पट्टी उसील करतो बीता जकई
19
जीसु, जरीहो सहर भीतर ले जाते रये।
2 हुता जकई नाव चो गोटोक मनुक रये, जोन पट्टी उसील करतो बीतामन चो मुखिया रये, आउर खुबे सवकार बले रये।
3 हुन जीसु के दखुकलाय मन करते रये कि हुन कोन आय। मानतर हुन भीड़ चो किरता दखुक नी सकते रये, कसनबलले हुन खुजा रये।
4 तेबे हुन पुरे पराउन जीसु के दखुकलाय गोटोक डुमर रूके चेगलो, कसनबलले जीसु हुनी बाट ले जातो बीता रये।
5 जीसु हुनी लगे अमरलो आउर उपरे दखुन हुनके बललो: “ए जकई झटके खाले उतर, कसनबलले आजी मोके तुचो घरे रतोर जरुर आय।”
6 हुन तूरते खाले उतरुन हुनके हरिक ले आपलो घरे नीलो।
7 एके दखुन लोगमन गुरमुरुन बलुक मुरियाला कि हुन तो गोटोक पापी मनुक चो घरे गेलोसे।
8 तेबे जकई उबा होउन परभु के बललो: “ए परभु, दख, मय आपलो आदो धन-माल के गरीबमन के एबे देयंसे, आउर कोचई के जटुन धरलेसे जाले हुनके चार गुना आगर बोहड़ाउन देयंसे।”
9 तेबे जीसु हुनके बललो: “आजी मुक्ति ए घरे बले ईलीसे, कसनबलले तुय बले अबराहम चो थर चो आस।
10 मय मनुक चो बेटा हाजलो लोगमन के डगराउक आउर हुनमन के पाप ले मुक्ति देउक ईलेसे।”
लूका 19:1-10
दसठन सिक्कामन चो कटाव
11 जिदलदांय लोगमन हुनचो गोट के सुनते रओत, तेबे हुन गोटोक कटाव बललो, हुनमन जरूसलेम लगे अमरुन रओत आउर हुनमन बिचार करते रओत कि महापरभु चो राज एदांय दखा देउआय।
12 एईकाजे हुन बललो: “गोटोक सवकार मनुक खुबे दूर देस ने गेलो कि बड़े राजपन पाउन बोहड़ेंदे।
13 हुन गेलोले आगे, आपलो दसझन कमेयामन के हागदेउन हुनमन के दसठन सोन सिक्कामन देउन हुनमन के बललो: ‘मोचो एओतले बेपार खेलते राहा’।
14 मानतर हुनचेई राज चो लोगमन हुनके ईरका होते रओत, आउर हुनचो पाटे खबर देतो बीतामन चो हाथ ले खबर पठाला, ‘आमके मुरे मन नीआय कि हुन आमचो उपरे राज करो’।
15 जेबे हुन राजपन पाउन बोहड़लो, तेबे हुन आपलो कमेयामन के हागदिलो जोनमन के हुन सोन चो सिक्कामन देउन रये आउर जानुक मुरियालो कि हुनमन बेपार करुन काय-काय कमालासोत।
16 तेबे पईल कमेया एउन बललो, ‘ए मालिक, मय तुचो दिलो सोन सिक्का ले बेपार करुन दसठन सिक्कामन आउर कमाले’।
17 मालिक हुनके बललो: ‘तुय नंगत कमेया आस, तुय भाइगमानी आस! तुय खिंडिक ने बले सतधरमी रलीस आउर दसठन सहरमन ने राज करसे’।
18 दुसर कमेया एउन बललो: ‘ए मालिक, मय तुचो दिलो सोन सिक्का ले बेपार करुन पांचठन आउर कमाले’।
19 सवकार हुनके बललो: ‘तुय बले पांचठन सहरमन ने राज कर’।
20 तीसर कमेया एउन हुनके बललो: ‘ए मालिक दख, तुचो सोन सिक्का जसन चो उसने आसे, मय हुनके ओंगछी ने बांधुन संगाउन रले।
21 मय तुके डरते रये, कसनबलले तुय कटुर मनुक आस; जेके तुय नी संगालीसीस हुनके तुय नेते नेयसीस, आउर जेके तुय नी बुनलीसीस हुनके तुय काटसीस’।
22 सवकार हुनके बललो: ‘ए अडरा कमेया, मय तुचेई टोंड ले तुके बदी करेंसे। तुय जानते रयीस कि मय कटुर मनुक आय, जेके मय नी संगालेसे हुनके नेते नेयंसे, आउर जेके मय नी बुनलेसे हुनके काटेंसे
23 जाले, तुय मोचो सिक्का के जमा लेखा ने काय काजे नी संगाउन दिलीस कि मय बोहड़लो पाछे हुनके कंतर संगे धरते?’
