जीसु आपलो काजे पारथना करतोर
17
जीसु, ए गोटमन सांगलो पाछे सरग बाटे दखुन पारथना करलो: ए बुआ, हुन बेरा अमरलीसे, आपलो बेटा चो मयमा कर कि बेटा बले तुचो मयमा करो।
2 कसनबलले तुय हुनके सपाय चो उपरे हक दिलीसीस कि जोनमन के तुय हुनके दिलीस, हुनमन के जुग-जुग चो जीव देओ।
3 जुग-जुग चो जीव ए आय कि तुके बललोने, गोटकी ची सत महापरभु के जानतोर, आउर जीसु किरिस्त के जानतोर जेके तुय पठालीसीस।
4 जोन बुता तुय मोके करतो काजे देउ रयीस, हुनके पुरा करुन मय संवसार ने तुचो मयमा करलेसे;
5 एदांय, ए बुआ, तुय मोके आपलो संगे मयमा कर, जोन मयमा संवसार के बनालो ले आगे मोके रये।
जीसु, चेलामन काजे पारथना करतोर
6 मय तुचो नाव हुन मनुकमन के दखालेसे जोनमन के तुय संवसार ले मोके दिलीस। हुनमन तुचो रला आउर तुय मोके दिलीस आउर हुनमन तुचो बचन के मानलासे।
7 एबे हुनमन जानला कि जोन बले तुय मोके दिलीस, सपाय तुचो बाटले आय।
8 कसनबलले जोन बचन तुय मोके सांगलीस, मय हुनके हुनमन के सांगुन दिले आउर हुनमन हुनके मानला आउर सते जानला कि मय तुचो बाटले ईलेसे, आउर पतेयाला कि तुय ची मोके पठालीसीस।
9 मय हुनमन काजे पारथना करेंसे, संवसार काजे पारथना नी करेंसे, मानतर हुनमन काजे जेके तुय मोके दिलीस, कसनबलले हुनमन तुचो आत;
10 आउर जोन बले मोचो आय, हुन सपाय तुचो आय; आउर जोन तुचो आय हुन सपाय मोचो आय; आउर हुनमन बाटले मोचो मयमा दखा दिलीसे।
11 मय जुगेदांय संवसार ने नी रयंदे, मानतर हुनमन संवसार ने आसोत; आउर मय तुचो लगे एयंसे। ए पवितर बुआ, आपलो हुन नाव चो सकत ले जोन तुय मोके दिलीस, हुनमन चो राखा कर कि हुनमन आमचो असन गोटोक होओत।
12 जिदलदांय मय हुनमन संगे रले, तेबे मय तुचो नाव चो सकत ले, जेके तुय मोके देउ रयीस, हुनमन चो राखा करले। हुनमन ले गोटोक के छांडुन कोनी नी नसला, एईकाजे कि पवितर सास्तर चो गोट पुरा होओ।
13 मानतर एबे मय तुचो लगे एयंसे, आउर ए गोटमन संवसार ने बलेंसे कि हुनमन चो मंजी मोचो हरिक भरपुर होओ।
14 मय तुचो बचन के हुनमन के सांगुन दिले, आउर संवसार हुनमन के बईर करेसे। कसनबलले जसन मय संवसार चो नोआंय, उसनेची हुनमन बले संवसार चो नोआत।
15 मय असन नी बिनायंसे कि तुय हुनमन के संवसार ले निकराव, मानतर तुय हुनमन के हुन दुसट बललोने सयतान ले बचाव।
16 हुनमन ए संवसार चो नोआत, जसन मय बले ए संवसार चो नोआंय।
17 सत बाटले हुनमन के पवितर कर, तुचो गोट सत आय।
18 जसन तुय मोके संवसार ने पठालीसीस, उसनेची मय बले हुनमन के संवसार ने पठालेसे।
19 आउर हुनमन काजे मय आपने के पवितर करेंसे कि हुनमन बले सत बाटले पवितर होओत।
जीसु, सपाय पतेयातोमन काजे पारथना करतोर
20 मय सोजे एमन काजे ची पारथना नी करेंसे, मानतर हुनमन काजे बले जोनमन एमन चो गोट के सुनुन मोके पतेयादे कि हुनमन सपाय गोटकी ची होओत।
21 जसन ए बुआ, तुय आउर मय गोटकी आंव बललोने, तुय मोचो ने आउर मय तुचोने आंसे, उसनेची हुनमन बले आमचो ने होओत, तेबे संवसार पतेयायदे कि तुय ची मोके पठालीसीस।
22 जसन तुय मोके मयमा करलीस, उसनेची मय बले हुनमन के मयमा करलेसे कि हुनमन बले गोटकी ची होओत जसन आमी गोटकी आसुं।
23 जसन तुय मोके मया करलीस, उसनेची हुनमन के मया करलीस कि हुनमन मया ने भरपुर होउन गोटकी होओत, आउर संवसार जानो, तुय ची मोके पठालीसीस।
24 ए बुआ, मय मन करेंसे, जेके तुय मोके दिलीसीस, हुनमन बले मोचो संगे हुताय रओत, जोन थाने मय आंसे कि हुनमन मोचो हुन मयमा के दखोत, जेके तुय मोके दिलीसीस, कसनबलले तुय संवसार चो मूर ले आगे ले मोके मया करसीस।
25 ए धरमकारी बुआ, संवसार तुके नी जाने; मानतर मय तुके जानले, आउर एमन बले जानला कि तुय ची मोके पठालीसीस।
26 मय तुचो नाव हुनमन के सांगले आउर हुनमन के सांगते रयंदे कि जोन मया तुके मोचो काजे आसे, हुनमन काजे बले रओ, आउर मय हुनमन ने रयंदे।