जीसु के धरातोर
18
जीसु ए पारथना करुन भाति आपलो चेलामन संगे किदरोन झोड़ी चो हुन पाट गेलो। हुता गोटोक जयतून चो पदर रये, जोन थाने हुन आउर हुनचो चेलामन गेला।
2 आउर हुनचो धरातो बीता जहूदा बले ए ठान के जानुन रये, कसनबलले जीसु आपलो चेलामन संगे हुता खुबे हार जाउन रये।
3 जहूदा, जीसु के धरातो बायदा करु रये। एईकाजे हुन, रोमी पाईकमन आउर मंदिर राखा बीतामन संगे हुन पदर ने गेला, जेके पुजारीमन चो मुखियामन आउर फरीसीमन बाटले पठाउन रओत। हुनमन दीयामन, कंदीलमन आउर हतियारमन धरु रला।
4 जीसु आपलो उपरे एतो सपाय गोटमन के जानुन निकरलो आउर हुनमन के पूछलो, तुमी कोके डगरायसाहास?
5 हुनमन हुनके बलला, जीसु नासरतेया के। जीसु हुनमन के बललो, मय ची आंय; आउर जीसु के धरातो बीता जहूदा बले हुनमन संगे रलो।
6 हुन “मय आंय” बलते खन, हुनमन पाटे गुचला आउर भुंये घसरला।
7 तेबे जीसु फेर हुनमन के पूछलो, तुमी कोके डगरायसाहास। हुनमन बलला, जीसु नासरतेया के।
8 जीसु हुनमन के बललो, मय तुमके सांगले काय, हुन मय ची आंय। मोके डगरायसाहास जाले एमन के जाउक दियास।
9 ए एईकाजे होली कि हुनचो बचन सत होओ, “जोनमन के तुय मोके दिलीस, हुनमन थान ले गोटोक के बले मय नी हजायें।”
10 समोन पतरस लगे गोटोक खांडा रली, हुनके झीकुन हुन, बड़े पुजारी चो कमेया चो उजा कान के काटुन दिलो। हुन कमेया चो नाव मलखुस रये।
11 तेबे जीसु, पतरस के बललो: आपलो खांडा के सोलका ने संगाव। जोन बटका बुआ मोके दिलोसे, काय मय हुन बटका ले नी खायंदे?
जीसु, हन्नास चो पुरे
12 तेबे पाईकमन, पाईकमन चो मुखिया आउर जहूदी मंदिर राखा करु बीतामन जीसु के धरुन बांदला।
13 आउर हुनके, हुन बरक चो बड़े पुजारी काइफा चो सतरा हन्नास चो पुरे नीला।
14 ए हुनी काइफा रये, जोन जहूदीमन के बलु रये कि आमचो लोगमन काजे गोटोक मनुक मोरतोर नंगत आय।
पतरस, जीसु के ‘नी जाने’ बलेसे
15 समोन पतरस आउर गोटोक, दुसर चेला बले जीसु चो पाट-पाट गेला। ए चेला, बड़े पुजारी के जानते रये आउर जीसु संगे बड़े पुजारी चो दुआरे गेलो।
16 मानतर पतरस दुआर चो बाहरे उबा रये, तेबे हुन दुसर चेला जोन बड़े पुजारी के जानुन रलो, बाहरे ईलो आउर हुन दुआर राखा करु बायले ले गोटेयाउन पतरस के भीतरे नीलो।
17 हुन दुआर राखा करु बायले, पतरस के पूछली: काय, तुय बले हुन मनुक चो चेलामन ले गोटोक नोआस? हुन बललो: “मय नोआंय।”
18 सीत लागते रली गुने पाईकमन आउर मंदिर राखा बीतामन इंगरा के आईग धराउन उबा-उबा छेकते रओत। पतरस बले हुनमन संगे उबा-उबा छेकते रये।
बड़े पुजारी, जीसु के पूछेसे
19 बड़े पुजारी, जीसु के आपलो चेलामन आउर सिखिया चो बारे ने पूछलो।
20 जीसु हुनके बललो, मय, संवसार चो सपाय लोगमन चो पुरे गोटमन सांगले। मय सरलगा मंडली-घरमन ने लोगमन चो पुरे आउर मंदिर ने जोन थाने सपाय जहूदीमन रूंडा होयसोत सिखाले, आउर लुकुन काई बले नी बलले।
21 तुय मोके काय काजे पूछसीस? सुनलो लोगमन के पूछ कि मय हुनमन के काय बलले? दखा, हुनमन जानोत, मय काय-काय बलले।
22 जिदलदांय जीसु असन बललो, तेबे रखवारीमन ले गोटोक जोन हुता रये, जीसु के थापड़ मारुन बललो: काय, तुय बड़े पुजारी संगे असन गोटेयासे?
