19
तेबे पिलातुस, जीसु के कोड़ा संगे मारतो हुकुम दिलो।
2 आउर पाईकमन काटा चो मुकुट गुतुन हुनचो मुंडे पींदाला आउर हुनके बांगा रंग चो फटई पींदाला;
3 आउर हुनचो लगे एउन-एउन बलुक मुरियाला, ए जहूदीमन चो राजा, जुहार! आउर हुनके थापड़ बले मारला।
4 तेबे पिलातुस बाहरे एउन जहूदीमन के बललो: दखा, मय हुनके तुमचो लगे फेर बाहरे आनेंसे; कसनबलले तुमी जाना, मय काई बले कसूर नी पावलेसे।
5 तेबे जीसु के काटा चो मुकुट आउर बांगा रंग चो फटई पींदाउन बाहरे निकरालो आउर पिलातुस, जहूदीमन के बललो: ए मनुक के दखा!
6 जिदलदांय पुजारीमन चो मुखियामन आउर पाईकमन हुनके दखला, तेबे किरकिरुन बलला, हुनके कुरूस ने चेगाहा, कुरूस ने चेगाहा। पिलातुस हुनमन के बललो, तुमीचे हुनके नेउन कुरूस उपरे चेगाहा; कसनबलले मय हुनचोने काई कसूर नी पावले।
7 जहूदीमन पिलातुस के बलला: आमचो बले नियम-कानुनमन आसे आउर हुनचो हिसाब ने हुनके मोरते मारतोर आय। कसनबलले हुन आपने के महापरभु चो बेटा बललो।
8 जिदलदांय पिलातुस ए गोट के सुनलो, तेबे आउर बले डरलो।
9 हुन फेर माहाल चो भीतरे गेलो आउर जीसु के पूछलो: तुय कोन गांव चो आस? मानतर जीसु हुनके काई नी बललो।
10 पिलातुस हुनके पूछलो: मोचो संगे काय काजे नी गोटेयायसीस? काय, तुय नी जानीस, तुके छांडतो हक मोके आसे आउर तुके कुरूस ने चेगातो हक बले मोके आसे?
11 जीसु हुनके बललो: तुके महापरभु नी दिलोने, मोचो उपरे तुके काई हक नी होती; एईकाजे जोन मोके तुचो हाथे सोपलोसे, हुनचो पाप खुबे आय।
12 एईकाजे पिलातुस, जीसु के छांडुन देतो उआट खोजलो, मानतर जहूदीमन किरकिरुन-किरकिरुन बलला: तुय एके छांडुन दिलोने कयसर चो मीत नोआस; जोन कोनी बले आपने के राजा बनायसे, हुन कयसर चो बयरी आय।
13 ए गोटमन के सुनुन पिलातुस, जीसु के बाहरे आनलो आउर हुन थाने गोटोक भउता रये, जेके इबरानी बोली ने गब्बता बलसोत, हुता नियाव गादी ने बसलो।
14 ए फसह तिहार मनातो चो तियार करतो दिने मुंडे बेरा रली; तेबे हुन जहूदीमन के बललो: दखा, एई आय, तुमचो राजा!
15 मानतर हुनमन चिचियाला: एके निया! एके निया! कुरूस ने चेगाहा। पिलातुस हुनमन के पूछलो: काय, मय तुमचो राजा के कुरूस ने चेगायंदे? पुजारीमन चो मुखियामन बलला: कयसर के छांडुन आमचो आउर दुसर कोनी राजा नीआय।
16 तेबे पिलातुस जीसु के जहूदीमन चो हाथे सोपुन दिलो कि हुनके कुरूस ने चेगाओत।
जीसु के कुरूस ने चेगातोर
17 तेबे हुनमन, जीसु के आपलो कुरूस के बोउन खोपड़ी नाव चो ठान ने नीला, जेके इबरानी बोली ने गुलगुता बलसोत।
18 हुता हुनमन जीसु के आउर हुनचो संगे आउर दुयझन मनुकमन के कुरूसमन ने चेगाला, गोटोक के उजा बाटे, दुसर के डेबरी बाटे आउर मंजिगता जीसु के।
जीसु आउर दुयझन मनुकमन के कुरूस ने चेगालासे (19:18)
19 पिलातुस गोटोक पटी लिखुन कुरूस ने लगालो, आउर हुन थाने असन लिखुन रये, “जीसु नासरतेया जहूदीमन चो राजा।”
20 ए कसूर-पटी के खुबे जहूदीमन पढ़ला, कसनबलले जोन थाने जीसु के कुरूस ने चेगाउ रओत हुन, सहर लगे रये आउर पटी ने इबरानी बोली, लतीनी बोली आउर जूनानी बोली ने लिखुन रये।
21 तेबे जहूदीमन चो पुजारीमन चो मुखियामन, पिलातुस के बलला, “जहूदीमन चो राजा” नी लिख, मानतर असन लिख कि हुन बललो, “मय जहूदीमन चो राजा आंय।”
