सरग राज ने बड़े कोन आय?
18
हुदलीदांय चेलामन जीसु लगे एउन पूछला, “सरग राज ने बड़े कोन आय?”
2 तेबे जीसु गोटोक लेका-पिला के आपलो लगे हागदेउन हुनमन चो मंजिगता उबा करलो,
3 आउर बललो, “मय तुमके सते सांगेसे, तुमी बदलुन ए लेका-पिला असन नी होलोने, सरग राज ने केबई ओलुक नी सकासे।
4 एईकाजे जोन कोनी आपने के ए लेका-पिला असन नानी करेदे, हुनी सरग राज ने बड़े होयदे।
5 जोन कोनी मोचो नाव ने असन गोटोक लेका-पिला के मानेसे, हुन मोके मानेसे।
6 मानतर मोके पतेयातो ए नानीमन ले गोटोक के बले कोनी पाप करायसे जाले, हुनचो टोडरा ने बड़े जता-पकना के बांधुन खुबे गड़िया समदूर ने पकाले नंगत होती।”
7 “पाप चो किरता संवसार के सराप! पाप होयसे ची; मानतर सराप हुन मनुक चो उपरे, जोन पाप करायसे।
8 तुचो हाथ नोहले पांय तुके पाप करायसे जाले, गोंदुन पकाउन देस; कसनबलले दुनो हाथ-पांय रउन नरक जातो पलटा कोला-माटा होउन जुग-जुग चो जीवना पावतोर तुचो काजे नंगत होयदे।
9 आउर तुचो आंईक तुके पाप करायसे जाले, हुनके हिटाउन पकाउन देस; दुनो आंईक रउन नरक-कुंड जातो पलटा काना होउन जुग-जुग जीव पावतोर तुचो काजे नंगत होयदे।”
हाजलो मेंडा चो कटाव
10 “दखा, तुमी ए नानीमन ले कोकई हिनस्ता नी समजा; कसनबलले मय तुमके बलेंसे, सरग ने हुनमन चो दूतमन मोचो सरग ने रतो बुआ चो थमना के रोजे दखसोत।”
11 (कसनबलले मय मनुक चो बेटा हाजलो लोगमन के बचाउकलाय ईलेसे।)
12 “तुमी काय बिचारसाहास? कोनी मनुक चो सवठन मेंडा रले, आउर हुनमन ले गोटोक मेंडा हाजुन गेलोने, काय हुन एक कम सव मेंडामन के डोंगरी ने छांडुन हुन हाजलो मेंडा के डगराउक नी जायदे?
13 आउर हुनके हाजलो मेंडा मिरली जाले, मय तुमके सते बलेंसे, हुन नी हाजलो एक कम सव मेंडामन ले हाजुन-मिरलो मेंडा काजे आगर हरिक होयदे।
14 असने ची तुमचो सरग चो बुआ बले मन नी करे कि ए नानीमन ले कोनी गोटोक बले नास होओत।”
भाई-भाई चो मिला-मिसा गोट
15 “तुचो भाई तुचो बिरुद ने पाप करलोने, तुय एकला जाउन हुनके समजाव; हुन तुचो गोट के मानलोने तुय आपलो भाई के पावलीस।
16 आउर हुन तुचो गोट के नी मानलोने, एक-दुयझन के आपलो संगे धरुन जा, कसनबलले दुय-तीनझन चो गवामन ले ची जमाय गोट सते पतेयादे।
17 आउर हुन, हुनमन चो गोट के बले नी मानलोने, मंडली के सांग; मानतर हुन मंडली चो गोट के बले नी मानलोने, तुय हुनके बिजाती आउर पट्टी उसील करु बीतामन असन समज।”
18 “मय तुमके सते बलेंसे, जोन बले तुमी मंजपुर ने बांदासे, हुन सरग ने बांदी होयदे आउर जोन बले तुमी मंजपुर ने ढीलासे, हुन सरग ने ढीली होयदे।
19 फेर मय तुमके सते सांगेसे, तुमीमन ले दुयझन मंजपुर ने काई गोट काजे गोटकी मन ने मांगलोने, मोचो बुआ जोन सरग ने आसे, हुन तुमके देयदे।
20 कसनबलले जोन थाने बले मोचो नाव ने दुय-तीनझन रूंडेसोत, मय हुनमन चो मंजिगता आंसे।”
जीव नी दुखतो कमेया चो कटाव
21 तेबे पतरस, जीसु लगे एउन बललो, “ए परभु, मोचो भाई मोचो ले काई कसूर करले, मय हुनके कितरो हार खेमा करतोर आय? काय सात हार?”
22 जीसु हुनके बललो, “मय तुमके सात हार नी बलें, मानतर सात हार चो सतर गुना होओतले।”
23 “एईकाजे सरग चो राज हुन राजा असन आय, जोन आपलो कमेयामन चो हिसाब धरुक मन करलो।
24 जिदलदांय हुन हिसाब धरुक मुरियालो, तेबे गोटोक दस हजार सोन चो सिक्का लागा लागु बीता के हुनचो पुरे आनला।
25 मानतर लागा छुटतो काजे हुनचो लगे काई चे नी रये, तेबे मालिक हुकुम दिलो, ‘एके आउर एचो बायले-पिलामन के आउर जोन काई बले एचो आसे जमाय के बिकुन मोचो लागा छुटुन दियास।’
26 एके सुनुन कमेया हुनके जलजला पांय पड़ुन बललो, ‘ए मालिक धीरजा धर, मय जमाय लागा के छुटुन देयंदे’।
27 तेबे हुन कमेया चो मालिक जीव दुखुन हुनके खेमा करलो, आउर हुनचो लागा के बले छांडुन दिलो।”
28 “जिदलदांय हुन कमेया बाहरे निकरलो, तेबे हुनचेई गोटोक संगवारी कमेया के भेटलो जोन हुनचो ले सव दीनार लागा लागुन रये; हुन हुनचो टोडरा के धरुन बललो, ‘जोन बले तुय मोचो लागीस मोके देस’।
29 एचोने हुनचो संगवारी कमेया हुनके जलजला पांय पड़ुन गुहारलो, ‘धीरजा-धर, मय तुचो जमाय लागा के छुटुन देयंदे’।
30 मानतर हुन नी मानलो, आउर लागा नी छुटतले जयल घरे ढकाउन दिलो।
31 हुनचो संगवारी कमेयामन एके दखुन खुबे दुखी होला, आउर जाउन आपलो मालिक के जमाय गोट सांगुन दिला।
32 तेबे हुन कमेया चो मालिक हुनके हागदेउन बललो, ‘ए दुसट कमेया, तुय मोके गुहारलिस गुने, मय तुचो सपाय लागा छांडुन खेमा करले।
33 जसन मय तुके जीव दुखले, उसनेची काय, तुके बले तुचो संगवारी कमेया उपरे जीव दुखतोर नी रली?’
34 आउर हुनचो मालिक रीस होउन हुनके जमाय लागा नी छुटतले डंड देउ बीतामन चो हाथे सोपुन दिलो।”
35 “तुमी बले आपलो भाई के मन ले खेमा नी करलास जाले, मोचो बुआ जोन सरग ने आसे, तुमचो संगे बले असनेच करेदे।”