पठालो-लोगमन
चो बुता
पवितर आत्मा देतो बायदा
1
ए थियुफिलुस, मय पईल किताप ने हुन सपाय गोटमन चो बारे ने लिखलेसे, जेके जीसु मूर ले करते आउर
2 हुन दिन होओतले सिखाते रलो, जोन दिन ले आपलो बाछलो पठालो-लोगमन के पवितर आत्मा बाटले हुकुम देउन भाति, उपरे सरग ने नी जाउन रलो।
3 आउर हुन, मोरलो पाछे खुबे पतेयातो लाईक चीनामन ले आपने के जीवता दखालो आउर दुय कोड़ी* दिन ले हुनमन के दखा देते रलो; आउर महापरभु चो राज चो गोट हुनमन के सांगते रलो।
4 जिदलदांय हुनमन रूंडा होला, तेबे हुन, हुनमन के हुकुम दिलो: “जरूसलेम के नी छांडा, मानतर मोचो बुआ चो हुन बायदा पुरा होतो बाट दखते राहा, जेचो गोट तुमी मोचो ले सुनलासाहास।
5 कसनबलले जूहन्ना तो सोजे पानी ले बपतिस्मा दिलोसे मानतर खिंडिक दिनमन चो पाछे तुमी, पवितर आत्मा ले बपतिस्मा पाहासे।”
जीसु चो सरग जातोर
6 हुनमन रूंडुन भाति हुनके पूछला, “ए परभु, काय तुय एबे ची इसराएलिमन के आपलो राज के फिराउन देसे?”
7 जीसु हुनमन के बललो, “हुन दिन के आउर बेरा के जानतोर तुमचो काई काम नीआय, जेके मोचो बुआ आगे ले पक्का करलोसे आउर आपलो हक ने संगालोसे।
8 मानतर जिदलदांय पवितर आत्मा तुमचो उपरे एयदे, तेबे तुमी सकत पाहासे आउर जरूसलेम, जहूदिया राज, आउर सामरिया राज आउर मंजपुर चो कोना-कोना ने मोचो गवई-साकी होआसे।”
9 असनी बलुन पाछे, हुनमन चो दखते-दखते महापरभु, जीसु के उपरे उठाउन नीलो; आउर हुनके बादरी, हुनमन चो आंईक ले लुकाउन दिली।
10 हुनचो जातो बेरा, हुनमन सरग बाटे दखते रओत, हुदलीदांय दुयझन बरतो पंडरा फटई पींदलोमन हुनमन लगे एउन उबा होला,
11 आउर बलला, “ए गलीलेयामन, तुमी काय काजे उबा होउन सरग बाटे दखसाहास? एई जीसु, जोन तुमचो थान ले सरग ने गेलोसे, जसन तुमी हुनके सरग जातो के दखसाहास, उसने हुन फेर एयदे।”
12 तेबे हुनमन जयतून नाव चो डोंगरी थान ले जरूसलेम बोहड़ुन ईला, जोन गोटोक बिसातो दिन हिंडतो इतलो बललोने, आदा-एक मील लापी ने आसे।
13 तेबे हुनमन हुन ढाबा ने गेला जोन थाने पतरस, जूहन्ना, जाकूब, अंदरियास, फिलिपुस, थोमा, बरतुलमय, मत्ती, हलफई चो बेटा जाकूब, समोन जलोतेस आउर जाकूब चो बेटा जहूदा रते रला।
14 ए सपाय चेलामन, आदो बायलेमन आउर जीसु चो आया मरियम आउर हुनचो भाईमन संगे गोटोक मन होउन पारथना करते रला।
नवा पठालो-बीता: मत्तीया
15 खिंडिक दिनमन पाछे पतरस, सतपतेयालो भाईमन, जोनमन छय कोड़ी असन मनुकमन रला, हुनमन चो मंजिगते उबा होउन बलुक मुरियालो,
16 “ए भाईमन, पवितर सास्तर चो लिखलो गोट पुरा होतोर चे रली। पवितर आत्मा दाउद राजा चो टोंड ले आगे ले जहूदा चो बारे ने बलुन रलो, जोन जीसु के धरातो लोगमन चो मुखिया रलो।
17 हुन बले आमचो संगे गनती होलो, आउर हुनके आमचो संगे सेवा करतो काजे बाछुन रलो।”
18 हुन ओधरम चो कमई ले गोटोक बेड़ा घेनलो आउर मुंड चो बोजा ने घसरलो, आउर हुनचो पेट फाटली, आउर सपाय ओंडकी-पोटी निकरली।
19 ए गोट के जरूसलेम ने रतो जमाय जानला, एईकाजे हुन बेड़ा चो नाव, हुनमन चो भासा ने हकलदमा बललोने, “लोउ चो बेड़ा” बलाय होली।
20 “कसनबलले भजन गीत ने लिखलोर आसे:
‘हुनचो घर नसुन जाओ,
आउर हुता कोनी डेरा नी पड़ोत।’†
आउर लिखलोर आसे,
‘हुनचो पन कोनी दुसर धरोत’।†
21-22 एईकाजे जितरो दिन ले जीसु परभु आमचो संगे रते रलो बललोने, जूहन्ना ले बपतिस्मा धरतो ले धरुन आमचो थान ले हुनचो सरग जातोदांय ले, जोन लोगमन अमदेया आमचो संगे रला, नंगत होयदे कि हुनमन ले गोटोक मनुक आमचो संगे जीसु चो जीव उठतो चो गवई होओ।”
23 तेबे हुनमन दुयझन के उबा करला, गोटोक जूसुफ के, जोन बरसबा बलाय होयसे आउर हुनचो दुसर नाव जूसतुस आय, आउर दुसर मत्तीया के।
24 तेबे हुनमन असन बलुन पारथना करला, “ए परभु, तुय सपाय चो बिचार के जानसीस, एके आमके दखाव कि ए दुनो ले, कोके तुय बाछलीसीस,
25 जोन ए सेवा चो आउर पठालो-लोग चो पन के धरो, जेके छांडुन भाति जहूदा आपलो जगा ने गेलो।”
26 तेबे हुनमन बरसबा आउर मत्तीया काजे चिटी पकाला, तेबे मत्तीया चो नाव ने चिटी निकरली। एईकाजे हुन, इगारा झन पठालो-लोगमन संगे गनती होलो।