जीसु के धरतो काजे सोर होतोर
26
जीसु ए जमाय गोटमन के सांगलो पाछे, आपलो चेलामन के बललो,
2 “तुमी जानेसाहास कि दुय दिन चो पाछे फसह तिहार आय, आउर मय मनुक चो बेटा के कुरूस ने चेगातो काजे धरादे।”
3 तेबे पुजारीमन चो मुखियामन आउर धरम-सियानमन, काइफा नाव चो बड़े पुजारी चो माहाल ने रूंडा होला,
4 हुनमन आपलाहान ने बिचार करुक मुरियाला कि जीसु के कसन छंद ले धरुन मोरते मारवां।
5 मानतर हुनमन बलला, “तिहार बेरा नाई, असन नी होओ कि लोगमन आमचो उपरे एओत।”
जीसु चो मुंडे बासतेल रिकातोर
6 जिदलदांय जीसु बेतनिया गांव ने समोन कोढ़ी चो घरे रये,
7 तेबे गोटोक बायले संगमरमर पकना चो कोंडी ने खुबे महांग बिती बासतेल आनली, आउर जीसु खाउक बसलोदांय हुनचो मुंडे रिकाउन दिली।
8 एके दखुन जीसु चो चेलामन रीस होउन बलुक मुरियाला, “एके काय काजे फोकाहा नसालीस?
9 एके जुगे मोल ने बिकुन, गरीब-दुखीमन के देउक होती।”
10 एके जानुन जीसु हुनमन के बललो, “ए बायले के काय काजे खिजेसाहास? हुन मोचो संगे भलई करलीसे।
11 गरीब-दुखी तुमचो संगे अमदेया रदे, मानतर मय तुमचो संगे अमदेया नी रयें।
12 हुन बायले मोचो देहें ने बासतेल रिकाली*, जोन मोके माटी देतो चो चीना आय।
13 मय तुमके सते बलेंसे, सबु संवसार ने कहांय बले नंगत खबर सुनादे, हुता ए बायले करलो बुता के बले सूरता करदे।”
जहूदा इसकरियोती धोका देयसे
14 तेबे जहूदा इसकरियोती, जोन बारा चेलामन ले गोटोक रये, हुन बड़े पुजारीमन लगे जाउन बललो,
15 “मय हुनके तुमचो हाथे धराउन दिले, तुमी मोके काय दियासे?” हुनमन तीस ठन चांदी चो सिक्का के गनुन हुनके दिला।
16 जहूदा हुनी बेरा ले जीसु के धरातो मोहका डगराउक मुरियालो।
चेलामन संगे जीसु चो फसह तिहार चो आखरी भोज
17 फसह तिहार* चो पईल दिने, चेलामन जीसु लगे एउन पूछुक मुरियाला, “आमी तुचो काजे फसह तिहार चो रांदा-बाड़ा कहां करतो काजे तुय मने करसीस?”
18 जीसु बललो, “जरूसलेम सहर ने फलना लगे जाहा आउर बला, ‘गुरुजी बलेसे, मोचो बेरा लगे अमरलीसे। मय आपलो चेलामन संगे तुचो घरे फसह तिहार मनाउआंय’।”
19 तेबे चेलामन उसनेची करला जसन जीसु हुनमन के सांगुन रये, आउर हुनमन फसह तिहार चो रांदा तियार करला।
20 जिदलदांय सांज होली तेबे जीसु बाराझन चेलामन संगे खाउकलाय ईलो।
21 जेबे हुनमन खाते रला तेबे जीसु बललो, “मय तुमके सते बलेंसे, तुमीमन ले गोटोक मोके धरायदे।”
22 एके सुनुन चेलामन खुबे मुरमुरा होला, आउर सबु झन जीसु के पूछुक मुरियाला, “ए गुरुजी, काय, हुन मय आंय?”
