जीसु, तिबिरियास समूंद रेटे दखा देतोर
21
ए गोटमन चो पाछे, जीसु आपने के तिबिरियास समूंद रेटे फेर चेलामन के दखालो; आउर ए असन बरन ले होली।
2 समोन पतरस आउर थोमा, जेके दिदुमुस (जुड़वा) बले बलसोत, आउर गलील राज चो काना गांव चो नतनएल आउर जबदी चो बेटामन, आउर जीसु चो चेलामन ले आउर दुयझन रूंडुन रओत।
3 समोन पतरस हुनमन के बललो, मय मछरी धरतो काजे जायंसे। हुनमन हुनके बलला: आमी बले तुचो संगे एउंसे, तेबे हुनमन निकरुन डोंगा ने चेगला, मानतर हुनी राती काईची नी धरला।
4 बड़े बियाने ची जीसु समूंद खंडे उबा होलो। मानतर चेलामन नी चिताला कि हुन जीसु आय।
5 तेबे जीसु हुनमन के पूछलो: काय, तुमचो लगे खातो काजे काई मछरी आसे? हुनमन बलला: नाई।
6 जीसु हुनमन के बललो: डोंगा चो उजा बाटे झारी के पकाहा, तेबे पाहासे। हुनमन झारी पकाला, आउर एदांय इतरो मछरीमन ईला कि हुनमन झीकुक नी सकला।
7 एईकाजे हुन चेला जेके जीसु मया करुन रलो, पतरस के बललो, ए तो परभु आय। समोन पतरस एके सुनुन कि हुन परभु आय, करांड ने ओंगछा पींदलो, कसनबलले हुन नांगड़ा रये, आउर समूंद ने डगालो।
8 मानतर दुसर चेलामन डोंगा ने रउन मछरीमन ले भोरलोर झारी के झीकुन आनला, कसनबलले हुनमन समूंद खंड ले जुगे लापी नी रला। सोजे दुयक सव हाथ चो लापी ने रला।
9 जिदलदांय समूंद कटा ने उतरला, हुनमन आईग चो इंगरा उपरे मछरी संगालोर, आउर रोटी के दखला।
10 जीसु हुनमन के बललो: जोन मछरीमन के तुमी एबे धरलास, हुताले खिंडिक आना।
11 समोन पतरस डोंगा ने चेगुन एक सव आउर दुय कोड़ी तेरा ठन बड़े मछरीमन ले भोरलोर झारी के रेटे झीकलो, आउर इतरो खुबे मछरी होलोने बले झारी नी चीरी होली।
12 जीसु हुनमन के बललो: इआ, खाहा। आउर चेलामन ले कोनी बले ए पूछतो ढाढ़ुस नी करला कि तुय कोन आस? कसनबलले हुनमन जानते रओत, ए सते परभु ची आय।
13 जीसु ईलो, आउर रोटी नेउन हुनमन के दिलो, आउर उसनेची मछरीमन के बले,
14 ए तीसर हार रये, जीसु मोरलोमन थाने ले जीव उठलो पाछे चेलामन के दखा देउन रये।
जीसु आउर पतरस चो गोट-बात
15 जिदलदांय हुनमन खादला, तेबे जीसु समोन पतरस के पूछलो: ए समोन, जूहन्ना चो बेटा, काय तुय एमन ले जुगे मोके मया करसीस? हुन, जीसु के बललो: हव परभु, तुय तो जानसीस, मय तुके मया करेंसे: जीसु हुनके बललो: मोचो मेंडामन के चराव।
16 जीसु फेर दुसर हार हुनके पूछलो: ए समोन, जूहन्ना चो बेटा, काय तुय मोके मया करसीस? पतरस हुनके बललो: परभु, तुय जानसीस, मय तुके मया करेंसे। जीसु हुनके बललो: मोचो मेंडामन चो दखा-राखा कर।
17 जीसु तीसर हार हुनके पूछलो: ए समोन, जूहन्ना चो बेटा, काय, तुय मोके मया करसीस? पतरस मुरुसनाय होलो, कसनबलले जीसु हुनके तीन हार असन पूछलो, काय, तुय मोके मया करसीस?
आउर जीसु के बललो, ए परभु तुय तो सपाय के जानसीस: तुय एके बले जानसीस कि मय तुके मया करेंसे: जीसु हुनके बललो, मोचो मेंडामन के चराव।
18 मय तुके सते बलेंसे, जिदलदांय तुय जुवान रयीस, तेबे आपलो करांड बांदुन जोन लगे मन करले, हुन थाने जाते रयीस; मानतर जिदलदांय तुय डोकरा होसे, तेबे आपलो हाथमन के लमासे, आउर दुसर तुचो करांड के बांदुन जोन लगे तुय मन नी करीस हुन लगे तुके नेदे।
19 जीसु ए गोट ले सांगुन दिलो कि पतरस कोन बरन चो मोरना ले महापरभु चो मयमा करुआय; आउर इतरो बललो पाछे हुनके बललो: मोचो संगे आव।
20 पतरस किंदरुन हुन चेला के पाटे एतोके दखलो, जेके जीसु मया करु रये, आउर हुन खातो बेरा जीसु चो छाती लगे लोउन पूछुन रये: ए परभु, तुके धरातो बीता कोन आय?
21 हुनके दखुन पतरस, जीसु के पूछलो: ए परभु, एचो काय गती होयदे?
22 जीसु, पतरस के बललो: मय मन करेंसे कि हुन मोचो एतोदांय ले जीव रउआय जाले, तुके काय आय? तुय मोचो संगे आव।
23 एईकाजे भाईमन (जीसु के पतेयालो लोगमन) ने ए गोट बिगरली कि हुन चेला नी मोरे; तेबले बले जीसु हुनके असन नी बललो, ए नी मोरे, मानतर असन बललो: मय मन करलोने, ए मोचो एतोदांय ले जीव रउआय जाले, तुके एचोले काय आय।