24 जोन लोगमन हुनचो लगे उबा रओत हुनमन के हुन बललो: ‘हुन सोन सिक्का के हुनचो ले धरा, आउर जेचो लगे दसठन आसे हुनके देउन दियास’।
25 कमेयामन हुनके बलला: ‘ए मालिक, हुनचो लगे तो दसठन आगे ले आसे’,
26 मालिक बललो: ‘मय तुमके बलेंसे, जेचो लगे आसे, हुनके आउर देदे, आउर जेचो लगे नीआय, हुनचो ले हुनके बले झीकेदे जोन हुनचो लगे आसे।
27 मोके बईर करतो लोगमन, जोन मन नी करसोत कि मय हुनमन चो उपरे राज करे, हुनमन के एथा मोचो पुरे आना आउर मोरते मारा’।”
जरूसलेम ने जीसु चो ओलतोर
28 असन गोटमन के बलुन जीसु, जरूसलेम चो बाटे हुनमन चो पुरे-पुरे गेलो।
29 जेबे जीसु जयतून डोंगरी ने बयतफगे आउर बेतनिया गांव लगे अमरलो, तेबे आपलो दुयझन चेलामन के असन बलुन पठालो:
30 “पुरे चो गांव ने जाहा, हुता अमरलोने तुमके गोटोक गदई पिला बांदलोर मिरेदे, जेचो उपरे कोनी नी बसलासोत, हुनके ढीलुन मोचो लगे आना।
31 ‘कोनी तुमके पूछलोने, हुनके काय काजे ढीलेसाहास?’ तेबे तुमी बलासे, ‘परभु के एचोले बुता आसे’।”
32 जोन चेलामन के जीसु पठाउन रये, हुनमन जीसु चो बललो गोट असन दखला।
33 जेबे हुनमन गदई चो पिला के ढीलुक मुरियाला, तेबे हुनचो मालिकमन हुनमन के पूछला: “काय काजे हुनके ढीलेसाहास?”
34 हुनमन बलला: “परभु के एचोले बुता आसे।”
35 चेलामन हुनके जीसु चो लगे आनला, आउर हुनमन आपलाहान फटईमन के हुन गदई पिला चो पाटे ओचाउन भाति जीसु के हुनचो उपरे बसाउन दिला।
36 जिदलदांय जीसु हुनचो उपरे बसुन जाते रये, लोगमन आपलो-आपलो फटईमन के सड़क-बाट ने ओचाते जाते रओत।
37 जिदलदांय जीसु हुन लगे अमरलो जोन थाने बाट, जयतून डोंगरी चो उतरानी ने जायसे, तेबे चेलामन आउर हुनमन संगे रलो लोगमन, जीसु चो जमाय अचरित बुता किरता, जेके हुनमन दखुन रला, हरिक होउन बड़े राग ले महापरभु चो जय-जय करुक मुरियाला:
38 “भाइगमानी आय हुन राजा जोन परभु चो नाव ले एयसे! †
सरग ने अस्तिर आउर बादरी उपरे हुनचो मयमा होओ!”
लूका 19:28-38
39 तेबे भीड़ चो मंजिगता ले आदो फरीसीमन निसकला, आउर जीसु के बलुक मुरियाला: “ए गुरुजी, तुचो चेलामन के दागा देस।”
40 जीसु हुनमन के बललो: “मय तुमके बलेंसे कि हुनमन ओगाय होले, पकनामन बले चिचियाउक मुरियादे।”
जरूसलेम काजे गागतोर
41 जीसु जेबे जरूसलेम लगे अमरलो, तेबे हुन सहर के दखुन गागलो आउर
42 बललो: “कितरो नंगत होती, तुय, हव तुय ची, आजी चो दिने अस्तिर चो गोट के जानतीस, मानतर एदांय, हुन तुचो आंईक पुरे ले लुकलीसे।
43 कसनबलले बेरा एयदेबे कि तुके बईर करतो बीतामन भोंवरक बेड़ुन तुके छेकदे आउर चारो खुट ले एउन चेपादे।
44 तुके आउर तुचो पिलामन के जोन तुचोने आसोत, माटी ने मिसाउन देदे, आउर तुचोने पकना उपरे पकना बले रउक नी देदे, कसनबलले महापरभु तुके मुक्ति देउकलाय ईलो मोहका के तुय नी चितालीस।”
लूका 19:41-44
जरूसलेम चो मंदिर ने जीसु
45 तेबे जीसु मंदिर ने गेलो आउर हुताले बिकतो-घेनतो बीतामन के दुआरे खेदलो,
जरूसलेम चो मंदिर (19:45)
46 आउर हुनमन के बललो: “धरमसास्तर ने लिखलोर आसे, ‘मोचो घर पारथना चो घर आय, मानतर तुमी हुनके खंगारमन चो करपन बनाउन दिलासाहास’।”
47 एचो पाछे, जीसु रोजे दिने मंदिर ने जाउन सिखिया देते रये, मानतर पुजारीमन चो मुखियामन, धरम-पंडितमन आउर लोगमन चो मुखियामन जीसु के मोरते मारतो काजे मोहका डगराते रओत।
48 मानतर असन करतो काजे हुनमन काई मोहका नी पावला, कसनबलले लोगमन खुबे धियान ले जीसु चो गोट के सुनते रला।
लूका 19:45-48