जीसु चो जीव उठतोर
28
बिसातो दिन चो पाछे, हपता चो पईल दिने, बियान पावतोके मरियम मगदलीनी आउर दुसर मरियम जीसु चो मोठ के दखुकलाय ईला।
2 उधापड़े, गोटोक बड़े भुंयडोल होली, परभु चो गोटोक दूत सरग ले उतरलो आउर हुन, मोठ लगे एउन ढाकलो पकना के उलडुलाउन हुनचो उपरे बसलो।
3 हुनचो रूप पानी जागलो असन उजर आउर हुनचो फटई करा असन खुबे पंडरा रये।
4 हुनचो डर काजे राखाकरु बीतामन थरथरला, आउर मुछियान गेला।
5 सरगदूत बायलेमन के बललो, “नी डरा, मय जानेसे तुमी जीसु, जेके कुरूस ने चेगाउन रला, हुनके डगरायसाहास।
6 हुन एथा नीआय, मानतर आपलो बललो बचन असन जीव उठलोसे। इआ, ए ठान के दखा, जोन थाने परभु के संगाउन रला,
7 एदांय झपके जाउन हुनचो चेलामन के सांगा, हुन मोरलो थान ले जीव उठलोसे आउर हुन तुमचो ले आगे गलील परघन ने जायसे, हुता तुमी हुनके दखासे! दखा, मय तुमके सांगले।”
8 हुनमन डर आउर खुबे हरिक संगे करपन ले झपके बोहड़ुन जीसु चो चेलामन के खबर सांगतो काजे पराला।
9 तेबे उधापड़े जीसु हुनमन के भेट होउन बललो, “जुहार”। हुनमन जीसु लगे एउन हुनके पांय पड़ला।
10 तेबे जीसु हुनमन के बललो, “नी डरा; मोचो भाईमन के सांगा, हुनमन गलील परघन ने जाओत आउर हुता हुनमन मोके दखदे।”
राखाकरुमन चो खबर
11 जिदलदांय बायलेमन जाते ची रओत हुदलीदांय राखाकरु बीतामन ले कोनी-कोनी सहरे एउन हुता घटलो जमाय गोट के पुजारीमन चो मुखियामन के सांगला।
12 तेबे हुनमन धरम-सियानमन संगे रूंडा होउन सोर होला, आउर राखाकरु बीतामन के खुबे चांदी चो सिक्कामन देउन बलला,
13 “तुमी असन बला, राती आमी सोवलो बेरा, जीसु चो चेलामन एउन हुनचो मोड़ी के चोरुन नीला।
14 ए गोट राजपाल के सुना पड़ली जाले, आमी हुनके समजाउन देउंदे आउर तुमके गराहां ले बचाउंदे।”
15 राखाकरु बीतामन सिक्कामन के धरला आउर जसन सांगुन रला, उसनेची करला। ए गोट आजी ले बले जहूदीमन सांगते एयसोत।
जीसु चो दखा देतोर आउर आखरी हुकुम
16 इगारा झन चेला गलील परघन चो हुन डोंगरी ने गेला, जेचो बारे ने जीसु हुनमन के सांगुन रये।
17 जीसु के दखुन चेलामन हुनके पांय पड़ला, मानतर कोनी-कोनी नी पतेयाला।
18 जीसु हुनमन चो लगे एउन बललो, “सरग आउर मंजपुर चो जमाय हक मोके दिलोर आसे।
19 एईकाजे तुमी जाहा, आउर सपाय जात चो लोगमन के मोचो चेला बनाहा; आउर बुआ आउर बेटा आउर पवितर आत्मा चो नाव ने हुनमन के बपतिस्मा दियास,
20 जोन हुकुममन मय तुमके दिलेसे, हुन जमाय गोटमन के मानतो काजे तुमी सपाय लोगमन के सिखाहा: आउर दखा, संवसार सरतले अमदेया मय तुमचो संगे आंसे।”