23 जीसु हुनमन के बललो, “जोन मोचो संगे गोटकी थारी ने खायसे, हुनी मोके धरायदे।
24 मय मनुक चो बेटा चो बारे ने जसन धरमसास्तर ने लिखलोर आसे, उसने होयसे; मानतर जेचो किरता मनुक चो बेटा धरा पड़ेसे, हुनचो उपरे सराप; हुन मनुक नी जनमतो जाले, हुनचो काजे नंगत होती।”
25 तेबे हुनके धरातो बीता जहूदा बललो, “ए गुरुजी, काय हुन मय आंय?” जीसु हुनके बललो, “तुय खुदे बललीस।”
परभु भोज
26 जिदलदांय हुनमन खाते रला, तेबे जीसु रोटी धरुन महापरभु के धन-धन करलो आउर रोटी के गोंदा करुन चेलामन के दिलो आउर बललो, “एके खाहा; ए मोचो देहें आय।”
27 फेर जीसु बटका के धरुन जुहार करलो, आउर हुनमन के अंगुर रस चो बटका के देउन बललो, “तुमी सबु एता ले खाहा,
28 कसनबलले ए लोउ, मोचो बायदा चो आय, जोन खुबे लोग चो पापमन चो खेमा काजे बोहालोर आसे।
29 मय तुमके सते बलेंसे, मोचो बुआ चो राज ने तुमचो संगे अंगुर रस नी खाओत ले, एदांय मय अंगुर रस केबई नी खायें।
30 हुनमन फेर गीत गावला आउर जयतून डोंगरी ने गेला।”
पतरस काजे जीसु चो अगमगोट
31 तेबे जीसु हुनमन के बललो, “तुमी सपाय आजी राती मोके छांडुन जाहासे, कसनबलले धरमसास्तर ने असन लिखलोर आसे:
‘मय धोरई के मारेंदे,
आउर गोहड़ी चो मेंडामन जत-खत होदे।’†
32 मानतर मय जीव उठलो पाछे, तुमचो ले आगे गलील परघन ने जायंदे।”
33 पतरस ए गोट के सुनुन जीसु के बललो, “सपाय चेलामन तुके छांडले छांडोत, मानतर मय केबई तुके नी छांडें।”
34 जीसु हुनके बललो, “मय तुके सते बलेंसे, आजी चे राती कुकड़ा बासतो ले आगे, तुय मोके तीन हार ‘नी जाने’ बलसे।”
35 पतरस जीसु के बललो, “मोके तुचो संगे मोरुक होले बले, मय केबई तुके ‘नी जाने’ नी बलें।” सपाय चेलामन बले असने ची बलला।
गतसमनी पदर ने जीसु चो पारथना
36 तेबे जीसु आपलो चेलामन संगे गतसमनी नाव चो पदर ने ईलो, आउर हुनमन के बललो, “मय हुता जाउन पारथना करुन एओतले तुमी एता बसुन राहा”
37 आउर हुन, पतरस आउर जबदी चो दुनो बेटा के आपलो संगे नीलो, जीसु मुरमुरा आउर डाहाल-बिकाल होउक मुरियालो।
38 तेबे जीसु हुनमन के बललो, “मोचो जीव खुबे मुरमुरा आसे, आउर जीव गेलो असन लागेसे। तुमी एताय ठेबा आउर मोचो संगे चेता राहा।”
39 फेर हुन खिंडिक पुरे गेलो आउर डंडासरन करुन, पारथना करुक मुरियालो, “ए मोचो बुआ, होउक सके जाले, ए दुख चो बटका के मोचो ले गुचाव, तेबले बले मय जसन मन करेंसे उसन नाई, मानतर जसन तुय मन करसीस उसनेची होओ।”
40 आउर हुन चेलामन लगे बोहड़ुन ईलो आउर हुनमन के सोवतोके दखलो, जीसु, पतरस के बललो, “काय, तुमी मोचो संगे डंडिक बले चेता रउक नी सकास?
41 चेता राहा, आउर पारथना करते राहा, कसनबलले तुमी जचई ने नी पड़ा; आत्मा तो तियार आसे, मानतर देहें निमल आसे।”
42 जीसु दुसर हार जाउन असन पारथना करलो, “ए मोचो बुआ, ए दुख चो बटका ले मोके खातोर ची आय जाले, तुचो मन-इछा पुरा होओ।”
43 जीसु फेर चेलामन लगे बोहड़लो तेबे हुनमन के भारी नींद ने सोवतोके दखलो।
44 जीसु हुनमन के छांडुन फेर गेलो, आउर तीसर हार बले असने ची बलुन पारथना करलो।
45 तेबे जीसु चेलामन लगे बोहड़लो आउर हुनमन के बललो, “तुमी एबे सोवते आउर बिसाते राहा; दखा, हुन बेरा अमरलीसे मय मनुक चो बेटा, पापीमन चो हाथे धराय होयंसे।
46 उठा, जो; दखा, मोके धराउ बीता लगे अमरलोसे।”
जीसु के धरातोर
47 जीसु ए बलते ची रये, हुदलीदांय जहूदा जोन बारा चेलामन ले गोटोक आय, ईलो। हुनचो संगे खांडा-बड़गामन धरलो बड़े भीड़ बले ईली, जेके बड़े पुजारीमन आउर धरम-सियानमन पठाउन रओत।
48 जीसु के धराउ बीता हुनमन के सांगुन रये, “जेके मय चूमेंदे हुनी आय; हुनके धरा।”
49 जहूदा तूरते जीसु लगे जाउन बललो, “ए गुरुजी, जुहार!” आउर हुनके चूमलो।
50 जीसु हुनके बललो, “ए मीत, तुय जोन बुता करुक ईलीसीस, हुनके कर।” तेबे हुनमन लगे एउन जीसु के धरला।
51 हुदलीदांय जीसु संगे रलोमन ले गोटोक झन आपलो खांडा ले बड़े पुजारी चो कमेया के मारलो आउर हुनचो कान छिडली।
52 तेबे जीसु हुनके बललो, “आपलो खांडा के सोलका ने संगाव कसनबलले जोन खांडा ने मारेसे हुनके बले खांडा ले मारदे।
53 काय तुय नी जानीस, मय आपलो बुआ ले गुहारुक सकें, आउर हुन बारा पलटन ले आगर सरगदूतमन के मोचो लगे एबे पठाउन देयदे?
