जीसु के पिलातुस लगे बांधुन नेतोर
27
जिदलदांय बियान पावली, तेबे सपाय बड़े पुजारीमन आउर धरम-सियानमन, जीसु के मोरते मारतो काजे सोर होला।
2 हुनमन जीसु के बांधुन राजपाल पिलातुस चो हाथे सोपुन दिला।
जहूदा चो उचकी होतोर
3 जीसु के धराउ बीता जहूदा जेबे दखलो कि जीसु के कसूरदार ठेबाला, तेबे हुन खिसियाउन तीस ठन चांदी चो सिक्कामन के बड़े पुजारीमन आउर धरम-सियानमन लगे फिराउन आनलो
4 आउर बललो, “मय बेकसूर बीता के मोरते मारतो काजे धराउन पाप करलेसे!” हुनमन बलला, आमके काय आय? तुयचे जान।
5 तेबे सिक्कामन के मंदिर ने पकाउन हुन जाते गेलो, आउर जाउन उचकी होलो।
6 पुजारीमन चो मुखियामन सिक्कामन के बेचुन बलला, “एके, भंडार ने संगातोर नंगत नोआय, कसनबलले ए लोउ चो मोल आय।”
7 हुनमन सोर होउन हुन सिक्कामन ले परदेसियामन के माटी देतो काजे कुमार चो बेड़ा के घेनला।
8 एई किरता हुन बेड़ा के आजी ले लोउ चो बेड़ा बलसोत।
9 तेबे जोन बचन अगमजानी जरमिया आगे बलुन रये, हुन पुरा होली: “हुनमन हुन तीस ठन सिक्कामन के धरला, जेके इसराएलिमन हुनके मोलयाउन रओत,
10 आउर जसन परभु मोके हुकुम देउन रये, उसनेची हुनमन, हुन सिक्कामन ले कुमार चो बेड़ा के घेनला।”
पिलातुस पूछलो गोट
11 जीसु, पिलातुस चो पुरे उबा रलोदांय हुन जीसु के पूछलो, “काय तुय जहूदीमन चो राजा आस?” जीसु हुनके बललो, “तुय खुदे बलसीस।”
12 जिदलदांय पुजारीमन चो मुखियामन आउर धरम-सियानमन जीसु के बदी देते रओत, मानतर जीसु काई नी बललो।
13 एके दखुन पिलातुस, जीसु के बललो, “काय तुय नी सुनीस, एमन तुचो बिरुद ने कितरो गवई देयसोत?”
14 मानतर जीसु हुनचो गोटोक गोट के बले नी उलटालो, एके दखुन पिलातुस भक्याउन गेलो।
जीसु के कुरूस ने चेगातो हुकुम
15 राजपाल पिलातुस चो नीती रये कि हुन तिहार चो दिने लोगमन काजे कोनी गोटोक कयदी के जेके हुनमन मने करसोत, छांडुन देते रये।
16 हुदलदांय बरअबा नाव चो गोटोक कयदी जयल ने रये, जेके खंगार आय बलुन सपाय जानते रओत।
17 जिदलदांय हुनमन रूंडा होला, तेबे पिलातुस हुनमन के बललो, “तुमी कोके मने करसाहास, मय कोन कयदी के तुमचो काजे छांडुआंय? बरअबा के नोहले जीसु के, जेके किरिस्त बलसोत?”
18 कसनबलले हुन जानते रये, हुनमन ईरका चो किरता जीसु के धरालासे।
19 जिदलदांय हुन नियाव गादी ने बसुन रये, तेबे हुनचो बायले गोटोक खबर पठाली, “तुय हुन धरमकारी चो गराहां ने पुरे नी पड़, कसनबलले मय आजी सपना ने हुनचो किरता खुबे डरले।”
20 पुजारीमन चो मुखियामन आउर धरम-सियानमन, लोगमन के उकसाला कि हुनमन बरअबा के छांडतो काजे, आउर जीसु के मोरना चो डंड देतो काजे बलोत।
21 राजपाल पूछलो, “ए दुनो ले मय कोन कयदी के तुमचो काजे छांडुआंय?” हुनमन बलला, “बरअबा के छांडुन देस।”
22 पिलातुस हुनमन के फेर पूछलो, जीसु जेके किरिस्त बलसोत, हुनके मय काय करेंदे? सबु झन बलला, “एके कुरूस ने चेगाहा।”
23 राजपाल बललो, “काय काजे, हुन काय कसूर करलोसे?” मानतर हुनमन आउर जोर ले चिचियाउन-चिचियाउन बलुक मुरियाला, “हुनके कुरूस ने चेगाहा।”
24 जिदलदांय पिलातुस दखलो कि हुनचो ले काई होउक नी सके, मानतर हुनचो उलटा अदिक कोलार होते रओत, तेबे हुन पानी धरुन भीड़ चो पुरे हाथ धोउन बललो, “ए धरमकारी चो लोउ ले मोचो काई कसूर नीआय; एके तुमी ची जाना।”
25 सपाय लोगमन बलला, “एचो लोउ बोहातो चो दोस आमचो उपरे आउर आमचो बेटा-बेटी उपरे लागो!”