22 पिलातुस हुनमन के बललो: मय जोन लिखले, हुनके लिखलेसे।
23 जिदलदांय पाईकमन, जीसु के कुरूस उपरे चेगाला, तेबे हुनचो फटई के नेउन चार बाटा करला, गोटोक-गोटोक पाईकमन, गोटोक बाटा धरला। मानतर कुड़ता बिन सीलन चो रये आउर उपर ले खाले ले बुनलोर रये।
24 एईकाजे हुनमन गोटोक-दुसर ले बलला: आमी एके नी चीरुं, एचो काजे चिटी जनावां कि ए कोचो होयदे। असन एईकाजे होली कि पवितर सास्तर चो बचन पुरा होओ:
“हुनमन मोचो फटई के आपलाहान ने बाटला,
आउर मोचो कुड़ता काजे जनाला।”†
एईकाजे पाईकमन असने ची करला।
25 मानतर जीसु चो कुरूस लगे हुनचो आया आउर हुनचो आया चो बईन, कलोपास चो बायले मरियम आउर मरियम मगदलीनी उबा रओत।
26 जीसु आपलो आया आउर हुन चेला के, जेके हुन मया करलो, लगे उबा होलो दखुन आपलो आया के बललो: ए आया, दख ए तुचो बेटा आय।
27 तेबे हुन चेला के बललो: ए तुचो आया आय, हुदलीदांय ले हुन चेला, हुनके आपलो घरे नीलो।
जीसु चो मोरना
28 एचो पाछे, जीसु एके जानुन कि एदांय सपाय बानी होलीसे; बललो: “मोके पियास लागेसे।”† (एईकाजे कि पवितर सास्तर चो गोट पुरा होओ),
29 हुता अमटालो अंगुर-रस ले भोरलोर गोटोक कसला रये, तेबे हुनमन अमटालो अंगुर-रस ने चोबरलो बुच के गुगुनड़ा ने संगाउन हुनके चुपराला।
30 जिदलदांय जीसु हुन अंगुर चो अमटालो अंगुर-रस चाकलो, तेबे बललो: पुरा होलीसे आउर मुंडी लोआउन जीव छांडलो।
31 हुन फसह तिहार काजे तियार करतो दिन रये। बिसातो दिन, जहूदीमन काजे गोटोक खास दिन रये, एईकाजे जहूदीमन पिलातुस ले गुहारला कि हुनमन चो पांयमन के टुटातोर आय आउर हुनमन के कुरूस ले उतरातोर आय, कसनबलले बिसातो दिने हुनमन चो मोड़ी कुरूसमन ने नी रओत।
32 पाईकमन एउन पईल बीता चो पांयमन के टुटाला आउर दुसर बीता चो बले, जेके जीसु संगे कुरूसमन ने चेगाउन रओत
33 मानतर जिदलदांय हुनमन जीसु लगे एउन दखला कि हुन मोरलोसे, तेबे हुनचो पांयमन के नी टुटाला
34 मानतर पाईकमन ले गोटोक बीता भाला संगे हुनचो पंजरा के भेदलो आउर हुन थान ले तूरते लोउ आउर पानी निकरली।
35 जोन एके दखलोसे, हुनी गवई दिलोसे, आउर हुनचो गवई सत आय; आउर हुन सत गोटेयायसे जानुन तुमी बले पतेयाहा।
36 ए गोटमन एईकाजे होलीसे कि पवितर सास्तर चो ए गोट पुरा होओ, “हुनचो कोनी हाड़ा के बले नी टुटाओ।”†
37 फेर गोटोक आउर बचन ने लिखलोर आसे, “जेके हुनमन भेदलासे, हुनके नियारदे।”†
जीसु चो मोड़ी के करपन ने संगातोर
38 ए गोटमन चो पाछे अरिमतिया चो जूसुफ, जोन जीसु चो चेला रये, मानतर जहूदीमन चो डर काजे ए गोट के कोकई नी सांगलो, आउर पिलातुस के जीसु चो मोड़ी के नेतो काजे मांगलो, आउर पिलातुस हुनचो गुहार के सुनलो, आउर जूसुफ एउन जीसु चो मोड़ी के नीलो।
39 नीकुदेमुस बले जोन आगे जीसु लगे राती बेरा जाउ रये, तीस किलो होतो असन मिसालो महकतो आउर एलवा चो मसला धरुन ईलो।
40 तेबे हुनमन जीसु चो मोड़ी के नीला आउर जहूदीमन चो मठेयातोर नीती असन हुनके महकतो तीजमन चो संगे फटई ने गुंडियाला।
41 जोन थाने जीसु के कुरूस ने चेगाला, हुता गोटोक पदर रये; आउर हुन पदर ने गोटोक नवा करपन रली जोन थाने केबई कोकई नी संगाउ रओत।
42 जहूदीमन चो तिहार होतो चो दिन किरता हुनमन जीसु चो मोड़ी के हुन करपन ने संगाला, कसनबलले हुन करपन लगे रली।