54 मानतर पवितर सास्तर चो गोट असन होतोर ची आय, नोहले हुन कसन पुरा होयदे?”
55 जीसु भीड़ के बललो, “काय, तुमी मोके चोर-खंगार समजुन खांडा बड़गामन धरुन ईलासाहास? मय रोजे दिने मंदिर ने बसुन महापरभु चो गोट सांगते रयें, आउर तुमी मोके हुदलदांय नी धरलास।
56 मानतर अगमजानीमन चो गोट पुरा होतो काजे ए सपाय होली।” तेबे सबु चेलामन जीसु के छांडुन पराला।
धरम मंडली ने जीसु
57 जीसु के धरु बीतामन हुनके काइफा नाव चो बड़े पुजारी लगे नीला, जोन थाने धरम-पंडितमन आउर धरम-सियानमन बले रूंडा होउन रओत।
58 पतरस लापी ले जीसु चो पाट-पाट बड़े पुजारी चो माहाल चो दुआरे गेलो, आउर भीतरे जाउन नियाव-दाव दखतो काजे कमेयामन संगे बसलो।
59 बड़े पुजारी आउर धरम मंडली, जीसु के मोरते मारतो काजे हुनचो बिरुद ने फंदी गवा डगराते रओत,
60 मानतर खुबे फंदी गवामन ईलो पाछे बले, हुनमन के फंद गवई नी मिरली। सरासरी ने दुयझन गवई देतो बीतामन ईला,
61 आउर बलला, “ए बलुन रये कि महापरभु चो मंदिर के मय घसराउक सकें आउर तीन दिन ने बनाउक सकें।”
62 तेबे बड़े पुजारी उबा होउन जीसु के बललो, “काय, तुय काई नी बलीस? ए लोगमन तुचो बिरुद ने काय गवई देयसोत?”
63 मानतर जीसु ओगाय रलो। बड़े पुजारी, जीसु के बललो, “मय तुके जीवत महापरभु चो किरिया खुआयंसे, तुय महापरभु चो बेटा किरिस्त आस जाले, मोके सांग।”
64 जीसु हुनके बललो, “तुय खुदे बललीस; मय तुके बलेंसे, एदांय ले तुमी, मय मनुक चो बेटा के, सबु ले सकत चो महापरभु चो उजा हाथ बाटे बसलोर, आउर बादरी उपर ले एतोके दखासे।”
65 बड़े पुजारी आपलो फटई के चीरुन बललो, ए महापरभु के निंदरेसे, एदांय आमके गवई चो काय जरुरत आसे? दखा, तुमीमन एबे महापरभु के निंदरतोके सुनलासाहास!
66 तुमचो काय बिचार आसे? हुनमन बलला, “ए मोरते मारतो लाईक आय।”
67 तेबे हुनमन जीसु चो थमना ने थूकला आउर हुनके ढुमका मारला, दुसर लोगमन थापड़ मारुन बलला,
68 “ए किरिस्त, आमके अगमगोट गोटेयाउन सांग, तुके कोन मारलो?”
पतरस, जीसु के ‘नी जाने’ बलतोर
69 पतरस बाहरी दुआरे बसुन रये, हुदलीदांय गोटोक कमेयीन हुनचो लगे एउन बलली, “तुय बले जीसु गलीलेया संगे रयीस।”
70 पतरस सपाय लोगमन चो पुरे असन बललो, “मय हुनके नी जाने, तुय काय बलसीस।”
71 जिदलदांय हुन बाड़ा चो कपाट लगे गेलो, तेबे दुसर कमेयीन बले हुनके दखुन हुता रलो लोगमन के बलली, “ए बले जीसु नासरतेया संगे रये।”
72 पतरस किरिया खाउन फेर बललो: “मय हुन मनुक के नी जाने।”
73 खिंडिक पाछे जोन लोगमन हुता उबा रला, हुनमन पतरस लगे एउन बलला, “सते तुय बले हुनमन ले गोटोक आस, कसनबलले तुचो भासा बोली ले तुके जानुक होयसे।”
74 तेबे पतरस सरापुन आउर किरिया खाउन बललो: “मय हुन मनुक के नी जाने।” तूरते कुकड़ा बासली।
75 तेबे पतरस के जीसु चो सांगलो गोट सूरता ईली: “कुकड़ा बासलो ले आगे तुय मोके तीन हार नी जाने बलसे।” तेबे पतरस बाहरी जाउन सुयकुन-सुयकुन गागलो।