23 जीसु हुनके बललो: मय अडरा गोटेयाले जाले हुनके मोके सांग; मानतर सत गोटेयालोके मोके काय काजे मारसीस?
24 जीसु के एबे बले बांदुन रला। हन्नास, हुनके उसनेची बड़े पुजारी काइफा लगे पठाउन दिलो।
पतरस फेर जीसु के ‘नी जाने’ बलेसे
25 समोन पतरस उबा होउन आईग छेकते रलो। तेबे कोनी हुनके पूछलो: काय, तुय बले जीसु चो चेलामन ले गोटोक नोआस? हुन बललो, “मय नोआंय।”
26 बड़े पुजारी चो गोटोक कमेया हुता रलो। हुन, हुन कमेया चो कुटुम चो रये जेचो कान के पतरस काटुन रये, हुन पूछलो: काय, मय तुके हुनचो संगे हुन पदर ने नी दखु रयें?
27 पतरस फेर, “मय नोआंय” बललो, आउर हुदलीदांय कुकड़ा बासली।
जीसु, पिलातुस चो पुरे
28 हुनमन बड़े बियाने जीसु के, काइफा लग ले हुन माहाल ने नीला, जोन थाने रोमी राजपाल रते रये। जहूदीमन माहाल भीतरे नी गेला, कसनबलले हुनमन आपने के असुद नी बनाउन फसह तिहार चो भोज खाउक सकोत।
29 तेबे राजपाल पिलातुस, हुनमन लगे बाहरे ईलो आउर पूछलो: तुमी ए मनुक उपरे काय गोट काजे जमकापुरा करसास?
30 हुनमन हुनके बलला: ए अडरा बुता नी करलोने आमी हुनके तुचो लगे नी आनतु।
31 पिलातुस हुनमन के बललो: तुमी ची हुनके निया आउर आपलाहान नियम-कानुन असन नियाव करा। जहूदीमन हुनके बलला: कोकई बले मोरते मारतो हक आमके नीआय।
32 असन एईकाजे होली कि जीसु चो हुन गोट सत होओ जोन हुन आपलो मोरना चो बारे ने सांगुन रये।
33 पिलातुस माहाल भीतरे गेलो आउर जीसु के हुता हागदिलो आउर पूछलो: काय, तुय जहूदीमन चो राजा आस?
34 जीसु बललो: काय, तुय ए गोट आपलो बाटले बलसीस कि बयरीमन मोचो बारे ने तुके सांगला?
35 पिलातुस बललो: तुय जानीस कि मय जहूदी नोआय। तुचो खुद चो लोगमन आउर पुजारीमन चो मुखियामन तुके मोचो लगे आनलासे। तुय काय करलिसीस?
36 जीसु बललो, मोचो राज ए संवसार चो नोआय, मोचो राज ए संवसार चो होती जाले, मोचो चेलामन मोके जहूदीमन चो हाथे नी सोपतो काजे लड़ई करता। मानतर एबे मोचो राज एथा चो नोआय।
37 पिलातुस, जीसु के पूछलो: तेबे काय तुय राजा आस? जीसु बललो, तुय बलसीस कि मय राजा आंय। मय एईकाजे जनम धरलेसे आउर संवसार ने ईलेसे कि सत चो गवई देयें, जोन बले सत ने आसे, हुन मोचो गोट के मानुआय।
38 पिलातुस हुनके बललो, सत काय आय?
असन बललो पाछे हुन जहूदीमन लगे बाहरे गेलो आउर हुनमन के बललो: मय हुनचोने काई कसूर नी पावले।
39 मानतर तुमचो नीती असन, मय फसह तिहार ने तुमचो काजे गोटोक कयदी के छांडुन देउआंय। काय, तुमी मन करसास कि मय तुमचो काजे जहूदीमन चो राजा के छांडुन देयंदे?
40 तेबे हुनमन फेर किरकिरुन बलला: एके नाई, मानतर आमचो काजे बरअबा के छांडुन देस। बरअबा गोटोक खंगार रये।