दसझन कुंआरीमन चो कटाव
25
जीसु बललो, सरग चो राज हुन दसझन कुंआरीमन असन होयदे, जोनमन दुला के भेट करतो काजे आपलो दीया के धरुन निकरला।
2 हुनमन ले पांचझन एड़जी कुंआरीमन आउर पांचझन समजदार कुंआरीमन रओत।
3 एड़जी कुंआरीमन आपलो दीया के तो धरला, मानतर आपलो संगे तेल नी धरला;
4 मानतर समजदार कुंआरीमन दीया संगे आपलो कुपीमन ने तेल बले भोरला।
5 जिदलदांय दुला एतोके बेर होली, तेबे सबु कुंआरीमन झूमुन सोउन गेला।
6 अधगर राती के कुड़ुम छांडली आउर गोटोक राग सुना दिली, “दखा, दुला एयसे! हुनके भेट करुक जो।”
7 तेबे सपाय कुंआरीमन उठुन आपलो दीयामन के जतनाउक मुरियाला।
8 एड़जी कुंआरीमन समजदार कुंआरीमन के बलला, “आपलो तेल ले खिंडिक आमके बले दियास, कसनबलले आमचो दीयामन लिबेसे।”
9 मानतर समजदार कुंआरीमन बलला, ए तेल तुमचो आउर आमचो काजे नी पुरे; एईकाजे नंगत होयदे कि तुमी तेल बिकुमन लगे जाउन आपलो काजे घेना।
10 जिदलदांय हुनमन तेल घेनुक जाते रओत, हुदलीदांय दुला अमरलो, जोन कुंआरीमन तियार रला, हुनमन दुला संगे बिया घरे जाते गेला आउर कपाट ढाकलो।
11 एचो पाछे दुसर कुंआरीमन बले ईला आउर बलुक मुरियाला, ए मालिक, ए मालिक, आमचो काजे कपाट उगाड़ा!
12 दुला, हुनमन के बललो, मय तुमके सते नी जाने।
13 एईकाजे चेतुन राहा, कसनबलले तुमी नी जानास, कोन दिने आउर कोन बेरा मय एउआंय।
सिक्कामन चो कटाव
14 जीसु आउर बललो, सरग राज हुन मनुक असन आय, जोन परदेस जातो बेरा आपलो कमेयामन के हागदेउन हुनमन के आपलो जाय-जमक सोपुन दिलो।
15 हुन गोटोक के पांचठन सोन चो सिक्का, दुसर के दुयठन सोन चो सिक्का, आउर तीसर के गोटोक सोन चो सिक्का दिलो; बललोने सबु के हुनमन चो सकत हिसाब ने दिलो, आउर हुन परदेस जाते गेलो।
16 तेबे, जोन कमेया के पांचठन सोन चो सिक्का मिरुन रये, हुन तूरते जाउन बेपार खेलुन, आउर पांचठन सोन चो सिक्का कमालो।
17 एचई असन, जेके दुयठन सोन चो सिक्का मिरुन रये, हुन बले आउर दुयठन सोन चो सिक्का कमालो।
18 मानतर जेके गोटोक सोन चो सिक्का मिरुन रये, हुन बाहरी जाउन भुंये खोड़ुन, आपलो मालिक चो सोन चो सिक्का के लुकाउन दिलो।
19 खुबे दिन पाछे हुन कमेयामन चो मालिक एउन सिक्कामन चो हिसाब करुक मुरियालो।
20 जेके पांचठन सोन चो सिक्का मिरुन रये, हुन आउर पांचठन सोन चो सिक्का आनुन आपलो मालिक के बललो, “ए मालिक, तुय मोके पांचठन सोन चो सिक्का देउन रलीस, दख, मय आउर पांचठन सोन चो सिक्का कमालेसे”।
21 हुनचो मालिक हुनके बललो, “धन-धन आस, नंगत आउर पतेयातो लाईक कमेया, तुय खिंडिक ने सत-धरमी रलीस; मय तुके खुबे जाय-जमक चो हक बीता बनायंदे। आव, आपलो मालिक संगे हरिक मनाव”।
22 आउर उसनेची जेके दुयठन सोन चो सिक्का मिरुन रये, हुन बले एउन बललो, “ए मालिक, तुय मोके दुयठन सोन चो सिक्का देउन रलीस, दख, मय आउर दुयठन सोन चो सिक्का कमाले।”
23 “हुनचो मालिक हुनके बललो, ‘धन-धन आस, नंगत आउर पतेयातो लाईक कमेया, तुय खिंडिक ने सत-धरमी रलीस; मय तुके खुबे जाय-जमक चो हक बीता बनायंदे। आव, आपलो मालिक संगे हरिक मनाव’।
24 तेबे जोन कमेया के गोटोक सोन चो सिक्का मिरुन रये, हुन एउन मालिक के बललो, ‘ए मालिक, मय तुके जानेंसे, तुय कटुर मनुक आस: तुय जोन थाने नी बुनीस हुता काटुआस, आउर जोन थाने तुय नी बिखरीस हुता तुय ओंडेयाउआस।
