अंगुर बाड़ी चो जिमीयार आपलो भंडारी के बललो, ‘भूतियारमन के हागदेस आउर पाछे ईलो लोगमन ले धरुन, आगे ईलो लोगमन के, हुनमन चो भूती देउन देस।’
9 जेबे सपाय भूतियारमन ईला, जोन बेर बुड़तो ले गोटोक घंटा आगे बुता ने लगु रओत, हुनमन के गोटोक-गोटोक दीनार मिरली।
10 जोन आगे एउ रओत हुनमन ए समजला कि आमके जुगे मिरेदे, मानतर हुनमन के बले गोटोक-गोटोक दीनार मिरली।
11 जिदलदांय हुनमन के गोटोक-गोटोक दीनार मिरली, तेबे हुनमन अंगुर बाड़ी चो मालिक के गुरमुरुन बलुक मुरियाला,
12 ‘आमी, जोन दिनभर बोजा उठालु, घाम-तोप के सहलु आउर तुय ए पाछे ईलो लोगमन के जोन गोटकी ची घंटा बुता करला, हुनमन के तुय आमचो इतरो भूती दिलीस?’
13 मालिक हुनमन ले गोटोक भूतियार के बललो, ‘ए मीत, मय तुचो उपरे काई ओनियाव नी करें। काय, मय तुके गोटोक दीनार देयंदे बलुन नी रयें?
14 जितरो तुचो आय, धर आउर जा; मोचो मन आय जितरो तुके देयंसे उतरो ए पाछे ईलो लोगमन के बले देयें।
15 काय, ए नंगत नोआय कि मोचो धन-माल के जसन मोचो मन करेसे उसने करें? काय, मय नंगत मनुक होतो किरता मोके अडरा नंजर ले दखसीस?’
16 असने बरन ले जोन पाटे आसोत, हुनमन पुरे होदे; आउर जोन पुरे आसोत, हुनमन पाटे होदे।”
जीसु आपलो मोरना चो बारे ने फेर अगमगोट सांगतोर
17 जीसु जरूसलेम सहर जातो बेरा बारा चेलामन के अलगे करलो, आउर बाटे-बाटे सांगुक मुरियालो,
18 “दखा, आमी जरूसलेम जाउंसे; आउर हुता मय मनुक चो बेटा के, पुजारीमन चो मुखियामन आउर धरम-पंडितमन चो हाथे धरादे, हुनमन मोके मोरते मारतो डंड देदे।
19 आउर हुनमन मोके बिजातीमन चो हाथे सोपदे, मोके हांसी-खेली करदे, आउर मोके कोड़ा ने मारदे, फेर मोके कुरूस ने चेगादे, आउर मय तीसर दिने जीव उठेंदे।”
गोटोक आया चो गुहार
20 तेबे जबदी चो बेटामन चो आया, आपलो बेटामन संगे एउन जीसु के पांय पड़ुन, हुनके काई मांगुक मुरियाली।
21 जीसु हुनके बललो, “तुय काय मन करसीस?” हुन जीसु के बलली, “तुय मोके जुबान देस कि तुय राज करतो बेरा, मोचो ए दुनो बेटा ले गोटोक के तुचो उजा हाथ बाटे आउर गोटोक के तुचो डेबरी हाथ बाटे बसाव।”
22 जीसु हुनमन के बललो, “तुमी नी जानास काय मांगेसाहास। काय, जोन दुख चो बटका ले मोके पीवतोर आय, तुमी हुनके पीउक सकास?” हुनमन हुनके बलला, हव, आमी पीउक सकुं।
23 जीसु हुनमन के बललो, “तुमी मोचो बटका ले तो पीयासेचे, मानतर मोचो उजा आउर डेबरी हाथ बाटे बसातो काम मोचो नोआय, कसनबलले जेचो काजे मोचो बुआ तियार करलोसे, हुनीमन काजे आय।”
24 ए गोट के सुनुन दसझन चेलामन, हुन दुनो भाई के रीस होला।
25 जीसु हुनमन के लगे हागदेउन बललो, “तुमी जानेसाहास कि हुन बिजातीमन चो मुखियामन, हुनमन उपरे हक संगायसोत; आउर जोन बड़े आत, हुनमन उपरे हक जतायसोत।
26 मानतर तुमीमन ने असन नी होए; जोन कोनी बड़े होउक मन करेसे, हुन तुमचो सेवा-सुस्तारा करु बीता बनो;
27 आउर जोन बले तुमचो मुखिया बनुक मन करेसे, हुन तुमचो कमेया बनो;
28 जसन कि मय मनुक चो बेटा, मोचो सेवा-सुस्तारा करोत बलते नाई, मानतर खुदे दुसर चो सेवा-सुस्तारा करतो काजे ईलेसे, आउर खुबे लोगमन के छंडातो काजे मोचो जीव के देयंसे।”
दुयझन कानामन के दखतो सकत देतोर
29 जिदलदांय जीसु आउर चेलामन जरीहो सहर ले निकरते रओत, तेबे बड़े भारी भीड़ हुनचो पाट-पाट होली।
30 बाट रेटे बसलो दुयझन कानामन जीसु जायसे बलुन सुनलोके, चिचियाउक मुरियाला “ए परभु, दाउद चो बेटा आमचो उपरे जीव दुख।”
31 लोगमन हुनमन के ओगाय राहा बलते दागा दिला; मानतर हुनमन अदिक चिचियाउन बलला, “ए परभु, दाउद चो बेटा, आमचो उपरे जीव दुख।”
32 तेबे जीसु ठेबलो, आउर हुनमन के हागदेउन पूछलो,
33 “तुमी काय मन करसास कि मय तुमचो काजे करेंदे?” हुनमन बलला, “ए परभु, आमी दखुक मन करुंसे।”
34 जीसु जीव दुखुन हुनमन चो आंईक के छिंवलो, आउर हुन दुयझन कानामन तूरते दखुक मुरियाला; आउर हुनचो पाट-पाट गेला।