जीसु, पिलातुस चो पुरे
15
बियान पावते खन पुजारीमन चो मुखियामन, धरम-सियानमन आउर धरम-पंडितमन आउर सपाय पंच लोगमन सला होउन जीसु के बांदला आउर हुनके नेउन रोमी राज चो राजपाल पिलातुस चो हाथे सोपुन दिला।
2 आउर पिलातुस जीसु के पूछलो: “काय, तुय जहूदीमन चो राजा आस?” जीसु हुनके बललो: “तुय खुद ची बलसीस।”
3 आउर पुजारीमन चो मुखियामन जीसु चो उपरे खुबे गोटमन चो दोस लगाते रओत।
4 पिलातुस जीसु के फेर पूछलो: “दख, एमन तुचो उपरे कितरो गोटमन चो दोस लगायसोत? काय, तुय काई बललीस?”
5 मानतर जीसु काई नी बललो, एईकाजे पिलातुस भक्यालो।
जीसु के मोरना चो डंड देयसे
6 पिलातुस आपलो नीती चो हिसाब ने, हर बरक फसह तिहार बेरा गोटोक कयदी के, जेके लोगमन मांगोत, हुनके छांडुन देते रये।
7 आउर हुन बेरा कयदीमन संगे बरअबा नाव चो गोटोक मनुक रलो, जोन माने-मारा रये।
8 आउर लोगमन पिलातुस चो लगे जाउन बिनाउक मुरियाला कि जसन तुय आमचो काजे फसह तिहार ने करते ईलीसीस, उसनेची कर।
9 पिलातुस हुनमन के पूछलो: “काय, तुमी मन करसास कि मय तुमचो काजे जहूदीमन चो राजा के छांडुन देयें?”
10 कसनबलले पिलातुस जानते रये कि पुजारीमन चो मुखियामन जीसु के कुचर काजे धराउन रओत।
11 मानतर पुजारीमन चो मुखियामन, लोगमन के उसकाला कि बरअबा के छांडुन देओ।
12 जिदलदांय हुनमन बरअबा के मांगला, तेबे पिलातुस हुनमन के पूछलो: “जोन मनुक के तुमी जहूदीमन चो राजा बलुआहास, हुनके मय काय करुआंय?”
13 लोगमन चिचियाउन बलला, जीसु के कुरूस ने चेगाहा।
14 पिलातुस फेर हुनमन के पूछलो: “कसन, हुन काय कसूर करलोसे?” मानतर हुनमन आउर अदिक चिचियाला, हुनके कुरूस ने चेगाहा।
15 तेबे पिलातुस लोगमन के हरिक करतो काजे बरअबा के हुनमन काजे छांडुन दिलो; आउर जीसु के कोड़ा ने माराउन कुरूस ने चेगातो काजे पाईकमन चो हाथे सोपुन दिलो।
पाईकमन जीसु चो इजित धरसोत
16 आउर पाईकमन, जीसु के माहाल चो दुआरे, जेके पिरिटोरीयून बलुआत, आनला आउर आपलो गोहड़ा ने बाचलो सपाय पाईकमन के हागदिला।
17 आउर हुनमन जीसु के बांगा रंग असन फटई पींदाला आउर काटा चो मुकुट गुतुन हुनचो मुंडे पींदाला।
18 “हे, जहूदीमन चो राजा, तुके जुहार!” असन बलुन पाईकमन जीसु के हांसुन पकाला आउर पांय पड़ुक मुरियाला।
19 आउर हुनमन जीसु चो मुंडे ठेंगा ने मारला, आउर हुनचो उपरे थूकला आउर मांडिखुटा टेकुन हुनचो पांय पड़ुन हांसी-खेली करला।
20 जिदलदांय पाईकमन जीसु के हांसुन पकाउन थाकला, तेबे हुनचो पींदलोर बांगा रंग चो फटई के हिटाउन आपलेई खुद चो फटई के पींदाला; आउर हुनके कुरूस ने चेगातो काजे बाहरे नीला।
जीसु के कुरूस ने चेगाला
21 हुदलीदांय सिकंदर आउर रूफुस चो बुआ, समोन नाव चो गोटोक कुरेनेया मनुक, गांव बाटले एते रलो, तेबे पाईकमन, हुनके बेरपेला जीसु चो कुरूस के बोउन नेउक बलला।
22 आउर हुनमन जीसु के गुलगुता नाव चो जगा ने आनला, जेचो अरथ, टापरी चो ठान आय।
23 आउर जीसु के एकदांय पीता बिती मिसालो अंगुर रस के पीवतो काजे दिला। मानतर जीसु नी पीवलो।
