16
ए जमाय गोटमन मय एईकाजे तुमके सांगलेसे कि तुमचो बिसवास निमल नी होओ।
2 हुनमन तुमके मंडली-घर ले निकराउन देदे; आउर असन बेरा एयसे, जोन कोनी तुमके मोरते मारदे, हुन बिचारेदे कि मय महापरभु चो सेवा करेंसे।
3 हुनमन असन बुता एईकाजे करदे कि हुनमन बुआ के नोहले मोके नी जानोत।
4 मय एईकाजे ए गोट तुमके सांगले, जिदलदांय हुनमन असन करतो बेरा अमरेदे, तेबे तुमी सूरता करासे कि मय तुमके आगे ले सांगुन रयें। मय मूर ने ए गोट तुमके नी सांगले, कसनबलले मय तुमचो संगे रले।
पवितर आत्मा चो बुता
5 मानतर एबे मय मोके पठाउ लगे जायंसे, आउर तुमीमन ले कोनी बले नी पूछेसे, तुय कोन बाटे जायसीस?
6 कसनबलले जोन गोटमन मय तुमके सांगले, हुनचो काजे तुमचो मन खुबे मुरुसनाय होलीसे।
7 मानतर मय तुमके सत गोट सांगेंसे, मय गेलोने तुमचो काजे नंगत आय, कसनबलले मय नी गेलोने, हुन साहरा करु (पवितर आत्मा) तुमचो लगे नी एये। मानतर मय गेलोने, हुनके तुमचो लगे पठाउन देयंदे।
8 आउर हुन पवितर आत्मा एउन संवसार चो लोगमन के पाप, धारनिक आउर नियाव चो गोट के समजायदे।
9 हुनमन के पाप चो बारे ने एईकाजे समजायदे कि हुनमन मोके नी पतेयाओत;
10 आउर धारनिक चो बारे ने एईकाजे समजायदे कि मय बुआ लगे जायंसे, आउर तुमी मोके फेर नी दखासे।
11 नियाव चो बारे ने एईकाजे समजायदे कि संवसार चो मुखिया बललोने सयतान के महापरभु कसूरदार मानलोसे।
12 तुमके सांगतो काजे मोके आउर खुबे गोटमन आसे, मानतर एबे तुमी हुनमन के समजुक नी सकास।
13 मानतर सत चो आत्मा ईलोने, तुमके सत बाट के दखायदे। कसनबलले हुन आपलो बाटले नी बलेदे, मानतर जोन बले हुन सुनेसे, हुनके ची सांगेदे बललोने, होतो गोटमन के तुमके सांगुन देयदे।
14 हुन मोके मयमा देयदे, कसनबलले जोन बले मय बलेंसे, हुन गोटमन के हुन तुमके समजायदे।
15 जितरो बले बुआ लगे आसे, हुन सपाय मोचो आय। एईकाजे मय बलले कि जोन बले मय बलेंसे, पवितर आत्मा हुन गोटमन के तुमके समजायदे।
तुमचो दुख, हरिक ने पलटेदे
16 डंडिक काजे तुमी मोके नी दखासे; मानतर डंडिक पाछे तुमी मोके फेर दखासे।
17 आदो चेलामन आपलाहान काजे गोटेयाउक मुरियाला कि हुनचो, असन बलतो चो अरथ काय आय, “डंडिक काजे तुमी मोके नी दखासे”; मानतर “डंडिक पाछे तुमी मोके फेर दखासे?” आउर “मय मोचो बुआ लगे जायंसे।”
18 ए डंडिक काजे बलतो चो अरथ काय आय? आमी नी जानुंसे कि हुन काय बलेसे।
19 जीसु जानलो कि हुनमन, हुनके पूछुक मन करसोत। एईकाजे हुन, हुनमन के बललो: काय, तुमी आपलाहान ने मोचो ए गोट उपरे बिचार करासाहास? डंडिक काजे तुमी मोके नी दखासे; मानतर डंडिक पाछे तुमी मोके फेर दखासे।
20 मय तुमके सते बलेंसे, तुमी गागासे आउर बिलकासे; मानतर संवसार हरिक मनायदे। तुमी मुरुसनाय होआसे, मानतर तुमचो दुख हरिक ने पलटुन जायदे।
21 छर-फर होतो बेरा बायले के खुबे दुखा आय, कसनबलले हुनचो दुखतो बेरा अमरलीसे; मानतर पिला जनमलोने, हुन आपलो दुखा के भूलकुआय। कसनबलले हुन हरिक आसे कि गोटोक पिला संवसार ने जनमलोसे।
22 एदांय तुमके असनी दुख आसे, मानतर मय तुमके फेर भेटेंदे आउर तुमी हरिक होआसे, आउर कोनी तुमचो हरिक के झीकुक नी सकोत।
23 हुन दिने तुमी मोके काईची नी मांगासे: मय तुमके सते बलेंसे, बुआ के काई बले मांगलोने हुन मोचो नाव ने तुमके देयदे।
24 एदांय ले तुमी मोचो नाव ने काईची नी मांगलास; मांगलोने मिरेदे, कसनबलले तुमचो हरिक भरपुर होओ।
संवसार के जीततोर
25 मय तुमके ए गोटमन के कटारुन बललेसे; मानतर हुन बेरा अमरेसे, मय तुमके कटारुन नी सांगे, मानतर तुमके बुआ चो गोट के सरसरा सांगेंदे।
26 हुन दिने तुमी मोचो नाव ने मांगासे; आउर मय तुमके असन नी बलें कि मय तुमचो काजे बुआ ले गुहारेंदे।
27 बुआ खुदे तुमके मया करेसे कसनबलले तुमी मोके मया करसास आउर पतेयालास कि मय बुआ ले ईलेसे।
28 मय बुआ ले निकरुन संवसार ने ईलेसे; एबे मय फेर संवसार के छांडुन बुआ लगे जायंसे।
29 हुनचो चेलामन बलला: एबे तुय तो समजतो असन सांगसीस, आउर कटारुन नी सांगसीस।
30 एबे आमी जानलुसे, तुय सपाय बानी के जानसीस, आउर तुके काई बले पूछतोर नीआय; एईकाजे आमी पतेयाउंसे कि तुय महापरभु ले ईलीसीस।
31 एके सुनुन जीसु हुनमन के बललो, काय, तुमी एबे पतेयायसाहास?
32 दखा, असन बेरा एयसे बललोने, बेरा अमरलीसे कि तुमी सपाय ए बाटे हुन बाटे होउन जाहासे, आउर आपलेई बाट के धरासे, आउर मोके एकला छांडुन दियासे; तेबले बले मय एकला नीआय, कसनबलले बुआ मोचो संगे आसे।
33 मय ए जमाय गोटमन के एईकाजे सांगलेसे कि तुमके मोचो ले अस्तिर मिरो; संवसार ने तुमके चिपा आसे, मानतर ढाढ़ुस करा, मय संवसार के जीतलेसे।