25 एईकाजे मय तुके डरले आउर बाहरी जाउन तुचो दिलो सोन चो सिक्का के भुंये खोड़ुन लुकाउन दिले। दख, तुय दिलो सोन चो सिक्का ए आय’।”
26 “हुनचो मालिक हुनके बललो, ‘ए दुसट आउर ठग कमेया, तुय जानीस कि मय जोन थाने बुनु नोआंय हुता काटुआंय, आउर जोन थाने बिखरु नोआंय हुता ओंडेयाउआंय;
27 नंगत होती, तुय मोचो सोन चो सिक्का के कोनी सवकार के देउ रतीस, आउर मय एउन आपलो सोन चो सिक्का के कंतर संगे धरते’।
28 एईकाजे ए सोन चो सिक्का के एचोले धरा, आउर जेचो लगे दसठन सोन चो सिक्का आसे हुनके देउन दियास।
29 कसनबलले जेचो लगे आसे, हुनके आउर देतोर होयदे आउर हुनचो लगे खुबे होउन जायदे; मानतर जेचो लगे नीआय, हुनचो ले हुनके बले धरतोर होयदे, जोन बले हुनचो लगे आसे।
30 ए ठग कमेया के बाहरी अंधार ने पकाउन दिया, जोन थाने गागा-बोगा आउर दात कडरतोर होयदे।”
नियाव चो दिन
31 जिदलदांय मय मनुक चो बेटा आपलो मयमा ने एयंदे आउर सपाय सरगदूतमन मोचो संगे एदे, हुदलदांय, मय आपलो मयमा चो आसनगादी ने बसेंदे।
32 आउर सपाय जात चो लोगमन के मोचो पुरे रूंडा करदे; आउर जसन धोरई छेरी-मेंडीमन के अलगायसे,
33 आउर मेंडामन के आपलो उजा हाथ बाटे आउर छेरीमन के आपलो डेबरी हाथ बाटे रूंडा करेसे, असने ची मय बले लोगमन के अलगायंदे।
34 “तेबे राजा आपलो उजा हाथ बाट चो लोगमन के बलेदे, मोचो बुआ चो भाइगमानी लोग, इआ, ए राज चो हक बीतामन होआ, जेके संवसार चो मूर ले तुमचो काजे बनालोर आसे।
35 कसनबलले मय भूके रयें, आउर तुमी मोके भात खुआलास; मय पियास होउन रयें, आउर तुमी मोके पानी खुआलास; मय परदेसिया रयें, आउर तुमी मोके आपलो घरे ठेबालास;
36 मय नांगड़ा रयें, आउर तुमी मोके फटई पिंदालास; मय बेमार रयें, आउर तुमी मोके सुस्तारा करलास, मय जयल घरे रयें, आउर तुमी मोके दखुक ईलास।”
37 “तेबे धरमाती लोग हुनके बलदे, ‘ए परभु, आमी केबे तुके भूके दखलु आउर भात खुआलु? आउर केबे पियास होलो के दखुन पानी खुआलु?
38 आमी केबे तुके परदेसिया दखलु आउर तुके आपलो घरे ठेबालु?
39 आमी केबे तुके नांगड़ा दखलु आउर फटई पिंदालु? आमी केबे तुके बेमार पड़लोदांय आउर जयल घरे रलोदांय दखुक ईलु’?”
40 “तेबे राजा हुनमन के बलेदे, मय तुमके सते बलेंसे, तुमी जोन बले मोचो नानी ले नानी भाईमन ले गोटोक काजे करलास, हुन मोचो काजे करलास।”
41 तेबे डेबरी बाट चो लोगमन के बलेदे, “ए सराप पावलो लोग, तुमी मोचो लग ले जाहा, आउर केबई नी लिबतो आईग ने जाउन घसरा, जेके सयतान आउर हुनचो दूतमन के जुग-जुग काजे तियार करलोर आसे।
42 कसनबलले मय भूके रयें, आउर तुमी मोके भात नी दिलास; मय पियास होउन रयें, आउर तुमी मोके पानी नी खुआलास;
43 मय परदेसिया रयें, आउर तुमी मोके आपलो घरे नी ठेबालास; मय नांगड़ा रयें, आउर तुमी मोके फटई नी पिंदालास; मय बेमार आउर जयल घरे रयें, आउर तुमी मोके दखुक नी ईलास।”
44 “तेबे हुनमन बलदे, ‘ए परभु, आमी केबे तुके भूके, नोहले पीयासे, नोहले परदेसिया, नोहले नांगड़ा, नोहले बेमार आउर जयल घरे दखलु आउर तुचो सेवा-सुस्तारा नी करलु?’
45 तेबे हुन, हुनमन के बलेदे, ‘मय तुमके सते बलेंसे, तुमी जोन बले मोचो नानी ले नानी भाईमन ले गोटोक काजे नी करलास, हुन मोचो काजे बले नी करलास।’
46 एईकाजे, एमन जुग-जुग चो डंड भोगदे, मानतर धरमकारीमन जुग-जुग चो जीव पावदे।”