26 पिलातुस, बरअबा के हुनमन काजे छांडुन दिलो, आउर जीसु के कोड़ा झोकाउन पाईकमन चो हाथे कुरूस ने चेगातो काजे सोपुन दिलो।
पाईकमन जीसु चो इजित धरतोर
27 तेबे पिलातुस चो पाईकमन जीसु के राजबाड़ा ने नीला आउर हुता सपाय पलटन जीसु चो चारो कुती रूंडा होला,
28 जीसु चो फटई के हिटाउन हुनके लाल रंग चो फटई पींदाला,
29 आउर काटा के गुतुन मुकुट बनाउन जीसु चो मुंडे पींदाला, आउर हुनचो उजा हाथे गुगुनड़ा के धराला, फेर हुनचो पुरे मांडिखुटा देउन हुनके हांसी-खेली करुक मुरियाला। आउर बलला, “ए जहूदीमन चो राजा, तुके जुहार!”
30 आउर जीसु उपरे थूकला; आउर हुनी गुगुनड़ा के धरुन हुनचो मुंडे मारुक मुरियाला।
31 हुनके हांसी-खेली करलो पाछे, हुनमन लाल रंग चो फटई के निकराउन जीसु चो फटई के फेर पींदाला आउर हुनके कुरूस ने चेगातो काजे नीला।
जीसु के कुरूस ने चेगातोर
32 सहर ले जीसु के बाहरी नेतो बेरा हुनमन समोन नाव चो गोटोक कुरेनेया* मनुक के भेटला। हुनमन हुनके जीसु चो कुरूस नेतो काजे बेरपेला करला।
33 हुनमन, हुन जगा ने ईला जेके गुलगुता बललोने “टापरी चो जगा” बलसोत।
34 हुनमन जीसु के पीता बिती मिसालो अंगुर रस के पीवतो काजे दिला, मानतर जीसु, हुनके चाकुन पीउक मन नी करलो।
35 तेबे हुनमन जीसु के कुरूस ने चेगाला, आउर चिटी पकाउन हुनचो फटई के आपलाहान ने बाटला।
36 आउर हुता बसुन जीसु चो राखा करुक मुरियाला।
37 आउर हुनचो दोस-पतर हुनचो मुंड उपरे कुरूस ने लटकाउन रओत, हुता लिखलोर रये, “ए जहूदीमन चो राजा जीसु आय”।
38 एचो पाछे दुयझन खंगारमन ले गोटोक के हुनचो डेबरी हाथ बाटे आउर दुसर के उजा हाथ बाटे कुरूसमन ने चेगाला।
39 एतो-जातो लोगमन मुंड हलाउन-हलाउन जीसु के निंदरते रओत,
40 आउर बलते रओत, “ए मंदिर के घसराउ बीता आउर तीन दिन ने बनाउ बीता, तुय खुद के बचाव! तुय महापरभु चो बेटा आस जाले, कुरूस ले उतरुन आव।”
41 असने बरन ले पुजारीमन चो मुखियामन, धरम-पंडितमन आउर धरम-सियानमन बले जीसु चो हांसी करुन बलते रओत,
42 “ए दुसर के बचालो मानतर खुद के बचाउक नी सके। ‘ए तो इसराएल चो राजा’ आय। एबे कुरूस ले उतरुन ईलोने आमी एके पतेयाउंदे।
43 ए महापरभु के भोरसा करलोसे; महापरभु एके मया करेसे जाले बचाओ, कसनबलले ए बलुन रये, ‘मय महापरभु चो बेटा आंय’।”
44 असने ची खंगारमन बले जोनमन के जीसु संगे कुरूसमन ने चेगाउन रओत, हुनके निंदरते रओत।
जीसु चो जीव छांडतोर
45 मुंडे बेरा ले धरुन आड़ बेरा अमरतले मंजपुर ने सबु बाटे अंधार होउन रली।
46 आड़ बेरा जीसु जोर ले चिचियाउन बललो: “एली, एली, लमा सबकतनी?” बललोने “ए मोचो महापरभु, ए मोचो महापरभु, तुय मोके काय काजे छांडलीस?”
