जीसु चो जीव उठतोर
20
हपता चो पईल दिने, मरियम मगदलीनी बियाने अंधार-अंधार ने ची मोठ लगे ईली, आउर पकना के मोठ चो मुं ले गुचालोर दखली।
2 तेबे हुन पराली आउर समोन पतरस आउर हुन दुसर चेला जेके जीसु मया करु रये, हुनमन लगे एउन बलली: हुनमन परभु के मोठ ले निकराउन नीलासोत; आउर मय नी जानें कि हुनके कोन थाने संगालोर आसे।
3 तेबे पतरस आउर हुन दुसर चेला निकरुन मोठ बाटे गेला।
4 हुनमन संगे-संगे पराते रओत, मानतर हुन दुसर चेला पतरस ले पुरे जाउन मोठ लगे आगे अमरलो;
5 आउर लोउन फटईमन के दखलो; तेबले बले हुन करपन भीतरे नी गेलो।
6 तेबे समोन पतरस हुनचो पाटे-पाटे अमरलो आउर मोठ भीतरे गेलो आउर फटईमन के दखलो,
7 आउर जोन ओंगछी जीसु चो मुंडे बांदलोर रली, फटईमन संगे नाई, मानतर अदरे गोटोक थाने गुंडियालोर दखलो।
8 तेबे दुसर चेला बले जोन मोठ ने आगे अमरु रये, करपन भीतरे गेलो आउर दखुन पतेयालो।
9 हुनमन एबतले पवितर सास्तर चो हुन गोट के नी समजला कि जीसु के मोरलोमन ले जीव उठतोर होयदे।
10 तेबे ए चेलामन आपलो घरे बोहड़ुन गेला।
जीसु, मरियम के दखा देतोर
11 मानतर मरियम गागुन-गागुन करपन लगे बाहरे उबा रली आउर गागुन-गागुन करपन बाटे लोउन,
12 दुयझन सरगदूतमन के बरतो फटई पींदलोर दखली। गोटोक सरगदूत, जीसु चो मोड़ी रलो मुंड बाटे आउर दुसर, हुनचो पांय बाटे बसुन रला।
13 हुनमन मरियम के बलला: ए बाई, तुय काय काजे गागसीस? हुन, हुनमन के बलली: हुनमन मोचो परभु के नीलासोत आउर मय नी जाने, हुनके कोन बाटे संगालासे।
14 इतरो बलुन भाति हुन पाटकुती किंदरली आउर जीसु के उबा होलोर दखली, आउर नी चिताली कि हुन जीसु आय।
15 जीसु हुनके बललो: ए बाई, तुय काय काजे गागसीस? कोके डगरायसीस? मरियम, जीसु के माली समजुन बलली: ए माली, तुय जीसु के नीलिसीस जाले, मोके सांगीस नाई कि हुनके कोन थाने संगालोर आसे आउर मय हुनके नेयंदे
16 जीसु हुनके बललो: मरियम! तेबे मरियम पाटकुती उलटुन हुनके इबरानी बोली ने बलली: ए गुरुजी!
17 जीसु हुनके बललो, मोके नी छींव, कसनबलले मय एबतले बुआ लगे उपरे नी गेलेसे, मानतर मोचो भाईमन लगे जाउन हुनमन के सांगुन देस कि मय आपलो बुआ, आउर तुमचो बुआ, आउर आपलो महापरभु आउर तुमचो महापरभु लगे उपरे जायंसे।
18 मरियम मगदलीनी जाउन चेलामन के सांगली कि मय परभु के दखले आउर हुन मोके ए गोटमन के सांगलोसे।
जीसु आपलो चेलामन के दखा देतोर
19 हुनी दिने, जोन हपता चो पईल दिन रये, सांज बेरा हुता चो कपाट जोन थाने चेलामन रला, जहूदीमन चो डर काजे ढाकलोर रये, तेबे जीसु ईलो आउर मंजिगता उबा होउन हुनमन के बललो: तुमके अस्तिर मिरो।
20 असन बलुन हुन आपलो हाथमन आउर आपलो पंजरा हुनमन के दखालो। तेबे चेलामन परभु के दखुन खुबे हरिक होला।
21 जीसु फेर हुनमन के बललो: तुमके अस्तिर मिरो; जसन बुआ मोके पठालोसे, उसनेची मय बले तुमके पठायंसे
22 असन बलुन हुन, हुनमन चो उपरे फूकलो आउर हुनमन के बललो: पवितर आत्मा पाहा
23 जेचो पापमन तुमी खेमा करसास हुनमन चो पापमन खेमा होलीसे; जेचो पापमन तुमी खेमा नी करसास, हुनमन चो पापमन खेमा नी होयसे।
जीसु, थोमा के दखा देतोर
24 मानतर बारा चेलामन ले गोटोक झन बललोने थोमा जेके दिदुमुस बलसोत, जिदलदांय जीसु ईलो तेबे हुनमन संगे नी रलो।
25 जिदलदांय चेलामन हुनके बलला कि आमी परभु के दखलुसे: तेबे हुन, हुनमन के बललो, जिदलदांय ले मय हुनचो हाथमन ने खुटीमन ठेचलोर छेदामन के नी दखें, आउर खुटीमन ठेचलोर छेदामन ने आपलो अंडकी नी छिंगड़ायें आउर हुनचो पंजरा चो भोंगा ने आपलो हाथ नी संगायें, हुदलदांय ले मय नी पतेयायें।
26 आठ दिन चो पाछे जीसु चो चेलामन फेर घर भीतरे रओत, आउर थोमा बले हुनमन संगे रये, आउर कपाट ढाकुन रये, तेबे जीसु एउन हुनमन चो मंजिगता उबा होउन बललो, तुमके अस्तिर मिरो।
27 तेबे हुन थोमा के बललो, तुचो अंडकी ले मोचो हाथमन के छिंगड़ाउन दख आउर तुचो हाथ के मोचो पंजरा ने संगाव आउर नी पतेयातोके छांडुन पतेयातो बीता बन।
28 एके सुनुन थोमा बललो: ए मोचो परभु, ए मोचो महापरभु!
29 जीसु हुनके बललो: तुय तो मोके दखुन पतेयालीसीस; हुनमन धन-धन आत, जोन मोके नी दखुन पतेयालासोत।
जूहन्ना ए किताप काय काजे लिखलो?