जीसु चो जीव उठतोर
16
जिदलदांय बिसातो दिन गेली तो मरियम मगदलीनी, जाकूब चो आया मरियम आउर सलोमी बासतेल घेनला कि एउन जीसु चो मोड़ी के तेल घसोत।
2 आउर हपता चो पईल दिन बड़े बियाने, जिदलदांय बेर निकरुन ची रये, हुनमन जोन करपन ने जीसु चो मोड़ी रये, हुन थाने गेला।
3 आउर हुनमन आपनीमन गोटेयाला: “आमचो काजे करपन चो मुं ले पकना के कोन गुचाउआय?”
4 जिदलदांय हुनमन दखला, तेबे पकना के गुचलोर के दखला, कसनबलले हुन पकना खुबे बड़े रली।
5 आउर हुनमन करपन भीतरे जाउन गोटोक जुवान मनुक के पंडरा फटई पींदुन उजा हाथ बाटे बसलोके दखला, आउर हुनमन खुबे डरुन गेला।
6 हुन, हुनमन के बललो: “डरा नाई, तुमी जीसु नासरतेया के जेके कुरूस उपरे लोहो खुटी मारुन चेगाउ रओत डगरायसास? हुन एथा नीआय, हुन जीव उठलोसे। दखा, जोन जगा ने जीसु के हुनमन संगाउन रला।
7 मानतर तुमी जाहा आउर हुनचो चेलामन के आउर पतरस के सांगा कि जीसु तुमचो ले आगे गलील ने जायदे, जसन हुन तुमके बलु रये, तुमी हुताय हुनके दखासे।”
8 आउर हुनमन करपन ले निकरुन पराला, कसनबलले हुनमन डर काजे थरथरते रला; आउर हुनमन कोकई काई नी बलला कसनबलले हुनमन खुबे डरते रला।
जीसु, मरियम मगदलीनी के दखा देयसे
9 हपता चो पईल दिने, बड़े बियाने ची जीसु जीव उठुन सबुले आगे मरियम मगदलीनी के दखा दिलो, जेचो थान ले जीसु सातठन देव-भूतमन के निकराउन रलो।
10 हुन जाउन जीसु चो संगवारीमन, जोन दुख ने पड़ुन गागते रला, हुनमन के ए खबर दिली।
11 जिदलदांय हुनमन सुनला कि जीसु जीव उठलो आउर मरियम के दखा दिलो, तेबे हुनमन नी पतेयाला।
जीसु, चेलामन के दखा देयसे
12 एचो पाछे जीसु दुसर रूप ने चेलामन ले दुयझन के दखा दिलो, जिदलदांय हुनमन जरूसलेम ले गांव बाटे जाते रओत, आउर हुनमन जीसु के चिताला।
13 आउर हुनमन बोहड़ुन फेर जरूसलेम ने ईला, आउर दुसर चेलामन के सांगला, मानतर हुनमन ए गोट के नी पतेयाला।
14 पाछे जीसु, हुन इगारा चेलामन के, हुनमन खाउक बसलोदांय दखा दिलो, आउर हुनमन नी पतेयातोके आउर मन चो कटुर किरता रीस होलो, कसनबलले जोनमन जीसु के जीव उठलो पाछे दखु रओत हुनमन चो गोट के एमन नी पतेयाला।
15 आउर जीसु हुनमन के बललो, संवसार चो सपाय गांवमन ने जाउन सबु लोगमन के महापरभु चो नंगत खबर के सांगते राहा।
16 जोन नंगत खबर के बिसवास करेदे, आउर बपतिस्मा धरेदे हुनचो मुक्ति होयदे, मानतर जोन बिसवास नी करेदे हुनके डंड भोगतो काजे ठेबादे।
17 आउर बिसवास करतो लोगमन ले असन चीनामन होयदे कि हुनमन मोचो नाव चो हक ले देव-भूतमन के निकरादे, आउर नवा-नवा गोट (भासा) बलदे।
18 आउर हुनमन सापमन के धरदे आउर मोरतो असन मोहरा के खादले बले हुनमन चो देहें के काई नोकसान नी होयदे, हुनमन बेमार पड़लो लोगमन उपरे हाथ संगादे, तेबे बेमार लोगमन उजरदे।
जीसु सरग जातोर