47 हुता उबा रलो लोगमन ले, खुबे लोगमन एके सुनुन बलला, “हुन अगमजानी एलिया के हागदेयसे।”
48 हुनमन ले गोटोक तूरते पराते गेलो आउर बुच के अमटालो अंगुर-रस ने चोबरलो आउर हुनके गुगुनड़ा ने धरुन जीसु के चुपरालो।
49 दुसर लोगमन बलला, “रउक देस, दखवां, अगमजानी एलिया हुनके बचाउक एयदे कि नाई।”
50 फेर जीसु खुबे जोर ले चिचियालो आउर जीव छांडलो।
51 उधापड़े दखा, मंदिर चो पड़दा उपर ले खाले चीरी होउन दुय गोंदा होली; फेर भुंय डोलली आउर सिलपटमन बले टुटुन गेली,
52 मोठमन उगाड़ी होली, आउर मोरलो पवितर लोगमन चो मोड़ीमन जीव पड़ला।
53 जीसु जीव उठलो पाछे, हुनमन मोठमन ले निकरुन पवितर सहर ने गेला आउर खुबे लोगमन के दखा दिला।
54 तेबे पलटन चो बड़े मुखिया आउर हुनचो संगे जीसु चो राखा करतो लोग, भुंयडोल आउर जोन काई बले होउन रये, हुनके दखुन खुबे डरला आउर बलला, “सते हुन महापरभु चो बेटा रये!”
55 आउर हुता खुबे बायलेमन बले रओत जोनमन गलील ले जीसु चो सेवा करते हुनचो संगे एउन रओत, हुनमन लापी ले दखते रओत।
56 हुता मरियम मगदलीनी, जाकूब आउर जोसेस चो आया मरियम, आउर जबदी चो बेटामन चो आया रला।
जीसु चो मोड़ी के करपन ने संगातोर
57 जिदलदांय सांज होली, तेबे अरिमतिया गांव चो गोटोक जूसुफ नाव चो सवकार मनुक ईलो, जोन खुदे जीसु चो चेला रये। हुन पिलातुस लगे जाउन जीसु चो मोड़ी के मांगलो।
58 तेबे पिलातुस, जीसु चो मोड़ी के देतो चो हुकुम दिलो।
59 जूसुफ, जीसु चो मोड़ी के नेउन, पंडरी पटका ने गुंडियालो,
60 आउर हुनके आपलो नवा करपन ने संगालो, जेके हुन सिलपट ने खोड़ाउन रये आउर करपन चो बाट ने बड़े पकना के ढाकुन जाते गेलो।
61 मरियम मगदलीनी आउर दुसर मरियम, मोठ पुरे बसुन रओत।
मोठ के राखा करतोर
62 बिसातो दिने, पुजारीमन चो मुखियामन आउर फरीसीमन, पिलातुस लगे रूंडा होला आउर बलला,
63 “ए महाराजा, आमके सूरता आसे कि हुन भरमाउ बीता जीव रलो बेरा बलुन रये, ‘मय तीन दिन चो पाछे जीव उठेंदे।’
64 एईकाजे तुय एदांय हुकुम देस कि तीसर दिन होओतले हुनचो मोठ ने राखा रओत, असन नी होओ कि हुनचो चेलामन एउन हुनचो मोड़ी के चोरुन नेओत आउर लोगमन के बलुक मुरियाओत कि ‘हुन मोरलो थान ले जीव पड़लोसे।’ तेबे ए पाछे चो धोका, आगे ले बले आगर अडरा होयदे।”