24 तेबे पाईकमन जीसु के कुरूस ने टांगला; आउर हुनचो फटई काजे जनाला कि कोके काय मिरेदे; असन करुन फटई के आपलो मंजिगते बाटला।†
25 बियाने नव बजे असन जीसु के कुरूस ने टांगला।
26 आउर हुनमन गोटोक फारा ने जीसु चो दोस लिखुन कुरूस उपरे लटकाउन दिला, जोन फारा ने असन लिखु रओत कि “जहूदीमन चो राजा।”
27 पाईकमन जीसु संगे दुयझन खंगारमन के बले हुनचो डेबरी आउर उजा बाटे कुरूसमन ने टांगला।
28 आउर महापरभु चो किताप ने आगे ले लिखलो गोट पुरा होली कि हुनके चोर-चंडालमन संगे कटारदे।
29 बाटे जातो लोगमन हुनके मुंड हलाउन-हलाउन बलुन निंदरोत: “अब्बा! आमचो मंदिर के भोसड़ातो बीता आउर तीन दिन ने बनातो बीता,
30 तुय कुरूस ले उतरुन खुद के बचाव।†
31 असनी पुजारीमन चो मुखियामन आउर धरम-पंडितमन बले गोटोक-दुसर ले हेंडसाउन बलसोत कि ए दुसर लोगमन के बचालो, आउर आपने के बचाउक नी सके।
32 इसराएल चो राजा, किरिस्त एदांय कुरूस ले उतरुन एओ कि आमी दखुन बिसवास करु।” आउर जोनमन के जीसु संगे कुरूसमन ने चेगाला, हुनमन बले जीसु के सरापते रओत।
जीसु चो मोरना
33 आउर मुंडे बेरा होतोके सपाय संवसार ने अंधार होउन गेली, आउर अड़उ पाहार (तीन बजे) होओतले रली।
34 आउर अड़उ पाहार जीसु जोर ले चिचियाउन बललो: “एलोई, एलोई, लमा सबकतनी?” बललोने, “ए मोचो महापरभु, ए मोचो महापरभु, तुय मोके काय काजे छांडुन दिलीस?”†
35 जोनमन लगे उबा रओत, हुनमन थान ले कोनी-कोनी एके सुनुन बलला: “दखा, ए एलिया अगमजानी के हागदेयसे।”
36 आउर एक झन पराते जाउन बुच के अमटालो अंगुर-रस ने चोबरलो आउर गुगुनड़ा ने धरुन जीसु के चुपरालो आउर बललो: “ठेबा, दखुं कि एलिया हुनके उतरातो काजे एयसे कि नाई।”
37 आउर जीसु जोर ले चिचियाउन आपलो जीव के छांडुन दिलो।
38 मंदिर भीतरे, भीती असन गोटोक खुबे मांद फटई चो पड़दा रये। हुन पड़दा उपर ले खाले फाटून दुय भाग होउन गेली।
39 जोन पलटन चो बड़े मुखिया जीसु चो पुरे उबा रलो, हुन जीसु चो असन चिचियाउन जीव छांडतो के दखलो, तेबे हुन बललो: “सते ए मनुक महापरभु चो बेटा रये!”
40 कोनी-कोनी बायलेमन बले लापी ले दखते रओत, हुनमन ने मरियम मगदलीनी, नानी जाकूब चो आउर जोसेस चो आया मरियम आउर सलोमी रओत।
41 आउर एमन जिदलदांय जीसु गलील ने रये, तेबे हुनचो पाटे होला आउर हुनचो खुबे सेवा करते रओत; आउर हुनमन संगे खुबे दुसर बायलेमन बले जीसु संगे जरूसलेम ने ईला।
जीसु के गाड़तोर
42 बिसातो दिन चो गोटोक दिन आगे, तिहार चो सज होतो दिन चो सांज होते-होते,
43 अरिमतिया ने जूसुफ नाव चो गोटोक मनुक ईलो, जोन जहूदीमन चो गोटोक इजित-मान पावलो मंतरी रये। हुन बले महापरभु चो राज एतो बाट के दखते रये। हुन ढाढ़ुस बांदुन पिलातुस लगे जाउन जीसु चो मोड़ी के मांगलो।
44-45 पिलातुस भक्याउन गेलो कि जीसु इतरो झटके मोरुन गेलो! आउर पलटन चो बड़े मुखिया के हागदियाउन पूछलो, काय, जीसु चो मोरलोर बेर होली आउर जिदलदांय पलटन चो बड़े मुखिया ले जानलो कि जीसु मोरलोसे, तेबे मोड़ी के जूसुफ के दियालो।